U mu e gi useefi taanga-sikin te u de a den komakandaa

1. Saide we gi piki a den komakandaa?

SAIDE we go a komakandaa? A fosi sani, a fu di u wani gafa Yehofa (Ps. 26:12; 111:1). Te we go a den komakandaa, we gi den baala anga sisa fu u taanga-sikin tu, winsi fa a ten e kon moo taanga namo (1 Tes. 5:11). Te we gi piki a den komakandaa, we gafa Yehofa, ma we gi den baala anga sisa fu u taanga-sikin tu.

2. On ten we fende a okasi fu gi piki a den komakandaa?

² Ala wiki we fende a okasi fu gi piki a den komakandaa. Te u de na a komakandaa di e holi sataa efuso sonde, u sa gi piki na a Wakititolen-sutudi. Te u de na a mindiiwiki komakandaa, u sa gi piki na a Diki go moo dipi efuso a kemeente Beibelsutudi. U sa gi piki a den taa paati pe den baala e poti akisi tu.

3. Saide ai taanga gi u son yuu fu gi piki? Fa Hebrewsama 10:24, 25 sa yeepi u?

³ Ala u wani gafa Yehofa. U wani gi den baala anga sisa fu u taanga-sikin tu. Ma tu sani de di sa meke a taanga gi u fu gi piki a den komakandaa: (1) Te we feele fu gi piki. (2) Te u wani gi piki, ma u nai fende a okasi fu gi piki. San u sa du te a sani ya e pasa? A biifi di apostel Pawlesi be sikiifi gi den Hebrew Kelesten o yeepi u fu fende a piki fu a akisi ya. Di a be e taki fu saide u mu e go a den komakandaa, a be taki u mu meke moiti fu ‘gi useefi taanga-sikin’. (Leisi Hebrewsama 10:24, 25.) U mu holi a pakisei taki den piki fu u e gi den baala anga sisa taanga-sikin. Efu u holi a sani ya a pakisei, u naw feele fu gi piki. Winsi wa fende a okasi fu gi piki, tokuso u sa piisii, bika taa sama fende a okasi.​—1 Peit. 3:8.

4. San a den dii sani di wo luku aini a artikel ya?

⁴ Aini a artikel ya, wo luku fosi faw sa gi useefi taanga-sikin aini wan pikin kemeente pe sama á de ipi fu gi piki. Bakadati, wo luku faw sa gi useefi taanga-sikin aini wan gaan kemeente pe tyaipi sama e sutu den ana. Enke lasiti, wo luku faw sa gi taawan taanga-sikin anga den sani di we taki te we gi piki.

U MU E GI USEEFI TAANGA-SIKIN TE U DE AINI WAN PIKIN KEMEENTE

5. Faw sa gi useefi taanga-sikin efu tyaipi sama á kon a komakandaa?

⁵ Aini wan pikin kemeente efuso wan kulu, tyaipi sama nai de fu gi piki. Neen meke son yuu, a baala di e teke fesi abi fu wakiti fu si efu taa sama o opo den ana. Kande yo si enke a komakandaa e langa tumisi. Kande yo fii enke ya fende taanga-sikin tu. Sai sa du te a sani ya e pasa? De seekaseeka fu sutu yu ana ala yuu. Efu ye du a sani ya, yo gi taawan taanga-sikin fu gi piki tu.

6-7. San o yeepi u fu wa feele fu gi piki?

⁶ Sai sa du efu ai taanga gii fu gi piki? A omen sama e feele fu gi piki. Efii wani gi den baala anga sisa taanga-sikin, kande i sa ondoosuku sani di o yeepi i fi ya feele fu gi piki. Fai sa du a sani ya?

⁷ I sa luku den taa Wakititolen di e taki fu a toli ya.b Wan fu den sani di sa yeepi i, a fu seeka bun (Odo 21:5). Tei sabi a toli di wo taki a komakandaa bun, aw moo makiliki gii fu gi piki. Meke moiti fu gi satu piki (Odo 15:23; 17:27). Te ye gi satu piki, a sani ya o yeepi i fi ya senuwe tumisi. Boiti dati, te ye gi piki, i naabi fu leisi san de aini a paragraaf. I sa taki sai fusutan fu a toli. A sani ya e soi taki i seeka bun.

8. Fa Yehofa e si a moiti di ye meke?

⁸ Kow taki i puubei den sani ya, ma toku ye feele fu gi moo enke wan efuso tu piki. Sai sa biibi? I sa biibi taki Yehofa e teke en fu bigi te a si a moiti di ye meke (Luk. 21:1-4). Noiti Yehofa o akisi u fu du wan sani di a sabi taki u naw poi du (Filip. 4:5). Meke moiti fu du sai poi. I mu sabi a fesi omen piki i wani gi. Begi Yehofa fi ya senuwe tumisi te den gii a piki. Kande i sa bigin anga wan satu piki.

U MU E GI USEEFI TAANGA-SIKIN TE U DE AINI WAN GAAN KEMEENTE

9. Saide á na ala yuu ai makiliki fu fende piki aini den gaan kemeente?

⁹ Tei de aini wan gaan kemeente sani e de taa fasi, bika a omen baala anga sisa e seeka denseefi fu gi piki. Son yuu i nai fende a okasi fu gi piki. Luku a toli fu wan sisa den e kai Danielle, di be lobi gi piki a den komakandaa.c A be e si den piki di ai gi enke wan pisi fu a dini di ai dini Yehofa. A be e si en enke wan fasi fa a be sa gi taawan taanga-sikin. Boiti dati, en biibi be e kon moo taanga. Di a sisa ya foloisi go aini wan moo gaan kemeente, a ná ala yuu a be e fende piki. Son yuu a fu te a komakandaa kaba, aa fende nawan piki. A taki: ‘Mi ati be e boon. Mi be e fii enke mi lasi wan gaandi. Te a sani ya e pasa ala yuu, ye si enke a fuseefi den nai gii piki.’

10. San o yeepi i fu gi piki winsi i de aini wan gaan kemeente?

¹⁰ Efu a sani di miti Danielle miti i kaba, kande i naw wani gi piki moo. Kande yo wani sidon pii da ye aliki namo. Ma ya mu gi abaa. Sai sa du? I sa seeka omen piki, da winsi ya fende a okasi fu gi piki na a bigin fu a sutudi, kande i sa fende a okasi bakaten. Te ye seeka gi a Wakititolen-sutudi, i sa luku fa ibii paragraaf e kai anga a tekisi fu a sutudi. A sani ya o yeepi i fu gi wan bun piki. Kande i sa seeka fu gi piki a den paragraaf di e taki fu toli di moo taanga fu fusutan (1 Kor. 2:10). Saide? Bika tyaipi sama nai sutu den ana a den paragraaf de. Ma kow taki i meke moiti fu du ala den sani ya, ma ya fende piki. Sai sa du? Fosi a komakandaa bigin, i sa taigi a baala di e teke fesi sowtu paragraaf i be o wani gi piki.

11. San Filipisama 2:4 e gi u taanga-sikin fu du?

¹¹ Leisi Filipisama 2:4. Apostel Pawlesi be sikiifi taki u mu e booko wi ede anga taawan. Faw sa wooko anga a sani ya te u de a komakandaa? A te we holi a pakisei taki leti enke u, taa sama de di wani gi piki tu.

12. San a wan fasi faw sa gi den baala anga sisa fu u taanga-sikin te u de a den komakandaa? (Luku a fowtow tu.)

¹² Pakisei a sani ya. Te ye gi toli anga den mati fii, ai wawan e taki? Nono, a nai wawan e taki, bika i wani denseefi fende a okasi fu taki tu. A so a de anga den komakandaa fu u. Te omen sama e gi piki na a komakandaa, ai moo moin. Neen meke a moo bun fasi faw sa gi den baala anga sisa fu u taanga-sikin, a te we gi den a okasi fu taki fu a biibi fu den (1 Kor. 10:24). Meke u luku faw sa du a sani ya.

13. Sai sa du fu meke taa sama fende a okasi fu gi piki?

¹³ A fosi sani dii sa du, a fu gi satu piki, da taawan seefi o fende a okasi fu taki wan sani tu. Den owluman anga taa baala anga sisa di abi ondoofeni sa soi den taawan fa den sa du a sani ya. Winsi yo gi wan satu piki, ya mu taki fu tyaipi sani. Efii taki fu ala den sani di de aini a paragraaf, den taawan naw fende sani fu taki moo. A paragraaf ya e taki fu tu sani. A fosi sani, u mu gi satu piki. Du fu tu, ya mu taki fu tyaipi sani winsi a wan satu piki yo gi. Kow taki a yu fosi fende a okasi fu gi piki na a paragraaf ya, sai sa du? I sa taki fu wan fu den penti namo.

14. Sai mu holi a pakisei fosi i sutu yu ana fu gi wan piki? (Luku a fowtow tu.)

¹⁴ Ya mu e sutu yu ana ipi tumisi. Efi ye sutu yu ana omen leisi baka makandaa, a baala di e teke fesi o fii enke a namonamo a mu gii piki. I mu holi a pakisei taki taa sama wani gi piki tu. Te ye opo yu ana ipi tumisi, son sama nai wani sutu den ana moo.​—Peleik. 3:7.

15. (a) Sai mu holi a pakisei te ya fende piki? (b) Fa a baala di e holi a sutudi sa soi taki ai holi ala sama a pakisei? (Luku a faki di den e kai ‘Te yu abi wan paati pe sama sa gi piki.’)

¹⁵ Te omen sama e sutu den ana, kande i naw fende a okasi fu gi piki enke fai be wani. Son yuu a fu te a komakandaa kaba, ya fende nawan piki. I nai fii bun te sani ya pasa, ma ya mu si enke a wani a baala á wani gii piki.​—Peleik. 7:9.

16. Fai sa gi den sama di e gi piki taanga-sikin?

¹⁶ Efi ya fende a okasi fu gi piki na a komakandaa, i mu aliki bun te den taawan e gi piki. Baka a komakandaa, da i sa gafa den fu den piki di den gi. Leti enke fa den piki dii be o gi be o gi den baala anga sisa taanga-sikin, a letiso a gafa di yo gafa den o gi den taanga-sikin tu (Odo 10:21). A gafa di we gafa taawan a wan fasi fa we gi den taanga-sikin.

WANTU TAA FASI FAW SA GI USEEFI TAANGA-SIKIN

17. (a) Fa mma anga dda sa yeepi den pikin fu gi piki di fiti a yali fu den? (b) Enke fa a felon e soi, da san a fo sani di u mu du te we seeka wan piki? (Luku a maiki tu.)

¹⁷ San a wantu taa fasi faw sa gi useefi taanga-sikin a den komakandaa? Efi yu abi pikin, yeepi den fu seeka wan piki di fiti a yali fu den (Mat. 21:16). Son leisi we taki fu polobelema aini a toowlibi. We taki fu hululibi tu. Te we taki fu den toli ya, i mu luku sowtu paragraaf wan pikinnengee sa gi piki. A bun fu yeepi a pikin fii fu fusutan saide a naw fende piki ala yuu te a opo en ana. Efii leli den a sani ya, a sani de o yeepi den fu den á fii wan fasi te wan sama fende a piki di den be wani gi.​—1 Tim. 6:18.d

18. San o yeepi u fu wa gi piki di o meke sama poti pakisei aw tumisi? (Odo 27:2)

¹⁸ Ala u sa gi bun piki di e gafa Yehofa. Den piki fu u sa gi den baala anga sisa taanga-sikin tu (Odo 25:11). Wanwan leisi u sa gi ondoofenitoli fu useefi, ma u mu luku bun fu u nai poti pakisei a useefi tumisi. (Leisi Odo 27:2; 2 Kor. 10:18.) Den sani di we taki, mu meke sama poti pakisei a Yehofa, a Wowtu fi en, anga a foluku fi en (Openb. 4:11). Son yuu den baala e akisi u fu gi wan ondoofenitoli fu useefi a son paragraaf. Te den poti den sowtu akisi ya, da i sa taki wan sani fi iseefi. Du fu tu akisi fu paragraaf 19 a wan akisi di e gii a okasi fu taki wan sani fi iseefi.

19. (a) Sowtu wini wo fende te we holi taawan a pakisei te u de a komakandaa? (Romesama 1:11, 12) (b) Sai lobi fu a gaandi di wi abi fu gi piki a komakandaa?

¹⁹ Den baala nai taigi u finifini faw mu gi piki, anga fa wa mu gi piki. Toku u mu meke moiti fu gi piki di e gi den baala anga sisa fu u taanga-sikin. Son wan fu u mu meke moiti fu moo gi piki. Ma taawan mu meke moiti fu den nai opo den ana baka makandaa, fu taawan sa fende piki tu. Efu we holi taawan a pakisei, wo man gi useefi taanga-sikin te u de a den komakandaa.​—Leisi Romesama 1:11, 12.