Matiyo ka kibaro diiman

5 Yezu ye jama ye tuma min na, a yɛlɛla ka sigi kulu kan ani a ka kalandenw gwɛrɛla a la. 2 O kɔ, a y’a daminɛ k’u kalan ko:

3 “Mɔgɔ minw b’a lɔn k’u mako be Ala la, olu dagamunin lo, sabu sankolo Masaya ye olu ta ye.

4 “Minw dusu kasinin lo, olu dagamunin lo, sabu Ala bena u dusu saalo.

5 “Mɔgɔ minw sabarinin* lo, olu dagamunin lo, sabu dugukolo bena kɛ u cɛɛn ye.

6 “Tilenninya nege gwannin be minw na, olu dagamunin lo, sabu Ala bena u nege wasa.

7 “Mɔgɔ minw be makari tɔɔw la, olu dagamunin lo, sabu Ala bena makari u la.

8 “Mɔgɔ minw kɔnɔ gwɛnin lo, olu dagamunin lo, sabu u bena Ala ye.

9 “Hɛɛrɛɲinilaw dagamunin lo, sabu u bena weele ko Ala deenw.

10 “U be minw tɔɔrɔla tilenninya kosɔn, olu dagamunin lo, sabu sankolo Masaya ye u ta ye.

11 “Ni mɔgɔw b’aw nɛni, k’aw tɔɔrɔ, ka ngalon la aw kan ne kosɔn ko aw be koo jugu sifa bɛɛ kɛ, aw dagamunin lo. 12 A’ ye ɲagali ka ninsɔndiya kosɔbɛ, sabu aw bena dugaba sɔrɔ sankolo la. Kira minw kɔnna aw ɲɛ, u ye olu fana tɔɔrɔ ten le.

13 “Aw ye duniɲa ka kɔgɔ ye. Ni kɔgɔ diya bɔra a la, mun b’a kɛ kɔgɔ ye tugun? A laban tɛ foyi ɲɛ. A ka ɲi ka fili kɛnɛma le walisa mɔgɔw k’a dɔndɔn.

14 “Aw ye duniɲa ka yeelen ye. Dugu min be kulu kan, a tɛ se ka dogo. 15 Mɔgɔ tɛ fitinɛ mɛnɛ k’a bila segi jukɔrɔ. Nga, a b’a bila fitinɛ bilayɔrɔ la walisa a ka yeelen bɔ bonkɔnɔmɔgɔw bɛɛ ye. 16 O cogo kelen na, aw ka yeelen bɔ mɔgɔw ye walisa u ka aw ka kɛwale ɲumanw ye ani ka bonya la aw sankolola Faa kan.

17 “Aw kan’a miiri ko ne nana daan sigi Musa ka Sariya wala kiraw ka kuma na. N’ ma na o kama. Nga n’ nana walisa u ye min fɔ, o ka dafa. 18 Tiɲɛn na, ne b’a fɔ aw ye ko sankolo ni dugukolo be se ka tunu, nga Sariya sigininden kelen wala a murumuru si tɛna tunu n’a ma dafa. 19 O la, tigi min y’o sariyaw bɛɛ la dɔgɔmannin tiɲɛ ani a be tɔɔw lasun k’o ɲɔgɔn kɛ, ale bena jati mɔgɔ dennin* ye Ala ka Masaya koo la. Nga tigi min b’o sariyaw labato ani a be tɔɔw dɛmɛ u k’o kɛ, ale bena jati mɔgɔba* ye Ala ka Masaya koo la. 20 Ne b’a fɔ aw ye ko n’aw ka tilenninya ma tɛmɛ Sariya karamɔgɔw ni Fariziɲɛw ta kan, aw tɛna se ka don sankolo Masaya la fewu.

21 “Aw y’a mɛn ko a fɔra aw bɛmaw ye ko: ‘I man kan ka mɔgɔ faga. Mɔgɔ o mɔgɔ b’a mɔgɔɲɔgɔn faga, a ka kan ka kiti.’ 22 Nga, ne b’a fɔ aw ye ko mɔgɔ o mɔgɔ diminin tora a balima kɔrɔ, o tigi ka kan ka kiti. Mɔgɔ o mɔgɔ b’a balima nɛni ka maloya bila a la, o tigi bena kiti kititigɛsoba la. Mɔgɔ o mɔgɔ b’a fɔ a balima ye ko “lagalagatɔ dajisoro,” o tigi ka kan ka fili Inɔmu kɔkɛnɛ* na.

23 “N’i tagara saraka bɔyɔrɔ, ani i hakili jigira yen ko i balima dɔ diminin b’i kɔrɔ, 24 i ka saraka bila sarakabɔlan ɲɛfɛ, ani kɔsegi ka taga bɛɛn sigi i n’i balima cɛ fɔlɔ. O kɔ, segi ka taga i ka saraka bɔ.

25 “Ni bɛnbaliyako dɔ be i ni mɔgɔ dɔ cɛ, teliya k’o ɲɛnabɔ n’a ye k’aw to kititigɛso siran kan. N’o tɛ, n’o koo sera kititigɛla fɛ, ale be se ka jalaki ben i kan ani k’i don sariya bolibaga bolo. Ale be se k’i don kaso la. 26 Tiɲɛn na, ne b’a fɔ i ye ko i tɛna bɔ kaso la n’i m’i ka juru bɛɛ sara ka ban pewu. Tama kelen* yɛrɛ tɛna to.

27 “Aw y’a mɛn a fɔra ko: ‘I man kan ka ɲamɔgɔya kɛ.’ 28 Nga, ne b’a fɔ aw ye ko mɔgɔ o mɔgɔ tora ka muso filɛ fɔɔ a nege donna a la, o tigi ye ɲamɔgɔya kɛ ka ban a dusukun na. 29 O la, n’i kinifɛ ɲɛden b’i bila kojugukɛ la, a wɔgɔbi k’a fili yɔrɔjan, sabu i ka bɔnɛ i ɲɛden kelen na, o ka fisa i fari kuturu bɛɛ ka fili Inɔmu kɔkɛnɛ na. 30 Ani fana, n’i kinibolo b’i bila kojugukɛ la, a tigɛ k’a fili yɔrɔjan, sabu i ka bɔnɛ i fari yɔrɔ dɔ la, o ka fisa i fari kuturu bɛɛ ka fili Inɔmu kɔkɛnɛ na.

31 “A fɔra fana ko: ‘Mɔgɔ o mɔgɔ b’a muso furu sa, a ka furusasɛbɛ d’a ma.’ 32 Nga, ne b’a fɔ aw ye ko mɔgɔ o mɔgɔ y’a muso furu sa, ni kakalaya* sababu tɛ, a b’a bilara ɲamɔgɔya la. Ani mɔgɔ o mɔgɔ y’o muso furu, o tigi fana ye ɲamɔgɔya kɛ.

33 “Aw y’a mɛn fana ko a fɔra aw bɛmaw ye ko: ‘I man kan ka kali koo dɔ la ani i t’o kɛ. N’i y’i daa di Jehova ma koo min na, i ka ɲi k’o kɛ.’ 34 Nga ne b’a fɔ aw ye ko: Aw kana kali fewu. Aw kana kali ni sankolo ye, sabu sankolo ye Ala ka masasigilan ye. 35 Aw kana kali ni dugukolo ye, sabu o ye Ala ka senbilanan ye. Aw kana kali ni Zeruzalɛmu ye, sabu o ye Masaba ka dugu lo ye. 36 Kana kali n’i kungolo ye sabu i tɛ se k’i kunsigi deen kelen yɛrɛ gwɛ wala k’a fin. 37 I ka ‘ɔnhɔn’ ka kɛ ‘ɔnhɔn’ ye, i ka ‘ayi’ fana ka kɛ ‘ayi’ ye. Ni dɔ farala o kan, o bɔra Sutana* lo yɔrɔ.

38 “Aw y’a mɛn a fɔra ko: ‘Ɲɛden juru be sara ni ɲɛden ye, ani ɲiin juru be sara ni ɲiin ye.’ 39 Nga ne b’a fɔ aw ye ko: Ni mɔgɔ ye koo jugu kɛ i la, kana a kɛlɛ. Ni mɔgɔ y’i kinifɛ tulo ci, i tulo tɔkelen sin a ma. 40 Ni mɔgɔ b’a fɛ ka taga n’i ye kititigɛso la walisa k’i ka dereke bɔsi i la, i ka derekeba fana d’a ma. 41 Ni faaman dɔ y’i karaba ko i ka doni dɔ ta ka kilomɛtɛrɛ kelen kɛ, kilomɛtɛrɛ fila kɛ n’a ye. 42 Ni mɔgɔ ye fɛɛn daali i fɛ, a d’a ma. Ni mɔgɔ b’a fɛ ka fɛɛn dɔ juru ta* i fɛ, kana ban.

43 “Aw y’a mɛn a fɔra ko: ‘I ka kan k’i mɔgɔɲɔgɔn kanu ani k’i jugu kɔniya.’ 44 Nga, ne b’a fɔ aw ye ko: A’ ye to k’aw juguw kanu ani ka delili kɛ aw tɔɔrɔbagaw ye. 45 O la, aw ben’a yira ko aw ye aw sankolola Faa deenw ye, sabu a be tile bɔ mɔgɔ ɲumanw ni mɔgɔ juguw ye ani ka sanji di mɔgɔ tilenninw ni mɔgɔ tilenbaliw ma. 46 N’aw b’aw kanubagaw dɔrɔn lo kanu, tɔnɔ juman lo b’o la? Lanpominɛlaw fana t’o lo kɛ wa? 47 N’aw b’aw balimaw dɔrɔn lo fo, o ye koba ye wa? Alalɔnbaliw fana t’o lo kɛ wa? 48 O la do, aw ka kan ka kɛ mɔgɔ dafaninw ye, i ko aw sankolola Faa dafanin lo cogo min na.