Matiyo ka kibaro diiman

21 Tuma min na u sera Olivuyirikulu kan, Zeruzalɛmu ani Bɛtifaze gɛrɛfɛ, Yezu y’a ka kalanden fila ci k’a fɔ u ye ko: 2 “Dugu min be ɲɛfɛ, a’ ye taga yen. Aw dontɔ dɔrɔn, aw bena falimuso sirinin ye ani faliden b’a gɛrɛfɛ. A’ y’u foni ka na n’u ye. 3 Ni mɔgɔ dɔ kumana aw fɛ, a’ y’a fɔ ko ‘Matigi lo mako b’u la.’ O yɔrɔnin bɛɛ, o tigi ben’a to aw be na n’u ye.”

4 A kɛra ten walisa kira tun ye min fɔ, o ka dafa. A tun ko: 5 “A fɔ Siyɔn denmuso ye ko: ‘A filɛ, i ka masacɛ be nana i fɛ. A sabarinin lo ani a yɛlɛla fali kan. Ɔnhɔn, a siginin lo faliden kan.’”

6 O la, Yezu ka kalandenw tagara ani u y’a kɛ i ko Yezu y’a fɔ u ye cogo min na. 7 U nana ni falimuso n’a deen ye ani u y’u ka faniw la la u kan. O kɔ, Yezu yɛlɛla ka sigi faliden kan. 8 Mɔgɔw fanba tora k’u ka faniw la la sira kan. U dɔw tora ka yiribolow tigɛ tigɛ ani k’u la la sira kan fana. 9 Ka fara o kan, minw tun be tagamana a ɲɛfɛ ani minw tun b’a kɔfɛ, u bɛɛ tora ka pɛrɛn ko: “Ala, an b’i deli, Dawuda Dencɛ kisi! Tigi min be nana Jehova tɔgɔ la, o tigi ye dubaden ye! Ele min be sankolo la, an b’i deli i k’a kisi!”

10 A donna Zeruzalɛmu tuma min na, dugu bɛɛ ɲagamina. Mɔgɔw tun be ɲɔgɔn ɲiningara ko: “Nin ye jɔn lo ye?” 11 Jama tun b’a fɔra ko: “Kira Yezu lo, ka bɔ Nazarɛti, Galile mara la!”

12 Yezu donna Alabatosoba kɔnɔ ani minw bɛɛ tun be feereli wala sanni kɛra, a y’u bɛɛ gwɛn ka bɔ yen. A ye warifalenbagaw ka tabaliw ni tuganin feerebagaw ka sigilanw ɲɔnti k’u ben ben. 13 A y’a fɔ u ye ko: “A sɛbɛnin be ko ‘ne ka soo bena weele ko delili kɛyɔrɔ,’ nga aw y’a kɛ soonw ka dogoyɔrɔ ye.” 14 O kɔ, fiyentɔw ni senkelenninw nana a fɛ Alabatosoba kɔnɔ, ani a y’u kɛnɛya.

15 Tuma min na sarakalasebagaw kuntigiw ni sariya karamɔgɔw y’a ye Yezu be kabako minw kɛra ani ko cɛdenw be pɛrɛnna Alabatosoba kɔnɔ ko “Ala, an b’i deli, Dawuda Dencɛ kisi!”, u dusu gwanna. 16 O kama u y’a fɔ a ye ko: “U be min fɔra, i t’o mɛnna wa?” Yezu y’u jaabi ko: “Ɔnhɔn, aw ma deli ka nin kalan ka ye wa: ‘I y’a to tandoli kumaw bɔra denmisɛnw ni denɲɛninw daa la’?” 17 O kɔ, a tagara k’u to yen. A bɔra dugu kɔnɔ ka taga si Betani.

18 O loon dugusagwɛ sɔgɔma joona, a tun be kɔsegira dugu kɔnɔ tuma min na, kɔngɔ y’a minɛ. 19 A ye torosun dɔ ye sirada la. A gwɛrɛla a la, nga a ye furaburu dɔrɔn lo sɔrɔ a kan. A y’a fɔ torosun ye ko: “I tɛna deen kɛ tugun abada!” O yɔrɔnin bɛɛ, o torosun jara. 20 Kalandenw y’o ye tuma min na, u kabakoyara ani k’a fɔ ko: “A kɛra di torosun nin jara ten yɔrɔnin kelen?” 21 Yezu y’u jaabi ko: “Tiɲɛn na, ne b’a fɔ aw ye ko ni aw limaniyanin lo ani aw tɛ sigasiga, ne ye min kɛ torosun nin na, aw tɛna dan o ma. Hali n’aw y’a fɔ kulu nin ye ko ‘wuli ka taga ben kɔgɔji kɔnɔ,’ o bena kɛ. 22 N’aw limaniyanin lo, aw mana fɛɛn o fɛɛn deli Ala fɛ, aw bena o sɔrɔ.”

23 A donnin kɔ Alabatosoba kɔnɔ, sarakalasebagaw kuntigiw ni cɛkɔrɔbaw gwɛrɛla a la k’a sɔrɔ a tun be mɔgɔw kalanna, ani u y’a ɲininga ko: “I be koo nunu kɛra ni setigiya juman lo ye? Jɔn lo y’o setigiya d’i ma?” 24 Yezu y’u jaabi ko: “Ne fana bena aw ɲininga koo kelen na. N’aw ye n’ jaabi, ne fana ben’a fɔ aw ye n’ b’o koow kɛra ni setigiya min ye. 25 Jɔn lo tun ye Zan ci ko a ka na mɔgɔw batize? Ala* lo wa, wala mɔgɔw lo?” U y’a fɔ ɲɔgɔn ye ko: “N’an y’a jaabi ko: ‘Ala* lo,’ a ben’a fɔ ko ‘n’o lo mun na aw ma la a la?’ 26 Nga, n’an y’a fɔ ko mɔgɔw lo, an ka ɲi ka siran jama ɲɛ sabu u bɛɛ be Zan jati kira lo ye.” 27 O la, u ye Yezu jaabi ko: “An m’a lɔn.” Ayiwa, Yezu y’a fɔ u ye ko: “Ne fana tɛn’a fɔ aw ye n b’o koow kɛra ni setigiya min ye.

28 “Aw be mun lo miiri nin koo la? Deen fila tun be cɛɛ dɔ fɛ. A tagar’a fɔ fɔlɔ ye ko: ‘N’ deen, taga baara kɛ n’ ka ɛrɛzɛnforo la bi.’ 29 O deen y’a jaabi ko: ‘N’ tɛna taga.’ Nga kɔfɛ, a nimisara ani a tagara. 30 O cɛɛ tagara o koo kelen nin fɔ a deen filanan ye. Ale y’a fɔ a faa ye ko: ‘Ɔnhɔn baba, n’ bena taga.’ Nga a ma taga. 31 O deen fila nunu na, jɔn lo y’a faa sago kɛ?” U y’a jaabi ko: “Deen fɔlɔ nin lo.” Yezu y’u jaabi ko: “Tiɲɛn na, ne b’a fɔ aw ye ko lanpominɛlaw ni jatɔw bena kɔn aw ɲɛ Ala ka Masaya kɔnɔ. 32 Sabu Zan nan’a yira aw la tilenninya ye min ye, nga aw ma la a la, k’a sɔrɔ lanpominɛlaw ni jatɔw lara a la. Aw y’o ye, nga aw ma nimisa ka la a la.

33 “Talen wɛrɛ filɛ nin ye: Cɛɛ dɔ tun be ni foro ye. A ye ɛrɛzɛn tutu a kɔnɔ ani ka kogo lɔ k’a lamini. A ye ɛrɛzɛnji bɔyɔrɔ fana dilan a kɔnɔ ani ka sangaso dɔ lɔ yen. O kɔ, a y’o ɛrɛzɛnforo kalifa sɛnɛkɛla dɔw ma ani ka taga dugu la. 34 Ɛrɛzɛn tigɛtuma na, a y’a ka jɔɔnw ci o sɛnɛkɛlaw fɛ k’u ka taga ale ninyɔrɔ minɛ. 35 Nga sɛnɛkɛlaw y’o jɔɔnw minɛ, ka kelen bugɔ kosɔbɛ, ka kelen faga ani ka kelen bon ni kabakuruw ye. 36 Forotigi ye jɔɔn wɛrɛw ci minw tun ka ca ni fɔlɔ taw ye, nga sɛnɛkɛlaw y’o ɲɔgɔn lo kɛ u la. 37 A laban, a y’a dencɛ ci. A tun b’a fɔra a yɛrɛ kɔnɔ ko: ‘U bena n’ dencɛ bonya.’ 38 Sɛnɛkɛlaw y’a dencɛ ye tuma min na, u y’a fɔ ɲɔgɔn ye ko: ‘Cɛntala ye nin ye. A’ ye na an k’a faga k’a ka cɛɛn ta!’ 39 O la, u y’a minɛ ka bɔ n’a ye foro kɔnɔ k’a faga. 40 Ayiwa, ni forotigi nana, a bena mun lo kɛ sɛnɛkɛlaw la do?” 41 Sarakalasebagaw kuntigiw ni cɛkɔrɔbaw y’a jaabi ko: “A bena u faga* u ka juguya kosɔn ani a bena a ka foro kalifa mɔgɔ wɛrɛw ma, minw bena a ninyɔrɔ d’a ma ɛrɛzɛn tigɛtuma na.”

42 Yezu y’a fɔ u ye ko: “A fɔra Ala ka Kuma kɔnɔ ko ‘bonlɔlaw banna kabakuru min na, o lo kɛra boon nɔnkɔn kabakuru barikaman ye. O koo bɔra Jehova lo fɛ ani o ye kabako ye an ɲɛɛ na.’ Aw ma deli k’o kalan wa? 43 O kama, ne b’a fɔ aw ye ko Ala ka Masaya bena bɔsi aw la ani ka di siya wɛrɛw ma minw bena a deenw kɛ. 44 Ka fara o kan, ni mɔgɔ min benna o kabakuru kan, o tigi bena kari kari ani n’o kabakuru benna mɔgɔ min kan, o tigi bena ɲɔɲɔ.”

45 Sarakalasebagaw kuntigiw ni Fariziɲɛw y’o talenw mɛn tuma min na, u y’a faamu ko Yezu tun kaan b’olu lo ma. 46 U tun be fɛɛrɛ ɲinina k’a minɛ, nga u tun be siranna jama ɲɛ sabu olu tun b’a jati kira ye.