Matiyo ka kibaro diiman

18 O wagati la, Yezu ka kalandenw gwɛrɛla a la k’a ɲininga ko: “Jɔn yɛrɛ lo ye mɔgɔba ye sankolo Masaya kɔnɔ?” 2 O la, a ye deen dɔ weele k’a lɔ u cɛma 3 ani k’a fɔ u ye ko: “Tiɲɛn na, ne b’a fɔ aw ye ko n’aw m’aw sɔɔn yɛlɛma* ani k’aw yɛrɛ kɛ i n’a fɔ denmisɛnw, aw tɛna don sankolo Masaya kɔnɔ cogo si la. 4 Ayiwa, tigi min b’a yɛrɛ majigi ka kɛ i n’a fɔ deen nin, o tigi lo ye mɔgɔba ye sankolo Masaya kɔnɔ. 5 Ni mɔgɔ min ye deen nin ɲɔgɔn bisimila ne tɔgɔ la, o tigi ye ne lo bisimila fana. 6 Nga denmisɛn minw lanin be ne la, sanni mɔgɔ dɔ ka olu dɔ kunnatiɲɛ, a ka fisa o tigi ma wugu belebeleba* ka siri a kaan na, ani a ka fili kɔgɔji kɔnɔ.

7 “Bɔnɛ ye duniɲa ta ye kunnatiɲɛkow kosɔn! Waajibi lo kunnatiɲɛkow ka kɛ, nga mɔgɔ min kɛra u dɔ sababu ye, bɔnɛ y’a ta ye! 8 O la, n’i bolo wala i seen ye kunnatiɲɛ sababu ye i fɛ, a tigɛ k’a fili yɔrɔjan. A ka fisa i ka ɲɛnamaya sɔrɔ n’i bolo kelen wala seen kelen ye, sanni u k’i fili tasuma fagabali kɔnɔ n’i bolo fila wala seen fila ye. 9 N’i ɲɛden fana ye kunnatiɲɛ sababu ye i fɛ, a wɔgɔbi k’a fili yɔrɔjan. A ka fisa i ka ɲɛnamaya sɔrɔ n’i ɲɛden kelen ye, sanni u k’i fili Inɔmu kɔkɛnɛ na n’i ɲɛden fila ye. 10 A’ y’aw yɛrɛ kɔrɔsi aw kana denmisɛn nunu dɔ mafiɲɛya sabu ne b’a fɔ aw ye ko, u ka mɛlɛkɛw be ne sankolola Faa ɲɛfɛ* tuma bɛɛ. 11 ——

12 “Aw ka miiriya ye mun ye nin koo la? Ni saga 100 be mɔgɔ dɔ fɛ ani u la kelen tununa, a tɛna 99 nunu to kulu kan, ka taga saga tununin nin yɔrɔ ɲini wa? 13 N’a y’a ye, a ninsɔn bena diya kosɔbɛ ale kosɔn ka tɛmɛ 99 nunu kan, olu minw ma tunu. 14 O cogo kelen na, ne* sankolola Faa t’a fɛ denmisɛn nunu si ka tunu.

15 “Ka fara o kan, n’i balima ye jurumu kɛ, taga o koo fɔ a ye* i kelen n’a kelen. N’a y’i lamɛn, o kɔrɔ ko i y’i balima dɛmɛ a segira sira ɲuman kan. 16 Nga n’a ma sɔn k’i lamɛn, mɔgɔ kelen wala fila ɲini ka fara i yɛrɛ kan, walisa koow bɛɛ ka kɛ seere* fila wala saba ɲɛɛ na. 17 N’a m’u lamɛn, o koo ɲɛfɔ kafo ye. N’a ma kafo fana lamɛn, a jati i n’a fɔ Alalɔnbali* wala lanpominɛla.

18 “Tiɲɛn na, ne b’a fɔ aw ye ko aw mana fɛɛn o fɛɛn siri dugukolo kan, o sirila ka ban sankolo la. Aw mana fɛɛn o fɛɛn foni fana dugukolo kan, o fonina ka ban sankolo la. 19 Tiɲɛn na, ne b’a fɔ aw ye fana ko ni aw la mɔgɔ fila bɛnna yan dugukolo kan, ka n’ sankolola Faa deli fɛɛn o fɛɛn koo la min kɔrɔtanin lo, a bena o kɛ u ye. 20 Sabu mɔgɔ fila wala mɔgɔ saba mana ɲɔgɔn lajɛn ne tɔgɔ la, ne b’u cɛma.”

21 O kɔ, Piyɛri gwɛrɛla Yezu la k’a ɲininga ko: “Matigi, ni n’ balima be to ka n’ hakɛ ta, n’ ka ɲi ka yafa a ma siɲɛ joli le? Fɔɔ siɲɛ wolonfila wa?” 22 Yezu y’a jaabi ko: “Ne b’a fɔ i ye ko, kana yafa a ma fɔɔ siɲɛ wolonfila, nga fɔɔ siɲɛ 77.

23 “O lo kama sankolo Masaya be i ko masacɛ dɔ, min b’a fɛ k’a ka wariko jatiminɛ n’a ka baaradenw ye. 24 A y’o daminɛ tuma min na, u nana ni cɛɛ dɔ ye a ka wari talan 10 000* juru be min na. 25 Nga komi see tun t’a ye k’o juru sara, a matigi y’a fɔ ko u ka ale, a muso, a deenw ani a bololafɛnw bɛɛ feere walisa k’o juru sara. 26 O la, o baaraden y’a kunbiri gwan a matigi ɲɛɛ kɔrɔ* k’a deli ko: ‘Muɲu ne kɔrɔ, n’ bena i ka juru bɛɛ sara.’ 27 A hinɛ donna a matigi la, o kama, a y’a ka juru bɛɛ lasa. 28 Nga, o jɔɔn tagara a tɔɲɔgɔn sɔrɔ, a ka wari deniye 100 juru tun be min na. A y’a minɛ k’a kaan dɛrɛ ani k’a fɔ a ye ko: ‘N’ ka wari sara.’ 29 A tɔɲɔgɔn y’a kunbiri gwan a ɲɛɛ kɔrɔ ani k’a deli ko: ‘Muɲu n’ kɔrɔ, n’ bena i ka wari sara.’ 30 Nga, a ma sɔn. A y’a minɛ k’a don kaso la, ko n’a m’ale ka juru bɛɛ sara, a tɛ bɔ. 31 A tɔɲɔgɔnw y’o ye tuma min na, u dusu tiɲɛna kosɔbɛ ani u tagara o koo bɛɛ fɔ u matigi ye. 32 O la, u matigi ko u k’o baaraden weele ka na. A y’a fɔ o baaraden ye ko: ‘Baaraden jugu nin, ne y’i ka juru bɛɛ lasa sabu i ye n’ deli. 33 Yala i fana tun man kan ka makari i tɔɲɔgɔn na i ko ne makarila i la cogo min na wa?’ 34 O la, a kuntigi dimininba y’a don garadiw bolo walisa u k’a don kaso la. A ko n’a ma ale ka juru bɛɛ sara, a tɛ bɔ. 35 Ne sankolola Faa fana bena o ɲɔgɔn lo kɛ aw kelen kelen bɛɛ la, n’aw tɛ yafa aw balimaw ma n’aw dusu bɛɛ ye.”