Matiyo ka kibaro diiman

25 “Ayiwa sankolo Masaya be i n’a fɔ npogotigi tan, minw y’u ka fitinɛw ta ka taga kɔɲɔcɛ kunbɛnyɔrɔ. 2 U la duuru ye hakilintanw ye, ani duuru ye hakilitigiw ye. 3 Hakilintan nunu y’u ka fitinɛw ta, nga u ma tulu ta u kun, 4 k’a sɔrɔ hakilitigi nunu y’u ka fitinɛw ta ani ka tulu ta minan wɛrɛ kɔnɔ. 5 Kɔɲɔcɛ tun be mɛɛnna minkɛ, sinɔgɔ y’u bɛɛ minɛ ani u sinɔgɔra. 6 Dugutilama, pɛrɛnkan dɔ bɔra ko: ‘Kɔɲɔcɛ nana! A’ ye bɔ k’a kunbɛn.’ 7 O la, npogotigi tan nunu wulila k’u ka fitinɛw labɛn. 8 Hakilintan nunu y’a fɔ hakilitigiw ye ko: ‘A’ y’an sɔn tulu dɔɔni na, n’o tɛ an ka fitinɛw bena faga yanni dɔɔni.’ 9 Hakilitigi nunu y’u jaabi ko: ‘An ma la a la ni tulu nin bena an bɛɛ labɔ. Min ka fisa, a’ ye taga tulu feerelaw fɛ ka dɔ san aw yɛrɛ ye.’ 10 U tagara tulu sanyɔrɔ tuma min na, kɔɲɔcɛ nana. Npogotigi minw tun labɛnnin lo, olu ni kɔɲɔcɛ donna kɔɲɔso kɔnɔ ani u ye daa tugu. 11 Kɔfɛ, npogotigi tɔɔ nunu nana ani k’a fɔ ko: ‘Matigi, matigi, daa yɛlɛ an ye!’ 12 Kɔɲɔcɛ y’a fɔ u ye ko: ‘Tiɲɛn na, ne t’aw lɔn.’

13 “O la, a’ ye to ɲɛɛ na sabu aw t’o loon n’o wagati lɔn.

14 “Sankolo Masaya be i n’a fɔ cɛɛ dɔ min y’a ka baaradenw weele k’a ka nafolo kalifa u ma, ani ka taga dugu la. 15 A ye wari talan* duuru di kelen ma, ka fila di dɔ wɛrɛ ma ani ka kelen di sabanan ma. A y’o kɛ ka kɛɲɛ n’u kelen kelen bɛɛ seko ye. O kɔ, a tagara dugu la. 16 O yɔrɔnin bɛɛ, wari talan duuru dira min ma, ale ye jago kɛ n’o ye ani ka wari talan duuru wɛrɛ sɔrɔ. 17 O cogo kelen na, wari talan fila dira min ma, ale ye wari talan fila wɛrɛ sɔrɔ. 18 Nga wari talan kelen dira min ma, ale tagara dingɛ sogi k’a matigi ka wari* dogo yen.

19 “Wagatijan o kɔ, u matigi nana ani ale n’a ka baaradenw ye jati kɛ. 20 Wari talan duuru tun dira min ma, ale nana ni wari talan duuru wɛrɛ ye ani k’a fɔ ko: ‘Matigi, i tun ye wari talan duuru lo kalifa ne ma. A filɛ! N’ ye wari talan duuru wɛrɛ sɔrɔ.’ 21 A matigi y’a fɔ a ye ko: ‘O ɲɛna, i ye baaraden ɲuman ani mɔgɔ kantigi ye. I ye kantigiya kɛ koo fitinin na, ne bena koo caaman kalifa i ma. Na, i n’i matigi ka ninsɔndiya ɲɔgɔn fɛ.’ 22 O kɔ, wari talan fila tun dira min ma, ale gwɛrɛla k’a fɔ ko: ‘Matigi, i tun ye wari talan fila lo kalifa ne ma. A filɛ! N’ ye wari talan fila wɛrɛ sɔrɔ.’ 23 A matigi y’a fɔ a ye ko: ‘O ɲɛna, i ye baaraden ɲuman ani mɔgɔ kantigi ye. I ye kantigiya kɛ koo fitinin na, ne bena koo caaman kalifa i ma. Na, i n’i matigi ka ninsɔndiya ɲɔgɔn fɛ.’

24 “A laban, wari talan kelen tun dira min ma, ale gwɛrɛla k’a fɔ ko: ‘Matigi, n’ b’a lɔn ko i ka koo ka gwɛlɛ. I ma danni kɛ yɔrɔ min na, i b’o yɔrɔ suman lo tigɛ, ani i ma suman min fiyɛ, i b’o lo cɛ. 25 O kama lo n’ siranna, ani n’ tagara dingɛ sogi k’i ka wari talan dogo yen. I ka wari talan filɛ, a minɛ.’ 26 A matigi y’a jaabi ko: ‘Baaraden jugu salibagatɔ filɛ, i tun b’a lɔn ko n’ ma danni kɛ yɔrɔ min na, n’ b’o yɔrɔ suman lo tigɛ, ani ko n’ ma suman min fiyɛ, n’ b’o lo cɛ, tiɲɛn tɛ? 27 Ayiwa n’o lo, i tun ka kan ka taga n’ ka wari* bila banki la. O la ni n’ kɔsegira, n’ tun bena n’ ka wari n’a tɔnɔ sɔrɔ.

28 “‘A’ ye wari talan kelen nin bɔsi a la k’o di wari talan tan tigi ma. 29 Sabu fɛɛn be tigi min bolo, dɔ bena fara a ta kan ani a be kɛ fɛɛn caaman tigi ye. Nga fɛɛn tɛ tigi min bolo, hali min b’a fɛ, o bena bɔsi a la. 30 A’ ye baaraden kolon nin fili kɛnɛma dibi la. A bena kasi ani k’a ɲiin ɲimi yen.’

31 “Mɔgɔ Dencɛ bena na a ka nɔɔrɔ la ni mɛlɛkɛw bɛɛ ye tuma min na, a bena sigi a ka masasigilan nɔɔrɔman kan. 32 Siyaw bɛɛ bena lajɛn a ɲɛfɛ, ani a bena mɔgɔw woloma ka bɔ ɲɔgɔn na i n’a fɔ sagadɛndɛla be sagaw woloma ka bɔ baaw la cogo min na. 33 A bena sagaw bila a kinibolo fɛ, ka baaw bila a numanbolo fɛ.

34 “O kɔ, minw be Masacɛ kinibolo fɛ, a ben’a fɔ u ye ko: ‘N’ Faa ka dubadenw, a’ ye na Masaya cɛɛn ta, o min tun labɛnna aw ye kabi duniɲa dantuma. 35 Sabu kɔngɔ ye n’ minɛ, aw ye dumuni di n’ ma, minnɔgɔ ye n’ minɛ, aw ye jii di n’ ma. N’ tun ye lonan ye, aw ye n’ bisimila koɲuman. 36 N’ kaan lakolon* tun lo, aw ye fani don n’ na. N’ banana, aw ye n’ ladon. N’ tun be kaso la, aw nana n’ filɛ yen.’ 37 O kɔ, mɔgɔ tilenninw bena a ɲininga ko: ‘Matigi, tuma juman lo an y’i kɔngɔtɔ ye ani an ye dumuni d’i ma? Tuma juman lo an y’a ye minnɔgɔ b’i la ani an ye jii d’i ma? 38 Tuma juman lo an y’i ye lonanya la ani an y’i bisimila koɲuman, wala k’i ye kaan lakolon ani ka fani don i la? 39 Tuma juman lo i tun man kɛnɛ wala i tun be kaso la ani an tagara i filɛ?’ 40  Masacɛ bena u jaabi ko: ‘Tiɲɛn na, ne b’a fɔ aw ye ko aw mana koo nunu kɛ ne balimaw bɛɛ la dɔgɔmannin ye, aw y’o kɛ ne lo ye.’

41 “O kɔ, minw b’a numanbolo fɛ, a ben’a fɔ u ye ko: ‘A’ ye taga ka bɔ ne kɔrɔ, mɔgɔ danganin nunu! A’ ye taga tasuma fagabali la, o min labɛnna Sutana* n’a ka mɛlɛkɛw kama. 42 Sabu kɔngɔ ye n’ minɛ, nga aw ma dumuni di n’ ma. Minnɔgɔ ye n’ minɛ, nga aw ma jii di n’ ma. 43 N’ tun ye lonan ye, nga aw ma n’ bisimila. N’ kaan lakolon tun lo, nga aw ma fani don n’ na. N’ banana, n’ tun be kaso la, nga aw ma n’ ladon.’ 44 O la, olu fana ben’a jaabi ko: ‘Matigi, tuma juman lo an y’i kɔngɔtɔ ye, k’a ye minnɔgɔ b’i la, i be lonanya la, i kaan lakolon lo, i man kɛnɛ wala i be kaso la ani an m’an janto i la?’ 45 Ayiwa, a bena u jaabi ko: ‘N’aw ma o koow kɛ ne balimaw bɛɛ la dɔgɔmannin ye, aw m’o kɛ ne lo ye.’ 46 Olu ta bena kɛ halakili banbali ye,* nga mɔgɔ tilenninw bena ɲɛnamaya banbali sɔrɔ.”