Matiyo ka kibaro diiman

23 O kɔ, Yezu kumana jama n’a ka kalandenw fɛ ko: 2 “Sariya karamɔgɔw ni Fariziɲɛw sigira Musa ka sigiyɔrɔ la. 3 O kama, u be min bɛɛ fɔra aw ye, aw k’o kɛ. Nga, aw kana u ladegi sabu u be min fɔ, u t’o lo kɛ. 4 U be doni gwilimanw siri k’u la mɔgɔw kan, k’a sɔrɔ olu yɛrɛ t’a fɛ ka maga o la n’u bolokunnanden ye. 5 U be min bɛɛ kɛ, u b’o kɛ walisa k’u yɛrɛ yira le. O lo y’a to u be sɛbɛw kɛ belebelebaba k’u siri u teen n’u bolow la sabu u b’a miiri k’o lo bena u latanga. U be masirifɛn janjanw kɛ u ka faniw dakun na fana. 6 Ɲɛnagwɛ dumuni kɛyɔrɔw la, a ka di u ye ka sigi mɔgɔbabaw sigiyɔrɔ la ani kalansow kɔnɔ, a ka di u ye ka sigi ɲɛfɛ.* 7 A ka di u ye fana mɔgɔw ka to k’u fo lɔgɔfiyɛw la ani k’u weele karamɔgɔ. 8 Nga aw kɔni, aw kana sɔn mɔgɔw k’aw weele karamɔgɔ sabu karamɔgɔ kelen lo b’aw fɛ, aw bɛɛ ye balimaw lo ye. 9 Ka fara o kan, aw kana mɔgɔ si weele dugukolo kan ko aw faa, sabu Faa kelen dɔrɔn lo b’aw fɛ, o min be sankolo la. 10 Aw kana sɔn fana mɔgɔ si k’aw weele kuntigi, sabu kuntigi kelen dɔrɔn lo b’aw fɛ, o min ye Krista ye. 11 Nga, mɔgɔ min ye mɔgɔba ye aw cɛma, a ka kan ka kɛ aw ka baaraden ye. 12 Mɔgɔ o mɔgɔ b’a yɛrɛ kɔrɔta, Ala bena o tigi majigi. Nga mɔgɔ o mɔgɔ b’a yɛrɛ majigi, Ala bena o tigi kɔrɔta.

13 “Bɔnɛ ye aw ta ye, Sariya karamɔgɔw ni Fariziɲɛw, filankafo nunu! Sabu aw be sankolo Masaya donda tugu. Aw yɛrɛ tɛ don, minw b’a fɛ ka don fana aw b’olu bali. 14 ——

15 “Bɔnɛ ye aw ta ye, Sariya karamɔgɔw ni Fariziɲɛw, filankafo nunu! Sabu aw be kɔgɔji ni dugukolo bɛɛ munumunu walisa ka mɔgɔ kelen sɔrɔ k’a tuubi. Nga aw mana a sɔrɔ, aw b’a kɛ mɔgɔ ye min ka kan ka fili Inɔmu kɔkɛnɛ na siɲɛ fila ka tɛmɛ aw yɛrɛ kan.

16 “Bɔnɛ ye aw ta ye, ɲɛminɛbaga fiyentɔ nunu! Sabu aw b’a fɔ ko ‘ni mɔgɔ kalila ni Alabatosoba ye, o tɛ jati. Nga ni mɔgɔ kalila ni Alabatosoba ka sanu ye, a ka kan k’a ka dajuru sara.’ 17 Hakilintanw ani fiyentɔ nunu! Juman lo kɔrɔtanin lo ka tɛmɛ? Sanu wa, wala Alabatosoba min b’o sanu kɛ fɛɛn senuman ye? 18 Aw b’a fɔ fana ko ‘ni mɔgɔ kalila ni sarakabɔlan ye, o tɛ jati. Nga saraka min be sarakabɔlan kan, ni mɔgɔ kalila n’o ye, a ka kan k’a ka dajuru sara.’ 19 Fiyentɔ nunu! Juman lo kɔrɔtanin lo ka tɛmɛ? Saraka wa, wala sarakabɔlan min b’o saraka kɛ fɛɛn senuman ye? 20 O la, n’i kalila ni sarakabɔlan ye, fɛɛn minw bɛɛ b’a kan, i kalila n’olu fana ye. 21 N’i kalila ni Alabatosoba ye, i kalila n’a Tigi ye fana. 22 N’i kalila ni sankolo ye, i kalila ni Ala sigiyɔrɔ ani Ala yɛrɛ lo ye.

23 “Bɔnɛ ye aw ta ye, Sariya karamɔgɔw ni Fariziɲɛw, filankafo nunu! Sabu aw be nanaye, anɛti ani kumɛn jaka bɔ, nga aw t’aw janto Sariya koo jɔnjɔnw na i n’a fɔ tilenninya, makari ani kantigiya. Aw tun ka kan ka olu lo kɛ fɔlɔ ka sɔrɔ ka tɔɔ nunu fara o kan. 24 Ɲɛminɛbaga fiyentɔ nunu! Aw b’aw ka minnifɛn sɛnsɛn ka limɔgɔ misɛnw bɔ a la, nga aw be ɲɔgɔmɛ kunu!

25 “Bɔnɛ ye aw ta ye, Sariya karamɔgɔw ni Fariziɲɛw, filankafo nunu! Sabu aw be i ko jifilenw ni tasa minw kɔɔ saniyanin lo, nga u kɔnɔ nɔgɔnin lo. Aw kɔnɔ fanin lo ni wasabaliya* ni nege juguw ye. 26 Fariziɲɛ fiyentɔ nin, kɔn ka jifilen ni tasa kɔnɔ ko fɔlɔ walisa u kɔɔ ka saniya.

27 “Bɔnɛ ye aw ta ye, Sariya karamɔgɔw ni Fariziɲɛw, filankafo nunu! Sabu aw be i n’a fɔ kaburuw, u ye minw kɛnɛmala mɔ ka gwɛya, k’a sɔrɔ u kɔnɔw fanin lo ni kolow ni fɛɛn nɔgɔnin sifa bɛɛ ye. 28 O cogo kelen na, aw bɔnin lo mɔgɔ tilenninw ma. Nga, aw kɔnɔ fanin lo ni filankafoya ni juguya ye.

29 “Bɔnɛ ye aw ta ye, Sariya karamɔgɔw ni Fariziɲɛw, filankafo nunu! Sabu aw be kiraw ka kaburuw lɔ ani ka mɔgɔ tilenninw ka kaburuw lalaga k’u cɛɲumanya. 30 Aw b’a fɔ fana ko: ‘N’an tun be an faaw ka wagati la, an tun tɛna fara u kan ka kiraw faga.’ 31 O la, aw yɛrɛ lo b’a yirala ko minw ye kiraw faga, aw ye olu dencɛw ye. 32 Ayiwa, aw faaw ye baara min daminɛ, a’ y’o tɔɔ laban.

33 “Saa nunu, fɔnfɔnnindenw, aw be se k’aw yɛrɛ tanga cogo di Inɔmu kɔkɛnɛ ma? 34 O kama, n’ be kiraw, hakilitigiw ani karamɔgɔw ci aw ma. Nga aw bena dɔw faga k’u siri lɔgɔ kan, ka dɔw bugɔ ni golokami ye aw ka kalansow kɔnɔ ani k’u tɔɔrɔ dugu ni duguw la. 35 O kama, mɔgɔ tilennin minw bɛɛ joli bɔnna dugukolo kan, o jalaki ka ben aw kan, k’a ta mɔgɔ tilennin Abɛli joli ma fɔɔ ka taga se Zakari dencɛ Barakiya ta ma, aw y’o min faga yɔrɔ senuman ni sarakabɔlan cɛ. 36 Tiɲɛn na, ne b’a fɔ aw ye ko o koow bɛɛ hakɛ bena ben aw bi mɔgɔw kan.

37 “Zeruzalɛmu, Zeruzalɛmu, dugu min be kiraw faga ani mɔgɔ minw cira a ma, a b’olu bon ni kabakuruw ye. Siɲɛ joli bɛɛ ne y’a ɲini k’i deenw lajɛn i n’a fɔ sisɛ b’a deenw lajɛn a gamanw kɔrɔ cogo min na! Nga, aw ma sɔn. 38 A filɛ! Aw ka soo lakolon bena to aw ye. 39 Sabu ne b’a fɔ aw ye ko k’a ta sisan ma, aw tɛna ne ye tugun fɔɔ tuma min na aw bena a fɔ ko ‘tigi min be nana Jehova tɔgɔ la, o tigi ye dubaden ye!’”