Baka di Adan anga Efa komoto aini a dyali fu Eden, den meke omen pikin. A fosi boi fu den Kain be lobi paandi goon, ma a taa boi fu den Abel be lobi kweki sikapu.

Wan dei Kain anga Abel tyai wan ofaandi gi Yehofa. I sabi san a wan ofaandi? Wan ofaandi a wan kado di ye gi Yehofa. Yehofa be lobi a ofaandi di Abel be tyai gi en, ma aa be lobi du fu Kain. A sani ya meke Kain ati boon. Yehofa taigi en taki efi en ati e tan boon neen baala, aw du sani di á bun. Ma Kain á be wani aliki.

Wan dei Kain taigi Abel taki: ‘Kow gwa goon.’ Di den wawan be de aini a goon, Kain naki en baala kii. San Yehofa be o du? Yehofa sitaafu Kain. A meke a go tan faawe fi en famii. Noiti moo a be mu daai kon baka.

Saw sa leli fu a toli ya? A kan taki wi ati e boon fu di sani nai go enke faw wani. Efu sama taigi i taki yu ati e boon naamo efuso yu ati e boon gaw, san yo du? I mu meke moiti fu yu ati nai boon moo. Bika efi yu ati e tan boon yo du sani di á bun.

Abel be lobi Yehofa, a be e du san a taki, neen meke Yehofa naw feegete en noiti. Te Yehofa o meke a goontapu ya toon wan paladeisi, aw meke Abel kon a libi baka.

Bakaten sama be kon lai a goontapu. Den be e du ogii. Wantu engel a hemel seefi be e du ogii tu. Den komoto a hemel neen den kon a goontapu. I sabi saide den du a sani ya? Den be teke libisama sikin neen den toow anga den uman a goontapu.

Den be meke manpikin anga den uman ya. Den pikin di den meke be bigi, den be taanga, den be e du ogii, den be e pina sama tu. Yehofa á be o fika a sani ya so. Neen meke a taki aw kii den ogii sama aini wan Fuudu.

Ma wan man be de di á be e du ogii. A be lobi Yehofa. En nen a Nowa. A be abi wan uman anga dii boi. Den nen fu den boi ya na: Sem, Kam anga Yafet. Ala den boi ya be abi den uman. Yehofa be taigi Nowa fu a meke wan ark, da te a Fuudu be o kon en anga en osufamii be o tan a libi. Wan ark a wan gaan kedee di poi tan a wataa tapu. Yehofa be taigi Nowa tu taki a mu tyai tyaipi meti go aini a ark, da te a Fuudu o kon den naw dede.

Nowa á daaidaai fu meke a ark. A wan sani fu 50 yali fosi Nowa anga en osufamii kaba meke a ark. Den meke a ark leti enke fa Yehofa be taigi den. A ten de Nowa be e taigi den sama taki wan Fuudu be o kon, ma nawan sama á be wani aliki en.

Ma now a yuu doo fu den go aini a ark. Kow go luku san pasa bakadati.