‘U mu taampu gingin, wa mu buuya’

1-2. Saide u sa taki Kelesten de enke wan gaan hei osu? (1 Korentesama 15:58)

AINI 1970, sama be meke wan gaan hei osu a Tokyo, wan foto a Yapan. A osu ya be abi 60 sodoo. Fu di a doti be lobi seke aini a kondee ya, meke sama be e akisi denseefi fa a osu ya be o tan sondee fu aa kai. San sabiman du fu a sani ya á pasa? Den be meke a osu ya bun. Den á be meke en fu a de gingin a wan peesi. Efu a doti be e seke, a osu seefi be e engee tu. Kelesten de enke a osu ya. Saide u taki so?

² Kelesten mu de gingin, ma den mu poi engee tu. Te u mu holi den weiti fu Yehofa, da u mu de gingin. U mu e libi enke fa a wani tu. (Leisi 1 Korentesama 15:58.) U mu de ‘kabakaba fu aliki’. Boiti dati, wa mu meke sama koli u fu du ogii. Ma na a taase wa mu si enke a saw taki a dati mu pasa. Son yuu u mu de kabakaba fu fiti useefi (Yak. 3:17). Kelesten di e si sani a wan bun fasi, nai si enke den á poi du nawan sani. Ma den nai si enke den poi du ala sani tu. Aini a artikel ya, wo luku on ten u mu taampu gingin. Boiti dati, wo luku feifi sani di Saatan e koboloiki fu meke a taanga giw fu taampu gingin.

FAW SA TAAMPU GINGIN?

3. Sowtu weiti Yehofa meke sama sikiifi a Toli fu den apostel 15:28, 29?

³ Yehofa abi a leti fu poti weiti giw. Ai solugu taki den weiti fi en makiliki gi a foluku fi en fu fusutan (Yes. 33:22). Den baala di be e tii a wooko na a ten fu den fosi Kelesten, be taki fu dii fasi fa Kelesten mu taampu gingin: (1) U mu daai baka gi afokodeei, da u dini Yehofa wawan. (2) U mu lesipeki a weiti fu Yehofa di e soi taki buulu santa, anga (3) u mu wooko anga san Beibel e taki fu libi wan kiin libi. (Leisi Toli fu den apostel 15:28, 29.) Fa Kelesten aini a ten ya sa soi taki den e aliki Yehofa te a abi fu du anga den dii sani ya?

4. Faw sa soi taki a Yehofa wawan we dini? (Openbaring 4:11)

⁴ We daai baka gi afokodeei. We dini Yehofa wawan. Yehofa be taigi den Islayelisama taki neen wawan den mu dini (Deit. 5:6-10). Di Saatan be tesi Yesesi, a be soi kiin tu taki a Yehofa wawan u mu dini (Mat. 4:8-10). Neen meke u nai dini pobiki. U nai si keliki fesiman, politikiman, balinen sportman, pokuman, efuso sama di e pee aini wan felon enke gadu. We tan a Yehofa se. We dini a Sama di ‘meke ala sani’.​—Leisi Openbaring 4:11.

5. Saide we lesipeki a weiti fu Yehofa di e soi taki buulu anga a libi santa?

⁵ We lesipeki a weiti fu Yehofa di e soi taki libi anga buulu santa. Saide? Bika Yehofa taki buulu na a libi. A libi a wan kado di Yehofa giw (Lef. 17:14). A fosi leisi di Yehofa be taigi libisama taki den sa nyan meti, a be taigi den taki den á mu nyan buulu (Gen. 9:4). A be taigi den Islayelisama aseefi sani ya aini a Weiti fu Mosesi (Lef. 17:10). Boiti dati, a be meke den baala di be e tii a wooko na a ten fu den fosi Kelesten, taigi ala Kelesten taki den mu ‘tan faawe fu buulu’ (Toli 15:28, 29). We wooko anga den sani di sikiifi ya te we suku dataa yeepi.b

6. San we du fu man libi wan kiin libi?

⁶ We holi den weiti fu Yehofa di e soi taki u mu libi wan kiin libi (Heb. 13:4). A wan ageisi fasi apostel Pawlesi e giw taanga-sikin fu ‘kii’ den pisi fu u sikin. Dati wani taki u mu du ala saw man fu puu iniiwan sondu fii di wi abi. Wa mu luku efuso du sani di sa meke u libi wan hululibi tu (Kol. 3:5; Yopu 31:1). Te we fii fu du wan sani di á bun, da wantenwanten u mu puu iniiwan denki di sa poli wi anga Yehofa.

7. Saw mu de kabakaba fu du? Saide u mu du a sani ya?

⁷ Yehofa wani wi ‘aliki en anga u hii ati’ (Rom. 6:17). A soso wini we fende te we wooko anga den sani di ai taigi u. Wa poi kengi den weiti fi en tu (Yes. 48:17, 18; 1 Kor. 6:9, 10). U wani Yehofa piisii. Boiti dati, u wani denki enke a psalm sikiifiman di be taki: ‘Mi o holi den weiti fii anga mi hii ati. Mi o holi den mi hii libi langa, te enke mi dede’ (Ps. 119:112). Toku Saatan e du sani di e meke a taanga giw fu tan a Yehofa se. San a wantu fasi fa ai suku fu swaki u biibi?

FA SAATAN E MEKE MOITI FU MEKE A TAANGA GIW FU TAAMPU GINGIN?

8. San Saatan e meke sama du anga u fu meke a taanga giw fu taampu gingin?

⁸ Te sama e libi ogii anga u. Didibii e du ogii anga u. Ai du omen sani anga u fu meke wa taampu gingin moo. A wani ‘gwili u’, bika a sabi taki efu a du a sani ya, da wi anga Yehofa naw de mati moo (1 Peit. 5:8). Fu di den fosi Kelesten be taampu gingin, meke sama be e du sani anga den fu meke den feele. Den be e fon den tu. Boiti dati, den be e kii den (Toli 5:27, 28, 40; 7:54-60). A so Saatan e meke sama du ogii anga u tu. We si a sani ya kiin te we luku fa sama e libi ogii anga den baala anga sisa a Rosiyakondee anga omen taa kondee.

9. Gi wan toli di e soi saide u mu luku bun fu sama á koli u.

⁹ Ná meke sama koli i. A ná ogii namo Saatan e meke sama du anga u, ma ai meke den koli u tu (Efe. 6:11). Luku a toli fu wan baala den e kai Bob. A baala ya be de na ati-osu fu du wan gaan opalasi. A be taigi den dataa taki winsi saw pasa a naw teke buulu. A dataa di be o du a opalasi gi a baala ya be e lesipeki a bosoloiti fi en. Ma a neti fosi Bob du a opalasi, wan taa dataa be go luku en di den famii fi en gwe. A dataa ya taigi Bob taki den naw gi en buulu, ma den be o seeka a buulu poti de gi en efu a be o abi en fanowdu. Kande a dataa be denki taki Bob be o kengi pakisei fu di den famii fi en á be de ape. Ma Bob taampu gingin. A taigi den taki winsi saw pasa, den á mu gi en buulu.

10. Saide u mu luku bun fu wa denki enke den sama di nai dini Yehofa? (1 Korentesama 3:19, 20)

¹⁰ A fasi fa den sama di nai holi den weiti fu Yehofa e denki. Efu we si sani enke fa libisama e si den, a sani ya sa meke u daai baka gi Yehofa anga den weiti fi en. (Leisi 1 Korentesama 3:19, 20.) ‘A koni fu a goontapu’ ya e gi sama taanga-sikin fu du sani enke fa denseefi wani. Den nai aliki Gadu. Wantu Kelesten fu Pergamum anga Tiyatira be bigin denki enke den sama aini den foto ya di be e dini falisi gadu. Den be e libi wan hululibi tu. Yesesi be puu kaasi gi den tu kemeente ya, bika den be e si taki son sama be e libi wan hululibi, ma den á be e puu den aini a kemeente (Openb. 2:14, 20). Aini a ten ya, sama sa koli u fu teke den fowtu denki fu den. Den famii fu u anga sama di u sabi, sa meke u denki taki u sa pasa den weiti fu Yehofa. Den sa meke u si enke a sani de ná ogii so. Kande den o taigi i taki aa de fii libi wan kiin libi, bika a Beibel a ná fu a ten fu u ya moo.

11. Efu u wani taampu gingin, da san wa mu du?

¹¹ Kande son yuu wo si enke Yehofa nai taigi u kiin faw mu du sani. A sa pasa tu taki wo wani ‘du sani di á sikiifi aini den santa buku’ (1 Kor. 4:6). Na a fowtu ya den keliki fesiman fu a ten fu Yesesi be meke. Boiti taki den be abi a Weiti fu Gadu, denseefi be e meke pikinpikin weiti di be de enke wan hebi gi a foluku (Mat. 23:4). Yehofa e soi wi aini en Wowtu anga a olikanisâsi fi en faw mu du sani. Te Yehofa soi u faw mu du sani, aa de fanowdu fu poti pikinpikin weiti a tapu (Odo 3:5-7). Neen meke wa mu du sani di á sikiifi aini Beibel. Boiti dati, te Beibel nai taki kiin fu wan sani, wa mu meke weiti gi taawan.

12. Fa Saatan e paati ‘soso taki’?

¹² Soso taki. Saatan e koboloiki ‘soso taki’ anga ‘den sani di e tii goontapu’ fu koli sama. Ai koboloiki den sani ya tu fu meke sama á libi na a wan moo (Kol. 2:8). Aini a ten fu den apostel den Kelesten be mu luku bun anga den koniman di be e paati libisama denki. I be abi Dyu tu di be e leli sama sani di nai kai anga san Beibel taki. Boiti dati, i be abi sama di be e leli den Kelesten taki den mu holi a Weiti fu Mosesi ete. Den sani di den sama ya be e du be e koli sama fu den á poti pakisei a Yehofa, a Sama di koni komoto. Aini a ten ya, Saatan e koboloiki tv, laadiyow, anga internet fu paati falisi nyunsu. Politikiman e paati falisi nyunsu tu. A ten di a COVID-19 siki be paati a hii goontapu, a omen falisi nyunsu sama be e paati.c Den nyunsu ya e meke sama buuya. Ai meke den feele sosokaali tu. Ma Yehofa Kotoigi di e wooko anga den sani di a olikanisâsi fu Yehofa e taigi u, nai buuya te den yee den nyunsu ya.​—Mat. 24:45.

13. Saide u mu luku bun fu sani á puu u pakisei a den moo pelensipali sani?

¹³ Sani di e puu sama pakisei. Ala yuu u mu e poti pakisei ‘a den moo pelensipali sani’ (Filip. 1:9, 10). Efu we meke sani puu u pakisei, wo lasi gaanse fu u ten anga u kaakiti di u be sa koboloiki fu du den moo pelensipali sani. Ala dei we nyan, we diingi. We du sani fu piisii tu. Boiti dati, we wooko fu solugu useefi. Ma efu wa luku bun, den sani ya sa puu u pakisei a den moo pelensipali sani (Luk. 21:34, 35). Ala dei we yee nyunsu fu sama di e go a sitaati fu di sani nai go bun aini a kondee. We yee nyunsu tu fu politikiman di e sitee anga denseefi. Efu wa luku bun, u sa bigin teke se aini wi ati. Saatan e koboloiki ala den sani ya fu meke u biibi kon swaki. Meke u luku saw yeepi u fu Saatan á swaki u biibi.

SAW YEEPI U FU TAAMPU GINGIN?

14. San a wan sani di sa yeepi u fu tan a Yehofa se?

¹⁴ Pakisei saide i paamisi Yehofa taki yo libi enke fa a wani, neen i dopu. A fu dii be wani kon a Yehofa se meke i du den sani de. Pakisei san be yeepi i fu biibi taki i fende a tuu biibi. A sani di yeepi i, na a sutudeli dii sutudeli Beibel. I kon leli sabi Yehofa, neen meke i bigin lesipeki en. I kon lobi en enke i Dda a hemel. Dii biibi kon moo taanga, i meke moiti kengi a fasi fai be e libi. Ya be e du sani di Yehofa e buuse moo, ma i bigin du sani di e meke a piisii. Dii kon fusutan taki Gadu gii paadon, a sani ya meke i be e fii bun (Ps. 32:1, 2). I be bigin go a komakandaa. Boiti dati, i be e paati sai leli anga taawan tu. Enke wan dopu Kelesten, nownow ye waka na a pasi di e tyai sama go a teego libi. Ye du ala sai man tu fu tan na a pasi ya.​—Mat. 7:13, 14.

15. Sowtu wini we fende te we sutudeli a Wowtu fu Gadu anga te we teke ten pakisei saw leli?

¹⁵ Sutudeli a Wowtu fu Gadu, dai teke ten pakisei sai leli. Te den lutu fu wan bon beli, a nai kai makiliki. A letiso a Wowtu fu Gadu sa yeepi u fu taampu gingin. O moo wan bon e goo, o moo den lutu fi en e beli. Den e paati go na ala se tu. A so a de anga a sutudeli di we sutudeli tu. Te we sutudeli, u mu teke ten pakisei saw leli, da a sani ya o taanga u biibi. We kon si kiin taki a fasi fa Gadu wani u libi moo bun (Kol. 2:6, 7). Pakisei fa den weiti, anga den sani di Yehofa be e taigi a foluku fi en be e kibii den. Pakisei fa den sani ya be e yeepi den tu. Eseikiyeli be e luku bun di wan engel be e maiki on bigi a tempel di a be si aini a fisyun be de. A fisyun ya be gi Eseikiyeli taanga-sikin. Ai leli u tu taki u mu dini Yehofa enke fa a wanid (Eseik. 40:1-4; 43:10-12). Boiti dati, we fende wini te we teke ten pakisei den toli aini Beibel di moo taanga fu fusutan.

16. Fa a lobi di Bob be lobi Yehofa be yeepi en? (Psalm 112:7)

¹⁶ Lobi Yehofa anga i hii ati. Kownu David be taki a be o tan lobi Yehofa. Neen meke a be singi taki: ‘Mi Gadu, mio tan lobi yu anga mi hii ati’ (Ps. 57:7). Useefi sa lobi Yehofa anga u hii ati tu te we fitoow en. (Leisi Psalm 112:7.) Luku fa a sani ya be yeepi Bob di u be taki fi en kaba. Di den dataa be taigi en taki den be o seeka a buulu poti de fu den gi en te a be o abi en fanowdu, a taigi den taki efu den be o gi en buulu, da a be o saka komoto na a ati-osu wantenwanten. Bakaten Bob taki: ‘Winsi san be o pasa mia be o kengi mofu. Mia be e booko mi ede anga san be sa pasa te mia be o teke buulu.’

17. San a toli fu Bob e leli u? (Luku a fowtow tu.)

¹⁷ Bob á be e buuya, bika fosi a be go na ati-osu a be bosoloiti taki aw taampu gingin. A fosi sani, a taki a be wani Yehofa piisii. Du fu tu, a ondoosuku Beibel anga den buku fu a olikanisâsi finifini di e soi taki buulu anga a libi santa. Du fu dii, a be e biibi taki Yehofa be o belesi en efu a be aliki en. Useefi poi taampu gingin tu, winsi sowtu tesi e miti u.

18. Fa a toli fu Barak e leli u fu fitoow Yehofa? (Luku a fowtow a fesise fu A Wakititolen.)

¹⁸ Fitoow Yehofa. Luku fa sani be waka gi Barak di a be e fitoow Yehofa. A ten de den Islayelisama á be sabi feti. Den á be abi nawan feti sani tu. Toku Yehofa be sende Barak fu a go feti anga Sisera, a suudati edeman fu Kaana-an (Kuut. 5:8). A uman polofeiti Debora be taigi Barak fu a saka komoto a den mongo fu go miti Sisera anga den 900 asiwagi fi en. A feti ya á be o makiliki, bika a wan paata peesi den be o feti. Neen meke a be o makiliki gi den sama di be de anga fetiwagi fu wini a feti. Winsi fa Barak be sabi a sani ya, toku a du san Yehofa be taigi en. Di den suudati saka komoto a Tabor mongo, neen Yehofa meke wan gaan alen kai. A sani ya meke den asiwagi fu Sisera be e fasi aini a tokotoko. A so Yehofa meke Barak wini a feti (Kuut. 4:1-7, 10, 13-16). Efu useefi e fitoow Yehofa, neen we wooko anga san a olikanisâsi fi en e taigi u, aw meke u wini tu.​—Deit. 31:6.

DE KABAKABA FU TAAMPU GINGIN

19. Saide i wani taampu gingin?

¹⁹ Solanga u de aini goontapu fu Saatan ya, u mu tan meke moiti fu taampu gingin (1 Tim. 6:11, 12; 2 Peit. 3:17). Son yuu sama o libi ogii anga u. Kande den o suku fu koli u fu du sani di Yehofa á lobi. Boiti dati, son sama o wani u wooko anga libisama denki. Kande den o wani u biibi soso taki. Son yuu den o meke moiti fu puu u pakisei a den moo pelensipali sani. Te den sowtu tesi ya e miti u, u mu taampu gingin, wa mu buuya (Efe. 4:14). U mu tan dini Yehofa anga u hii ati. Boiti dati, u mu de kabakaba fu aliki en winsi sai pasa. Ma na a taase wa mu du sani pasa peesi. Aini a taa artikel, wo luku fa Yehofa anga Yesesi e fiti denseefi.