Matiyo ka kibaro diiman

2 Yezu wolola Bɛtilehɛmu, masacɛ Erɔdi ka tile la. O dugu tun be Zude mara la. Ayiwa o kɔ, lololɔnbaga* dɔw bɔra kɔrɔn fɛ ka na Zeruzalɛmu. 2 U ko: “Yahutuw ka masacɛ min wolola, a be min? Bari an y’a ka lolo ye ka an to kɔrɔn fɛ, ani an nana walisa ka bonya la a kan.”* 3  Masacɛ Erɔdi y’o mɛn tuma min na, a hakili ɲagamina. Zeruzalɛmukaw bɛɛ fana hakili ɲagamina. 4 A ye sarakalasebagaw kuntigiw ni Sariya karamɔgɔw* bɛɛ lajɛn, ani k’u ɲininga Krista* tun ka ɲi ka wolo yɔrɔ min na. 5 U y’a fɔ a ye ko: “Bɛtilehɛmu min be Zude mara la, sabu kira dɔ tun y’o lo sɛbɛ ko: 6 ‘Ele Bɛtilehɛmu min be Zude mara la, i tɛ duguw bɛɛ la fitinin ye Zude kuntigiw ɲɛɛ na, sabu kuntigi dɔ bena bɔ i la, min bena a janto ne ka jama Israɛl la i ko sagadɛndɛla.’”

7 O la, Erɔdi ye lololɔnbaga nunu weele dogo la ani k’u ɲininga wagati tigitigi min na u ye lolo nin ye. 8 O kɔ, a y’u ci ka taga Bɛtilehɛmu k’a fɔ u ye ko: “A’ ye taga deen nin yɔrɔ ɲini koɲuman. N’aw y’a ye, a’ ye kɔsegi ka na o fɔ n’ ye walisa ne fana ka taga bonya la a kan.” 9 U ye masacɛ lamɛn ka ban tuma min na, u ye sira minɛ. A filɛ, u tun ye lolo min ye k’u to kɔrɔn fɛ, o lolo bilara u ɲɛ ani deen nin tun be yɔrɔ min na, a tagara lɔ o yɔrɔ sanfɛ. 10 U y’o lolo ye minkɛ, u ninsɔn diyara kosɔbɛ. 11 U donna boon kɔnɔ tuma min na, u ye deen n’a bamuso Mariyamu ye. U y’u kunbiri gwan ka bonya la a kan. U y’u ka minanw dayɛlɛ, ka bonyafɛnw di a ma: sanu, wusulan ani mire.* 12 Nga, komi Ala y’u lasɔmi siko la k’u kana kɔsegi Erɔdi fɛ, u ye sira wɛrɛ ta ka kɔsegi u ka jamana na.

13 U taganin kɔ, a filɛ, Jehova ka mɛlɛkɛ y’a yɛrɛ yira Yusufu la siko la, k’a fɔ a ye ko: “Wuli! Deen n’a bamuso ta ka boli ka taga n’u ye Ezipiti. To o yɔrɔ la fɔɔ ni n’ nana kaan bɔ i ma tuma min na, sabu Erɔdi bena deen nin yɔrɔ ɲini walisa k’a faga.” 14 O la, o suu nin bɛɛ la, Yusufu wulila ka deen n’a bamuso ta ka boli ka taga Ezipiti. 15 A tora o yɔrɔ la fɔɔ ka taga se Erɔdi saya ma. O la, Jehova tun tɛmɛna a ka kira fɛ ka min fɔ, o dafara. A tun ko: “N’ bena n’ dencɛ weele ka bɔ Ezipiti.”

16 Erɔdi y’a faamu tuma min na ko lololɔnbagaw y’a janfa, a dimina kosɔbɛ. Ka kɛɲɛ ni lololɔnbagaw tun ye wagati min fɔ a ye, a ye cii di ko Bɛtilehɛmu n’a gɛrɛfɛduguw la, cɛden minw ma tɛmɛ saan fila kan, u k’u bɛɛ faga. 17 O cogo la, kira Zeremi tun ye min fɔ, o dafara. A tun ko: 18 “Kasikan ni kulekan caaman be mɛnna ka bɔ Rama. Rasɛli lo be kasira a deenw kosɔn. A ma sɔn mɔgɔ si k’a dusu saalo sabu a deenw tɛ yen tugun.”

19 Erɔdi sanin kɔ, Jehova ka mɛlɛkɛ y’a yɛrɛ yira Yusufu la siko la Ezipiti 20 ani k’a fɔ a ye ko: “Wuli! Deen n’a bamuso ta ka taga n’u ye Israɛl jamana na sabu minw tun b’a ɲinina ka deen nin faga,* u sara.” 21 O la, a wulila ka deen n’a bamuso ta ka taga n’u ye Israɛl jamana na. 22 Nga, a y’a mɛn ko Arikelayusi lo sigira masaya la Zude a facɛ Erɔdi nɔɔ na minkɛ, a siranna ka taga yen. Ka fara o kan, komi Ala y’a lasɔmi siko la, a tagara Galile mara la. 23 A tagara sigi dugu dɔ la min be weele ko Nazarɛti. O cogo la, kiraw tun ye min fɔ, o dafara. U tun ko: “U bena a weele ko Nazarɛtika.”*