Matiyo ka kibaro diiman

7 “Aw kana to ka tɔɔw kiti janko aw fana kana kiti 2 sabu aw be tɔɔw kiti cogo min na, aw fana bena kiti ten le. Aw be tɔɔw ta suman ni minan min ye, aw fana ta bena suman n’o minan lo ye. 3 Binkala min be i balima ɲɛɛ na, mun na i b’o filɛra k’a sɔrɔ lɔgɔkuruba min b’i ta la, i t’o yera? 4 Ele be se k’a fɔ i balima ye cogo di ko: ‘A to n’ be binkala nin bɔ i ɲɛɛ na,’ k’a sɔrɔ lɔgɔkuruba lo b’i ta la? 5 Filankafo nin! Lɔgɔkuruba min b’i ɲɛɛ na, o bɔ fɔlɔ. O la, i bena yeli kɛ ka ɲɛ ka se ka binkala bɔ i balima ɲɛɛ na.

6 “Aw kana fɛɛn senuman di wuluw ma, aw kana aw ka kɔnɔkisɛ sɔngɔ gwɛlɛw fana di lɛɛw ma. N’o tɛ, u bena o dɔn dɔn ani ka yɛlɛma k’aw mandimi.

7 “Aw mako be min na, a’ ye to k’o deli Ala fɛ. A bena o di aw ma. A’ ye to ka dɛmɛ ɲini a fɛ, a bena aw dɛmɛ. A’ ye to ka daa kɔkɔ, a bena daa yɛlɛ aw ye. 8 Sabu, mɔgɔ o mɔgɔ mana a makoyafɛn deli Ala fɛ, a b’o di a ma. Mɔgɔ o mɔgɔ mana dɛmɛ ɲini a fɛ, a b’o sɔrɔ. Ani, mɔgɔ o mɔgɔ mana daa kɔkɔ, daa be yɛlɛ o tigi ye. 9 N’aw deen y’aw deli buru la, aw bena kabakuru d’a ma wa? 10 Wala n’a y’aw deli jɛgɛ la, aw bena saa d’a ma wa? 11 Aw minw ka jugu, n’aw be sɔn ka fɛɛn ɲumanw di aw deenw ma, aw Faa min be sankolo la, ale tɛna fɛɛn ɲumanw di a delibagaw ma ka tɛmɛ wa?

12 “Aw b’a fɛ mɔgɔw ka min kɛ aw ye, aw fana ka kan k’o ɲɔgɔn kɛ u ye. Sariya ni kiraw* y’o lo fɔ.

13 “A’ ye don daa dennin fɛ, sabu sira min be taga ni mɔgɔ ye halakiyɔrɔ la, ale ka bon, a daa fana waganin lo. Mɔgɔ caaman be tɛmɛ o lo fɛ. 14 K’a sɔrɔ sira min be taga ni mɔgɔ ye ɲɛnamaya la, o sira n’a donda bɛɛ ka dɔgɔ ani a sɔrɔbagaw man ca.

15 “A’ y’aw yɛrɛ kɔrɔsi ngalon kiraw ma. U b’u yɛrɛ kɛ sagaw ye, k’a sɔrɔ kongowuluw lo. 16 Aw bena u lɔn u ka kɛwalew lo fɛ. Aw tɛ pekun sɔrɔ ŋɔniyiri kan abada, toro fana tɛ sɔrɔ ŋɔnisun kan. Tiɲɛn tɛ? 17 O cogo kelen na, yiri ɲuman be deen ɲumanw lo kɛ, nga yiri kuntan be deen tolininw lo kɛ. 18 Yiri ɲuman tɛ se ka deen tolinin kɛ ani yiri kuntan tɛ se ka deen ɲuman kɛ fana. 19 Yiri min tɛ deen ɲuman kɛ, o yiri be tigɛ ka fili tasuma na. 20 O cogo kelen na, aw bena o ngalon kiraw lɔn u ka kɛwalew lo fɛ.

21 “Mɔgɔ minw be ne weele ko ‘Matigi, Matigi,’ olu bɛɛ lo tɛna don sankolo Masaya la, fɔɔ minw be ne sankolola Faa sago kɛ. 22 Loon dɔ bena se, mɔgɔ caaman ben’a fɔ ne ye ko: ‘Matigi, Matigi, an ma kiraya kɛ i tɔgɔ la wa, ka jinaw gwɛn i tɔgɔ la ani ka kabako caaman kɛ i tɔgɔ la wa?’ 23 Nga ne ben’a fɔ u ye ko: ‘Ne t’aw lɔn fewu! A’ ye tɛmɛ ka bɔ n’ kɔrɔ, aw kojugukɛla nunu!’

24 “O kama, ne ye kuma minw fɔ, ni mɔgɔ min y’o sira tagama, o tigi be i n’a fɔ cɛɛ hakilitigi min y’a ka boon lɔ fara kan. 25 Sanjiba benna, jiba woyora ani fɔɲɔba fiyɛra, nga o boon ma ben sabu a juu sigira fara lo kan. 26 Nga ni mɔgɔ min ye n’ ka kumaw mɛn ani a m’o sira tagama, o tigi be i n’a fɔ hakilintan min y’a ka boon lɔ cɛncɛn kan. 27 Sanjiba benna, jiba woyora, fɔɲɔba fiyɛra ani o boon benna ka halaki pewu.”

28 Yezu y’o kumaw fɔ ka ban tuma min na, jama kabakoyara kosɔbɛ a ka kalankɛcogo koo la 29 sabu a tun t’u kalan i n’a fɔ Sariya karamɔgɔw. Nga, a tun b’u kalan ni setigiya ye.