Beibel e taki fu omen uman di be lobi Yehofa. Den be e du sani enke fa Yehofa wani. Den uman ya ‘soi na ala fasi taki den e aliki Gadu’ (1 Tim. 3:11). Boiti den uman ya, den yonkuu sisa sa waka a den sisa aini a kemeente baka di e dini Yehofa anga den hii ati. Yonkuu sisa, i sabi wantu sisa dii sa waka a den baka? Pakisei den moin manii fu den. Bakadati dai meke moiti fu kon abi den manii ya tu. Efu u wani du sani enke Yesesi, da u mu abi sakafasi. Efu wan uman abi sakafasi, en anga Yehofa o de bun mati. En anga taawan o de bun mati tu. Wan uman di lobi Yehofa de kabakaba fu du san sikiifi a 1 Korentesama 11:3. A tekisi ya e soi sama Yehofa gi a faantiwowtu fu teke fesi aini a kemeente anga a osofamii. w23.12 18-19 ¶3-5

Yehofa wani wan man lobi en uman. A wani a man solugu en uman tu. A mu e gi en uman taanga-sikin te a abi booko-ede. A mu e yeepi en fi en biibi taanga tu. I mu abi lesipeki gi umansama, sama mu man fitoow i. Efii meke moiti fu abi den manii ya, yo de wan bun man gi yu uman. Baka tei toow, kande yo meke pikin. Sai sa leli fu Yehofa fu man de wan bun dda? (Efe. 6:4) Yehofa be e taigi en Boi Yesesi taki a lobi en. A be e taigi en tu taki ai meke a piisii (Mat. 3:17). Efii toon wan dda, meke moiti fu e taigi den pikin fii ala yuu taki i lobi den. I mu e gafa den fu den bun sani di den e du. Den dda di e waka a Yehofa baka sa yeepi den pikin fu den fu toon Yehofa mati. Wan fasi fai sa teke seeka fu de wan bun dda, a te ye taigi taawan aini yu osufamii taki i lobi den. I mu lobi yeepi den baala anga sisa aini a kemeente. Soi den tu taki i lobi den.​—Yoh. 15:9. w23.12 28-29 ¶17-18

Winsi fa we dini Yehofa anga u hii ati, tokuso sani e miti u leti enke ala taa sama. A omen sama e buuse a foluku fu Gadu. Den e suku fu du ogii anga u tu. Yehofa nai kibii u fu den sani ya á miti u, ma a paamisi u taki aw yeepi u (Yes. 41:10). Na a yeepi di Yehofa e yeepi u meke we piisii te den sani ya e miti u. Winsi sai miti u, ai yeepi u fu sabi saw mu du fu wa gwe fika en. Yehofa paamisi u taki aw gi wi ‘a freide fi en’ (Filip. 4:6, 7). A freide ya na a fii di Yehofa e giw taki sani o go bun anga u fu di wi anga en a mati. Wi enke libisama á poi fusutan fa Yehofa e gi wi a freide ya. Kande i foondoo wan leisi dii kaba begi Yehofa, bika i be si taki ya be e buuya moo. I be e fii bun, bika a be gi yu ‘a freide fi en’. w24.01 20 ¶2; 21 ¶4