I poi doo den maiki fii

1. Sai taanga gi omen baala anga sisa fu du?

ALA sama di e dini Yehofa wani du moo gi en. U wani a piisii anga u. Fu man du a sani ya, daw mu poti maiki gi useefi. U sa poti enke maiki fu kon abi den manii di wi enke Kelesten mu abi. U sa meke moiti fu leisi Beibel ala dei, efuso du moo aini a peleikiwooko. Kande i poti wan maiki kaba, ma ai taanga gii fu doo en. Efu a so, da holi a pakisei taki a nai wawan a sani ya e miti. Wan baala den e kai Philip, e meke moiti fu begi moo bun. Ai wani begi omen leisi aini wan dei, ma a ná ala yuu ai fende ten fu begi. Wan sisa den e kai Erika be poti enke maiki fu e doo fuuku a den peleikiwooko komakandaa. Ma beina ala yuu ai doo lati a den peleikiwooko komakandaa. Wan baala den e kai Tomáš meke moiti omen leisi fu leisi a hii Beibel. Ma a taki: ‘Mi be e fuka te mi be e leisi Beibel. A dii leisi mi meke moiti fu leisi a hii Beibel, ma faisi mi leisi doo Lefitikesi mi e tapu.’

2. Saide wa mu fii booko-saka te ai taanga giw fu doo wan maiki?

² Efu ai taanga gii fu doo wan maiki dii poti, da ya mu lasi-ati. Winsi a wan pikin maiki i poti, toku aw teke ten fosi i doo en. Son yuu a bunbun moiti yu abi fu meke. A moiti di ye meke fu doo den maiki fii, e soi taki ye si a dini di ye dini Yehofa enke wan gaan sani. Boiti dati, ye soi en taki i wani gi en a moo bun sani di yu abi. Holi a pakisei taki Yehofa e si a moiti di ye meke, a sabi sai poi du. Neen meke a naw akisi i fii du wan sani di a sabi taki i naw poi du (Ps. 103:14; Mika 6:8). Te ye poti maiki, i mu poti wan maiki dii sabi taki yo poi doo. Efii poti wan maiki kaba, da sai sa du fu doo en? Kow luku wantu sani di sa yeepi i.

I MU SABI SAIDE I WANI DOO WAN MAIKI

3. Saide a pelensipali fu sabi saide u wani doo wan maiki?

³ Tei sabi saide i wani du wan sani, ai moo makiliki gii fu meke moiti fu du en. Te wan sama sabi saide a wani doo wan maiki di a poti, aw wooko taanga fu doo en tu. Tei sabi saide i wani doo wan maiki, a sani ya de enke a winta di e meke wan seiliboto go a fesi. Efu a winta e wai naamo, a sama di de aini a seiliboto o doo pe a wani go. Boiti dati, efu a winta e wai taanga, da aw doo moo gaw. Neen meke wa mu feegete saide u wani doo wan maiki, bika na a sani ya o yeepi u fu meke moiti fu doo en. Wan baala den e kai David di e tan a El Salvador taki: ‘Tei sabi saide i wani doo wan maiki, yo meke moo moiti fu doo en. I naw meke nawan sani tapu i fu doo en.’ Saw yeepi i fi ya feegete saide i wani doo wan maiki?

4. Saw sa begi Yehofa? (Filipisama 2:13) (Luku a fowtow tu.)

⁴ Begi Yehofa fu a meke yu angii fu doo den maiki fii. Yehofa sa gi yu a santa yeye fi en. A santa yeye sa meke yu angii fu doo a maiki fii. (Leisi Filipisama 2:13.) Son yuu te u sabi taki u mu du wan sani, da we poti en enke wan maiki di u wani doo. Ma son yuu u nai abi a fii fu du den sani di u mu du fu doo a maiki ya. Na a sani ya be pasa anga wan sisa den e kai Norina. A sisa ya e tan a Uganda. A be poti enke maiki fu bigin wan Beibelsutudi. Ma a be e fii enke aa sabi gi leli, neen meke aa be e meke moiti fu fende sutudi. San yeepi en? A taki: ‘Mi be e begi Yehofa ala dei fu a meke mi angii fu bigin wan Beibelsutudi anga wan sama. Mi be e meke moiti tu fu toon wan moo bun leliman. Baka wantu mun mi kon si taki mi be e moo angii fu abi wan Beibelsutudi. Aini aseefi yali de, mi bigin sutudeli Beibel anga tu sama.’

5. Saw mu teke ten pakisei efu u wani doo den maiki fu u?

⁵ Pakisei den sani di Yehofa du gii kaba (Ps. 143:5). Apostel Pawlesi be e teke ten pakisei a bun-ati di Yehofa soi en. A sani ya be e gi en taanga-sikin fu du ala san a man gi Yehofa (1 Kor. 15:9, 10; 1 Tim. 1:12-14). Efi ye pakisei den sani di Yehofa du gii kaba, a sani ya o gii taanga-sikin fu doo den maiki fii (Ps. 116:12). Luku san be yeepi wan sisa di be wani toon wan kowownu pionili fu doo a maiki fi en. A taki: ‘Mi be e teke ten pakisei a fasi fa Yehofa soi mi taki a lobi mi. A tyai mi kon aini a gaan osufamii fi en. Ai booko en ede anga mi. Ai kibii mi tu. Di mi teke ten pakisei den sani ya, mi be kon moo lobi en. A sani ya gi mi taanga-sikin fu moo meke moiti fu toon wan pionili.’

6. San a wan taa sani di o yeepi i fu doo den maiki fii?

⁶ Poti pakisei a den wini di yo fende. Luku san be yeepi Erika, a sisa di u be taki fi en kaba fu doo moo fuuku a den peleikiwooko komakandaa. A taki: ‘Mi kon si taki a omen sani mi e lasi te mi doo lati na a peleikiwooko komakandaa. Ma te mi doo fuuku, mi e fende a okasi fu taki anga den baala anga sisa. Boiti dati, te mi de aini a peleikiwooko mi sa wooko anga den sani di mi leli na a peleikiwooko komakandaa.’ Erika poti pakisei a den wini di ai fende te a doo fuuku a den peleikiwooko komakandaa. A sani ya yeepi en fu doo a maiki fi en. Sai sa teke ten pakisei efii wani doo wan maiki? Efii poti enke maiki fu leisi Beibel efuso fu begi moo bun, da pakisei fa den sani ya o yeepi i fi yu anga Yehofa toon moo bun mati (Ps. 145:18, 19). Efu a maiki fii a fu meke moiti fu kon abi den manii di wan Kelesten mu abi, da pakisei fa den manii ya o yeepi i fi yu anga taawan libi na a wan (Kol. 3:14). I sa sikiifi a pampila saide i wani doo den maiki dii poti. Baka tei du a sani ya, i mu e luku a pampila ala yuu. Tomáš di u be taki fi en kaba taki: ‘Mi e pakisei den somen wini di mio fende te mi doo wan maiki. Na a sani ya e gi mi taanga-sikin fu wooko taanga fu doo wan maiki di mi poti.’

7. San yeepi Julio anga en uman fu doo a maiki fu den?

⁷ Paa anga sama di o gii taanga-sikin fu doo den maiki fii (Odo 13:20). Luku san yeepi wan baala den e kai Julio anga en uman fu du moo aini a peleikiwooko. A baala ya taki: ‘U be e meke mati anga sama di be e giw taanga-sikin fu doo a maiki fu u. Den sani di den be e taki be e yeepi u, bika sowan fu den be doo a maiki ya kaba. Den be lobi akisi u faaigo anga den maiki fu u. Te u be abi taanga-sikin fanowdu, ala yuu den be e yeepi u.’

TE U NAI FII FU DU WAN SANI

8. San sa pasa efu a te u fii fosi we meke moiti fu doo den maiki fu u? (Luku a fowtow tu.)

⁸ Ala wi abi u yuu pe u nai fii fu du wan sani. Ma a sani ya wani taki wa poi doo den maiki fu u? Nono. Pakisei a toli di u be taki fu a seiliboto. Na a winta e meke a boto ya go anga fesi. Ma a ná ala yuu a winta e wai taanga. Son leisi a nai wai seefiseefi. A sani ya wani taki a boto naw go anga fesi moo? Nono. Son wan fu den boto ya abi wan masini, taawan abi pali. Te a winta nai wai, da a den sani ya den e koboloiki fu meke a boto go anga fesi. U sa maiki a winta anga a fii di we fii fu doo den maiki fu u. A ná ala yuu we fii fu meke moiti fu doo den maiki fu u. Efu u be o wooko anga san we fii namo, da kande wa be o poi doo den maiki fu u. Ma leti enke fa wan sama di e tyai wan seiliboto e fende taa fasi fu meke a boto go anga fesi, a so useefi mu tan meke moiti fu doo den maiki fu u. Son yuu wo abi fu dwengi useefi fu doo den maiki fu u, ma te u doo den kaba wo piisii. Fosi u luku saw sa du fu doo den maiki fu u, wo poti pakisei a wan akisi fosi.

9. U mu tan meke moiti fu doo wan maiki, winsi u nai fii fu du a sani ya?

⁹ Yehofa wani u dini en anga u hii ati. A wani we piisii te we wooko gi en (Ps. 100:2; 2 Kor. 9:7). Kow taki u poti wan maiki di u wani doo, ma u nai fii fu meke moiti fu doo a maiki ya. I si enke u mu dwengi useefi fu doo en? Luku a toli fu apostel Pawlesi. A be taki: ‘Mi e naki mi sikin anga kofu, mi e basi en enke wan saafu’ (1 Kor. 9:25-27). Pawlesi be e dwengi enseefi fu du san bun, winsi a ná ala yuu a be e fii fu du son sani. Yehofa be e piisii anga den sani di Pawlesi be e du gi en? Eeye. A pai en fu a fasi fa a wooko taanga gi en.​—2 Tim. 4:7, 8.

10. San a den wini di yo fende te ye meke moiti fu doo den maiki fii, winsi aa makiliki?

¹⁰ Yehofa e piisii te a si fa ye meke moiti fu doo den maiki fii winsi aa makiliki. A sabi taki son wan fu den maiki di u wani doo, a ná fu di u lobi den meke we poti den. Ma a fu di u lobi en. Leti enke fa Yehofa be belesi Pawlesi, a so aw belesi i tu (Ps. 126:5). Te ye si fa Yehofa e belesi i, a sani ya o gii taanga-sikin. Lucyna wan sisa di e tan aini Polen taki: ‘Son yuu mi nai fii fu go peleiki. Moomoo te mi weli. Ma ala yuu te mi go peleiki mi e piisii. Mi e si a sani ya enke wan moin kado.’ Meke u luku wantu sani di u sa du te u nai fii fu du saw mu du fu doo den maiki fu u.

11. Fa Yehofa sa yeepi i fu man dwengi iseefi?

¹¹ Begi Yehofa fu a yeepi i fu dwengi iseefi. Te wan sama poi dwengi enseefi, da a sani ya e yeepi en fu aa du sani di á bun. Ma wi abi fu dwengi useefi fu du bun sani tu. Moomoo efu a sani di u mu du taanga, efuso efu u nai fii fu du en. Dwengi iseefi, a wan fu den manii di a yeye fu Yehofa e meke sama abi. Neen meke efu ai taanga gii fu dwengi iseefi, i sa begi Yehofa en santa yeye fu a yeepi i (Luk. 11:13; Gal. 5:22, 23). David di u be taki fi en kaba taki begi yeepi en. A ná ala yuu a be e makiliki gi en fu sutudeli anga enseefi. A taki: ‘Mi begi Yehofa fu a yeepi mi fu man dwengi miseefi. Fu di a yeepi mi, meke mi be poi meke wan sikeima fu sutudeli anga miseefi. Nownow na ala wiki mi e sutudeli.’

12. Fa Peleikiman 11:4 e yeepi u fu doo den maiki fu u?

¹² Ná wakiti te enke ala sani e go bun. Noiti sani o go enke faw wani aini a goontapu ya. Neen meke efu u be o wakiti fu ala sani go bun fosi, noiti u be o doo den maiki fu u. (Leisi Peleikiman 11:4.) Wan baala den e kai Dayniel taki: ‘Faw wani á de ya. Neen meke wa mu wakiti te ala sani e go bun fosi wo bigin du saw mu du.’ Wan baala den e kai Paul di e tan aini Uganda taki saide a ná wan koni sani fu wakiti a moo bun yuu fu bigin anga wan sani di u wani du. A taki: ‘Te we meke moiti fu bigin du den sani di u mu du winsi aa makiliki, we gi Yehofa a okasi fu belesi u.’​—Malik. 3:10.

13. San a den wini di yo fende te ye poti pikinpikin maiki?

¹³ Poti pikinpikin maiki. Kande i nai meke moiti fu doo a maiki dii poti, fu di a taanga tumisi. Efu a taanga gii fu doo a maiki fii, kande i sa poti pikinpikin maiki fosi. Kow taki ye meke moiti fu kon abi wan manii, kande i sa bigin soi a manii ya aini den pikinpikin sani di ye du. Efi ye meke moiti fu leisi a hii Beibel, da kande ya mu e leisi ipi tumisi. Tomáš di be e meke moiti fu leisi a hii Beibel taki: ‘A fasi fa mi be wani leisi Beibel be ipi gi mi tumisi. Neen meke mi taki, mio bigin baka. Ma a leisi ya, mi paati wan kapitel aini tu pisi. Ala dei mi e leisi wan pisi, da bakadati mi e teke ten pakisei san mi leisi. A sani ya meke a be e switi gi mi te mi be e leisi Beibel.’ Di a bigin switi gi Tomáš fu leisi, a bigin leisi moo ipi. Te fu kaba a leisi a hii Beibel.b

NÁ LASI-ATI EFU WAN SANI PASA DI E MEKE A MOO TAANGA GII FU DOO DEN MAIKI FII

14. San sa meke a taanga giw son yuu fu doo den maiki fu u?

¹⁴ Winsi fa we meke moiti fu doo den maiki fu u, toku son leisi sani e pasa di e meke a taanga giw fu doo den. Son yuu a ‘sani di wa poi si a fesi e miti u’. A sani ya e meke u lasi ten. A sa puu u pakisei na a maiki di u wani doo tu (Peleik. 9:11). Son leisi sani sa miti u tu di e meke u lasi-ati (Odo 24:10). Boiti dati, fu di wi abi sondu meke son yuu we du sani di e meke a taanga giw fu doo den maiki fu u (Rom. 7:23). Ma son leisi a weli we weli (Mat. 26:43). San o yeepi u fu doo den maiki fu u winsi aa makiliki?

15. Saide ya mu gi abaa efu wan sani de di e meke a moo taanga gii fu doo den maiki fii? (Psalm 145:14)

¹⁵ Winsi sani á waka enke fai be denki, toku i mu tan meke moiti fu doo a maiki fii. Beibel e soi taki sani o go e miti wi ala yuu. Ma ai soi u tu taki te wan sani pasa, u meke moiti baka, da Yehofa o yeepi u fu doo den maiki fu u. (Leisi Psalm 145:14.) Philip di u be taki fi en kaba e taki san yeepi en fu doo den maiki fi en. A taki: ‘Mi nai poti pakisei a den ten di mia be poi doo a maiki fu mi. Mi e poti pakisei a den ten di mi e meke moiti fu doo a maiki fu mi.’ David di u be taki fi en kaba taki: ‘Te sani e miti mi di meke a taanga gi mi fu doo den maiki fu mi, mi nai si en enke wan okasi fu tapu. Ma mi e si en enke wan okasi fu soi Yehofa taki mi lobi en.’ Te ye meke moiti fu doo den maiki fii, winsi aa makiliki, ye soi taki i wani Yehofa piisii. Ná pikin piisii Yehofa e piisii te ai si fa ye meke moiti fu doo den maiki fii.

16. Saw mu meke moiti fu fusutan te wa poi doo wan maiki?

¹⁶ Meke moiti fu si saide ya be man doo a maiki fii. Te ye luku saide ya be man doo a maiki fii, akisi iseefi taki: ‘San mi sa du fu a sani ya á pasa taa leisi moo?’ (Odo 27:12). Ma son yuu te ya poi doo wan maiki dii be poti, da a sani ya e soi taki i be wani du wan sani di ya be o poi du. Efii si taki i wani du wan sani ma ya poi du en, teke ten pakisei a maiki dii poti. Luku efu a wan koni sani fu meke moiti fu doo a maiki ya.c Yehofa naw si i wan fasi fu di ya be poi doo wan maiki dii poti.​—2 Kor. 8:12.

17. Saide u mu e poti pakisei a den maiki di u doo kaba?

¹⁷ Poti pakisei a den maiki dii doo kaba. Beibel taki: ‘Gadu e du sani a wan letifasi ala yuu. Neen meke a naw feegete a wooko di u du gi en’ (Heb. 6:10). Efu Gadu nai feegete sai du gi en, iseefi á mu feegete a sani ya tu. Pakisei den maiki dii doo kaba. Wantu fu den sani ya na a toon dii toon Yehofa mati. I meke moiti tei toon peleikiman, te fu kaba i dopu. Leti enke fai be man doo den maiki ya aini a ten di pasa, a letiso i poi doo den taa maiki dii poti.​—Filip. 3:16.

18. San ya mu feegete te ye meke moiti fu doo den maiki fii? (Luku a fowtow tu.)

¹⁸ Yehofa poi yeepi i fu doo den maiki fii leti enke fa wan sama di e tyai wan seiliboto e doo pe a mu doo. Ná pikin piisii ai piisii te a doo. Ma holi a pakisei tu taki te a sama de a pasi, ai piisii tu. A letiso i mu meke moiti fu si fa Yehofa e yeepi i tu te ye meke moiti fu doo wan maiki dii poti. A sani ya o yeepi i fu dini Yehofa anga piisii (2 Kor. 4:7). Efi ya gi abaa, yo fende moo gaan belesi aini a ten di e kon.​—Gal. 6:9.