Matiyo ka kibaro diiman
24 Yezu bɔra Alabatosoba kɔnɔ n’a be tagara. A ka kalandenw gwɛrɛla a la ka Alabatosoba boonw yira a la. 2 A y’u jaabi ko: “Aw ɲɛɛ be boon nunu bɛɛ la kɛ? Tiɲɛn na, ne b’a fɔ aw ye ko u bɛɛ bena ben. Kabakuru si tɛna to ɲɔgɔn kan.”
3 Ka Yezu siginin to Olivuyirikulu kan, a ka kalandenw gwɛrɛla a la u dan na k’a ɲininga ko: “A fɔ an ye, o koow bena kɛ tuma juman le? Tagamasiɲɛ juman lo bena a yira ko i be yen, ani ko an be duniɲa* laban tuma na?”
4 Yezu y’u jaabi ko: “A’ y’aw yɛrɛ kɔrɔsi walisa mɔgɔ si kana aw lafili. 5 Sabu mɔgɔ caaman bena ne tɔgɔ la u yɛrɛ la k’a fɔ ko: ‘Ne lo ye Krista ye.’ U bena mɔgɔ caaman lafili. 6 Aw bena kɛlɛw koo mɛn ani ka kɛlɛw kibaro mɛn, nga aw kana siran sabu waajibi lo o koow ka kɛ. Nga, o tɛ duniɲa laban ye fɔlɔ.
7 “Siya dɔ bena wuli siya wɛrɛ kama, ani masaya dɔ bena wuli masaya wɛrɛ kama, kɔngɔba ni dugukolo yɛrɛyɛrɛw bena kɛ yɔrɔ ni yɔrɔw la. 8 O koow bɛɛ bena kɛ tɔɔrɔbaw* daminɛ lo ye.
9 “O la, mɔgɔw bena aw tɔɔrɔ ani k’aw faga. Siyaw bɛɛ bena aw kɔniya ne tɔgɔ kosɔn. 10 O koow ben’a kɛ mɔgɔ caaman be lanaya sira bila.* U bena ɲɔgɔn janfa ani ka ɲɔgɔn kɔniya. 11 Ngalon kira caaman bena wuli ani u bena mɔgɔ caaman lafili. 12 Kojugukɛ bena caya minkɛ, mɔgɔ caaman ka kanuya bena sumaya. 13 Nga mɔgɔ min muɲuna fɔɔ ka taga se laban na, ale lo bena kisi. 14 Masaya kibaro diiman bena fɔ duniɲa kuru bɛɛ la, ka kɛ seereya ye siyamɔgɔw bɛɛ fɛ. O kɔ, duniɲa laban bena se.
15 “O kama, kira Daniyɛli tun ye fɛɛn haramunin min kofɔ o min be tiɲɛni kɛ, n’aw y’o ye yɔrɔ senuman na tuma min na (min be kuma nin kalan, o tigi k’a ɲini k’a faamu), 16 minw be Zude, u k’a daminɛ ka boli ka taga kuluyɔrɔw la. 17 Mɔgɔ min b’a ka boon sanfɛ, a kana jigi ka minanw ta boon kɔnɔ, 18 ani mɔgɔ min be foro kɔnɔ, a kana kɔsegi ka taga a ka dereke ta. 19 O loonw na, muso minw kɔnɔman lo ani minw be siin dira deen ma, bɔnɛ ye olu ta ye! 20 A’ ye to ka delili kɛ walisa aw bolituma kana kɛɲɛ nɛnɛba wagati ma wala lafiɲɛlon ma. 21 Katuguni, tɔɔrɔba dɔ bena kɛ min ɲɔgɔn ma deli ka kɛ kabi duniɲa dantuma fɔɔ ka na se sisan ma, ani o ɲɔgɔn tɛna kɛ tugun abada. 22 Tiɲɛn na, ni dɔ tun ma bɔ o loonw hakɛ la, mɔgɔ si tun tɛna kisi. Nga mɔgɔ wolomaninw kosɔn, dɔ bena bɔ u hakɛ la.
23 “Ayiwa, ni mɔgɔ dɔ y’a fɔ aw ye ko: ‘A filɛ! Krista be yan’ wala ‘a be yanfɛ,’ aw kana la o tigi la. 24 Sabu mɔgɔ dɔw bena wuli ka ngalon tigɛ k’olu ye Krista wala kiraw ye, u bena kabakow ni kobabaw kɛ walisa ka mɔgɔw lafili. U ben’a ɲini fana ka mɔgɔ wolomaninw yɛrɛ lafili. 25 A filɛ! Ne kɔnna k’aw lasɔmi. 26 Ni mɔgɔ dɔ y’a fɔ aw ye ko: ‘A filɛ! A be kongokolon kɔnɔ,’ aw kana taga yen. Wala, ‘a filɛ! A be sokɔnɔɲa na,’ aw kana la a la. 27 Sabu wagati min na mɔgɔ Dencɛ bena kɛ yen, o bena kɛ i n’a fɔ saan be manamana kɔrɔn fɛ ani ka ye fɔɔ tileben fɛ cogo min na. 28 Sogosu mana kɛ yɔrɔ o yɔrɔ, dugaw be ɲɔgɔn lajɛn yen.
29 “O loonw tɔɔrɔ tɛmɛnin kɔ dɔrɔn, tile bena dibi ani kalo tɛna yeelen bɔ tugun. Lolow bena bɔ sankolo la ka ben ani sankolo fangaw bena yɛrɛyɛrɛ. 30 O kɔ, mɔgɔ Dencɛ tagamasiɲɛ bena bɔ sankolo la. Dugukolokan siyaw bɛɛ bena u disi gosi dusukasi bolo ani u bena mɔgɔ Dencɛ natɔ ye sankabaw kan ni sebagaya ani nɔɔrɔba ye. 31 A bena a ka mɛlɛkɛw ci ni buru fiyɛkanba ye. U bena taga mɔgɔ wolomaninw lajɛn duniɲa faan naani* bɛɛ la, k’a ta sankolo faan dɔ la ka taga a bila faan wɛrɛ la.
32 “A’ ye torosun cogo kɔrɔsi ani ka kalan sɔrɔ o la. N’a bolow nugura tuma min na k’a daminɛ ka furaburuw bɔ, aw b’a lɔn ko samiɲa surunyana. 33 O cogo kelen na, n’aw ye o koow bɛɛ ye tuma min na, aw k’a lɔn ko mɔgɔ Dencɛ surunyana, a be daa la yɛrɛ. 34 Tiɲɛn na, ne b’a fɔ aw ye ko wagati nin mɔgɔw bɛɛ tɛna sa ni o koow bɛɛ ma kɛ. 35 Sankolo ni dugukolo bena tɛmɛ, nga ne ka kumaw tɛna tɛmɛ abada.
36 “Mɔgɔ si t’o loon n’o wagati lɔn. Sankolola mɛlɛkɛw t’o lɔn, Dencɛ fana t’o lɔn, fɔɔ Faa kelenpe. 37 Mɔgɔ Dencɛ bena kɛ yen tuma min na, koow bena kɛ i n’a fɔ Nuhun ka wagati la. 38 Ka kɔn sanjiba ɲɛ, mɔgɔw tun be dumuni kɛ, ka minni kɛ, cɛɛw tun be musow furu ani musow tun be di cɛɛw ma furu la, fɔɔ loon min na Nuhun donna kurun kɔnɔ. 39 U m’u janto, fɔɔ sanjiba nana u bɛɛ halaki. O lo bena kɛ fana tuma min na mɔgɔ Dencɛ bena kɛ yen. 40 O wagati la, ka cɛɛ fila to foro la, u bena kelen ta ka tɔkelen to yen. 41 Ka muso fila to sinni na wugu kan, u bena kelen ta ka tɔkelen to yen. 42 O la, a’ ye to ɲɛɛ na sabu aw tɛ aw Matigi nalon lɔn.
43 “Aw k’a lɔn ko ni sotigi tun b’a lɔn soon bena na sufɛ wagati min na, a tun bena to ɲɛɛ na ani a tun tɛna a to soon b’a ka daa kari ka don. 44 O kama, aw fana labɛnnin ka to sabu aw tɛ miirila wagati min na, mɔgɔ Dencɛ bena na o wagati lo la.
45 “Jɔn lo ye jɔncɛ kantigiman hakiliman ye, min Matigi y’a sigi a ka baaradenw kun na walisa a k’u ka dumuni di u ma a wagati la? 46 O jɔncɛ dagamunin lo n’a matigi kɔsegira ka na a sɔrɔ o baara la! 47 Tiɲɛn na, ne b’a fɔ aw ye ko a matigi bena a sigi a bololafɛnw bɛɛ kun na.
48 “Nga n’o jɔncɛ ka jugu ani a y’a fɔ a yɛrɛ kɔnɔ ko: ‘N’ matigi mɛnna dɛ!’ 49 N’a y’a daminɛ k’a tɔɲɔgɔnw bugɔ ani ka dumuni ni minni kɛ ni dɔrɔtɔw ye, 50 o jɔncɛ tɛ miirila loon min na ani a tɛ lɛri min lɔn, a matigi bena na o wagati yɛrɛ lo la. 51 A matigi bena a ɲangi kosɔbɛ ani k’a bila ni filankafow ye. A bena kasi ani k’a ɲiin ɲimi yen.