Matiyo ka kibaro diiman
17 Tile wɔɔrɔ o kɔ, Yezu tagara ni Piyɛri, Zaki n’a balimacɛ Zan ye kulu jamanjan dɔ kan, u dan na. 2 Yezu cogoya yɛlɛmana u ɲɛɛ na. A ɲɛda tun be manamanana i n’a fɔ tile ani a ka faniw gwɛra parapara.* 3 O yɔrɔnin bɛɛ, kalandenw ye Musa ni Eli ye u be baro kɛra n’a ye. 4 O la, Piyɛri y’a fɔ Yezu ye ko: “Matigi, an be yan minkɛ o ye koo ɲuman lo ye. N’i b’a fɛ n’ bena fanibugu saba siri, ele ta kelen, Musa ta kelen ani Eli ta kelen.” 5 K’a to kuma na, a filɛ, sankaba manamananin dɔ jigira k’u datugu. Kumakan dɔ bɔra o sankaba kɔnɔ ko: “Nin ye ne Dencɛ lo ye, ne Dencɛ kanulen, min koo ka di ne ye haali. A’ ye mɛnni kɛ a fɛ.” 6 Kalandenw y’o mɛn tuma min na, u siranna kosɔbɛ, u y’u kunbiri gwan ani k’u ɲɛɛ biri duguma. 7 O la, Yezu gwɛrɛla ka maga u la ani k’a fɔ u ye ko: “A’ ye wuli. Aw kana siran.” 8 U y’u ɲɛɛ kɔrɔta tuma nin na, u ma mɔgɔ si ye Yezu kɔ. 9 U tun be jigira ka bɔ kulu kan tuma min na, Yezu y’a fɔ u ye ko: “Aw ye min ye, aw kana o fɔ mɔgɔ si ye, fɔɔ tuma min na mɔgɔ Dencɛ suu bena kunu.”
10 A ka kalandenw y’a ɲininga ko: “Mun na Sariya karamɔgɔw b’a fɔ ko Eli ka ɲi ka na fɔlɔ.” 11 A y’u jaabi ko: “Tiɲɛn lo, Eli bena na ani a bena koow bɛɛ segi u nɔɔ na. 12 Ayiwa, ne b’a fɔ aw ye ko Eli yɛrɛ nana ka ban, nga u m’a lɔn ko ale lo ani u y’u sago kɛ a la. O cogo kelen na, mɔgɔ Dencɛ fana bena tɔɔrɔ u bolo.” 13 O la, a ka kalandenw y’a faamu ko a tun kaan be Zan Batizelikɛla lo ma.
14 U sera jama yɔrɔ tuma min na, cɛɛ dɔ gwɛrɛla Yezu la k’a kunbiri gwan ani k’a fɔ ko: 15 “Matigi, makari n’ dencɛ la. Kirikirimasiɲɛ b’a la ani o b’a tɔɔrɔla yɛrɛ le. Tuma dɔw la a be ben tasuma kɔnɔ ani tuma dɔw la a be ben jii kɔnɔ. 16 N’ tagara n’a ye i ka kalandenw fɛ, nga u ma se k’a kɛnɛya.” 17 O la, Yezu y’a fɔ u ye ko: “Aw bi mɔgɔ juguw ani lanabali nunu, ne bena to n’aw ye fɔɔ tuma juman? Ne bena muɲu aw kɔrɔ fɔɔ tuma juman? A’ ye na ni deen nin ye yan.” 18 Yezu sɔngɔra jina nin kun na ani a bɔra o deen na. O yɔrɔnin bɛɛ, deen kɛnɛyara. 19 O kɔ, kalandenw gwɛrɛla Yezu la u dan na k’a ɲininga ko: “Mun na an ma se k’o jina gwɛn do?” 20 A y’u jaabi ko: “Sabu aw ka limaniya barika ka dɔgɔ. Tiɲɛn na, ne b’a fɔ aw ye ko n’aw ka limaniya ka bon i n’a fɔ mutaridikisɛ, aw ben’a fɔ kulu nin ye ko ‘wuli ka bɔ yan ka taga yanfɛ’ ani o bena kɛ. Fɛɛn si tɛ yen aw tɛna se ka min kɛ.” 21 ——
22 Yezu n’a ka kalandenw tun be ɲɔgɔn fɛ Galile tuma min na, a y’a fɔ u ye ko: “Mɔgɔ Dencɛ bena don a juguw bolo. 23 U bena a faga ani tile sabanan loon a suu bena kunu.” O kumaw ye a ka kalandenw dusu kasi kosɔbɛ.
24 Yezu n’a ka kalandenw sera Kapɛrinawum tuma min na, cɛɛ minw be Alabatosoba lanpo* minɛ, olu gwɛrɛla Piyɛri la k’a ɲininga ko: “Yala aw ka karamɔgɔ be Alabatosoba lanpo sara wa?” 25 A y’u jaabi ko: “Ɔnhɔn.” Nga Piyɛri donna soo kɔnɔ dɔrɔn, Yezu sinna k’a ɲininga ko: “Simɔn, e ka miiriya ye juman ye koo nin na? Duniɲa faamanw be lanpo wala wusuru minɛ jɔn lo fɛ? U dencɛw fɛ wa, wala mɔgɔ wɛrɛw fɛ?” 26 Piyɛri y’a jaabi ko: “Mɔgɔ wɛrɛw fɛ.” Yezu y’a fɔ a ye ko: “O kɔrɔ ko u dencɛw tɛ lanpo sara. 27 Nga walisa an kana u kunnatiɲɛ, taga i ka dulen fili baji la. I bena jɛgɛ fɔlɔ min minɛ, a daa yɛlɛ, i bena wari sikle kelen* min sɔrɔ a kɔnɔ, o ta ka taga ne n’ele ka lanpo sara n’o ye.”