Matiyo ka kibaro diiman

6 “A’ y’aw yɛrɛ kɔrɔsi, aw kana koo ɲuman* kɛ mɔgɔw ɲɛɛ na walisa k’aw yɛrɛ yira. N’o tɛ, aw tɛna baraji sɔrɔ aw sankolola Faa fɛ. 2 N’i be fantanw sɔnna, kana o wangola* i n’a fɔ filankafow b’a kɛ cogo min na kalansow ni siradaw la walisa mɔgɔw k’u tando. Tiɲɛn na, ne b’a fɔ aw ye k’o lo bena kɛ u ka sara ye. 3 Nga ele kɔni, n’i be fantanw sɔnna, i kinibolo be min kɛra, kan’a to i numanbolo ka bɔ o kala ma. 4 Fantanw sɔn dogo la. O la, i sankolola Faa min be koo dogoninw bɛɛ ye, ale bena o kɛ baraji ye i fɛ.

5 “N’aw be Ala delila fana, aw kan’a kɛ i n’a fɔ filankafow b’a kɛ cogo min na. Ka lɔ kalansow wala siradaw la ka Ala deli walisa mɔgɔw k’u ye, o lo ka di u ye. Tiɲɛn na ne b’a fɔ aw ye k’o lo bena kɛ u ka sara ye. 6 Nga n’i be Ala delila, don boon kɔnɔ, daa tugu i yɛrɛ la ani i sankolola Faa deli dogo la. O la, i Faa min be koo dogoninw bɛɛ ye, ale bena o kɛ baraji ye i fɛ. 7 N’aw be Ala delila, aw kana segi kuma kelen kan siɲɛ caaman i n’a fɔ Alalɔnbaliw* b’a kɛ cogo min na. U b’a miiri k’u ka kuma caaman lo ben’a to Ala b’u lamɛn. 8 Aw kan’a kɛ i n’a fɔ olu, sabu aw mako be min na, aw sankolola Faa b’o lɔn sanni aw k’o deli a fɛ.

9 “O la, aw ka ɲi ka Ala deli cogo min na, o filɛ nin ye:

“‘An Faa min be sankolo la, i tɔgɔ ka saniya.* 10 I ka Masaya ka na. I sago ka kɛ dugukolo kan i ko a be kɛra sankolo la cogo min na. 11 An ka bi dumuni* di an ma. 12 An ka jurumuw yafa an ma, i n’a fɔ an fana be yafa an hakɛtabagaw ma cogo min na. 13 Kan’a to an be ben kɔrɔbɔli la,* nga an kisi Sutana* ma.’

14 “Ni aw be yafa tɔɔw ma, aw sankolola Faa fana bena yafa aw ma. 15 Nga, n’aw tɛ yafa tɔɔw ma, aw sankolola Faa fana tɛna yafa aw ma.

16 “N’aw be suun na, aw kana to k’aw ɲɛɛ kumu i n’a fɔ filankafow b’a kɛ cogo min na. U b’u ɲɛɛ kumu* walisa mɔgɔw k’a lɔn k’u be suun na. Tiɲɛn na, ne b’a fɔ aw ye ko u y’u ka sara sɔrɔ ka ban. 17 Nga ele kɔni, n’i be suun na, i ɲɛɛ ko ani tulu kasa diiman mɔ i kunsigi la. 18 O la, mɔgɔw kan’a lɔn ko i be suun na, n’i sankolola Faa dɔrɔn tɛ. N’i y’o kɛ, i Faa min be koo dogoninw bɛɛ ye, ale bena o kɛ baraji ye i fɛ.

19 “Aw kana to ka nafolo lajɛn aw yɛrɛ ye dugukolo kan. Tumu* ni soon be se k’u tiɲɛ ani soonw be se ka daa kari k’u sonya. 20 Nga, a’ ye nafolo lajɛn aw yɛrɛ ye sankolo la. Tumu ni soon tɛ se ka tiɲɛni kɛ yen ani soonw tɛ se ka daa kari ka sonyali kɛ yen fana. 21 Sabu, i ka nafolo be yɔrɔ min na, i dusukun bena kɛ o yɔrɔ lo la fana.

22 “Mɔgɔ ɲɛɛ lo ye a fari fitinɛ ye. N’i ɲɛɛ sinnin be fɛɛn kelen kan, i fari bɛɛ bena kɛ yeelen na. 23 Nga n’i ɲɛji ka ca,* i fari yɔrɔ bɛɛ bena kɛ dibi la. Yeelen min b’i la, n’o kɛra dibi ye, o kɔrɔ ko i be dibiba lo la sa!

24 “Mɔgɔ si tɛ se ka baara kɛ kuntigi fila ye sabu a bena kelen kɔniya, ka kelen kanu, wala a bena nɔrɔ kelen na, ani ka tɔkelen mafiɲɛya. Aw tɛ se ka kɛ Ala ka jɔɔn ye ani ka kɛ nafolo jɔɔn ye.

25 “O lo kama ne b’a fɔ aw ye ko: Aw kana hami tugun aw niin koo la, ko aw bena mun lo dumu wala ko aw bena mun lo min. Aw kana hami fana aw fari koo la, ko aw bena mun lo don. Mɔgɔ niin man fisa ni dumuni ye wa? Mɔgɔ fari fana man fisa ni fani ye wa? 26 A’ ye kɔnɔw filɛ sanfɛ. U tɛ danni kɛ, u tɛ suman tigɛ, u tɛ suman don bondo kɔnɔ fana. Nga, aw sankolola Faa b’u balo. Aw man fisa ni kɔnɔw ye wa? 27 Aw la, jɔn lo be se ka hali dɔɔni* yɛrɛ fara a sii kan n’a tora ka hami? 28 Mun na aw be hami fani koo la? A’ ye binfeerenw wulicogo filɛ kongo kɔnɔ. U tɛ baara kɛ, u tɛ paratali kɛ fana. 29 Nga ne b’a fɔ aw ye ko Solomani ka faamanya bɛɛ n’a ta, a ma fani don min cɛɲi sera binfeerenw ta ma. 30 Biin min be kongo kɔnɔ bi ani tasuma ben’a jɛni sini, ni Ala b’a cɛɲumanya ten, a tɛna a janto aw la ka tɛmɛ o kan wa? Mun na aw ka limaniya ka dɔgɔ ten? 31 O la, aw kana hami fewu k’a fɔ ko: “An bena mun lo dumu? An bena mun lo min?” Wala, “an bena mun lo don?” 32 Alalɔnbaliw* lo be boli boli o fɛɛnw nɔfɛ. Aw Faa min be sankolo la, ale b’a lɔn ko aw mako be o fɛɛnw bɛɛ la.

33 “O la, a’ ye to ka Ala ka Masaya n’a ka tilenninya ɲini fɔlɔ. N’aw y’o kɛ, Ala bena o fɛɛn tɔɔw bɛɛ di aw ma. 34 Aw kana hami fewu sini koo la sabu sini n’a ka haminankow lo. Loon bɛɛ n’a kunko.