Matiyo ka kibaro diiman
19 Yezu y’o kumaw fɔ ka ban tuma min na, a bɔra Galile ka taga Zurudɛn baji kɔfɛ, Zude gɛrɛfɛ. 2 Jamaba tugura a kɔ fana ani a y’u ka banabagatɔw kɛnɛya yen.
3 Fariziɲɛ dɔw nana Yezu fɛ walisa k’a kɔrɔbɔ. U y’a ɲininga ko: “Yala a daganin lo cɛɛ k’a muso furu sa koo sugu bɛɛ kosɔn wa?” 4 A y’u jaabi ko: “Aw m’a kalan ko tigi min y’u dan kabi daminɛ na, a y’u dan cɛɛ ni muso wa? 5 A y’a fɔ ko: ‘O kama le cɛɛ bena a faa n’a baa to yen ka taga nɔrɔ a muso la, ani u fila bena kɛ farisogo kelen ye.’ 6 O la, u tɛ fila ye tugun, nga farisogo kelen. O kama Ala ye min jɛn k’a kɛ kelen ye, mɔgɔ si kana o faran.” 7 U y’a ɲininga ko: “N’o lo, mun na Musa y’a fɔ ko n’i b’a fɛ k’i muso furu sa, i ka furusasɛbɛ d’a ma k’a bila ka taga?” 8 A y’u jaabi ko: “Aw ka dusugwɛlɛya kosɔn le Musa ko aw be se k’aw muso furu sa, n’o tɛ daminɛ na koow tun tɛ ten. 9 Ne b’a fɔ aw ye ko mɔgɔ o mɔgɔ b’a muso furu sa ni kakalaya* sababu tɛ ani ka muso wɛrɛ furu, o tigi be ɲamɔgɔya lo kɛra.”
10 A ka kalandenw y’a fɔ a ye ko: “Ni furuko be ten, a ka fisa mɔgɔ kana furu.” 11 Yezu y’a fɔ u ye ko: “Cɛɛ bɛɛ tɛ sɔn o ma, fɔɔ Ala ye o see di minw ma. 12 Koo caaman be se ka mɔgɔ bila furubaliya la. Dɔw wolola n’a ye, dɔw ta ye mɔgɔ nɔɔ ye ani dɔ wɛrɛw b’o latigɛ sankolo Masaya kosɔn. Mɔgɔ min be se ka sɔn furubaliya ma, o tigi ka sɔn a ma.”
13 O kɔ, mɔgɔw nana ni denmisɛnw ye Yezu fɛ walisa a k’a bolo la u kan ani ka Ala deli u ye. Nga a ka kalandenw sɔngɔra u kun na. 14 O la Yezu ko: “A’ ye denmisɛnw to yen, aw kana u bali u ka na ne fɛ sabu sankolo Masaya ye u bɔɲɔgɔnw lo ta ye.” 15 A y’a bolo la u kan, o kɔ a bɔra yen.
16 Ayiwa, kanbele dɔ gwɛrɛla Yezu la k’a ɲininga ko: “Karamɔgɔ, ne ka ɲi ka koo ɲuman juman lo kɛ walisa ka ɲɛnamaya banbali sɔrɔ?” 17 Yezu y’a jaabi ko: “Mun na i be ne ɲininga koo ɲuman koo la? Ala kelenpe lo ka ɲi. Nga, n’i b’a fɛ ka ɲɛnamaya banbali sɔrɔ, to ka Ala ka sariyaw labato.” 18 Kanbele y’a ɲininga ko: “Sariya jumanw?” Yezu y’a fɔ a ye ko: “I man kan ka mɔgɔ faga, i man kan ka ɲamɔgɔya kɛ, i man kan ka sonyali kɛ, kana ngalon seereya kɛ, 19 i faa n’i baa bonya ani i ka kan k’i mɔgɔɲɔgɔn kanu i n’a fɔ i yɛrɛ.” 20 Kanbele y’a fɔ a ye ko: “N’ b’o sariyaw bɛɛ labato ka ban. Mun lo be n’ jɛn tugun?” 21 Yezu y’a jaabi ko: “N’i b’a fɛ ka kɛ mɔgɔ dafanin ye, taga i bololafɛnw bɛɛ feere k’o wari di fantanw ma. O la, i bena nafolo sɔrɔ sankolo la. O kɔ, na tugu ne kɔ.” 22 Kanbele y’o mɛn tuma min na, a dusu kasinin tagara sabu bololafɛn caaman tun b’a fɛ. 23 O kɔ, Yezu y’a fɔ a ka kalandenw ye ko: “Tiɲɛn na, ne b’a fɔ aw ye ko a bena gwɛlɛya nafolotigi ma ka don sankolo Masaya kɔnɔ. 24 Ne b’a fɔ aw ye tugun ko ɲɔgɔmɛ tɛmɛko ka nɔgɔ miseliwo fɛ ka tɛmɛ nafolotigi donko kan Ala ka Masaya kɔnɔ.”
25 Kalandenw y’o mɛn tuma min na, u kabakoyara kosɔbɛ ani u y’a fɔ ko: “N’o lo, jɔn lo be se ka kisi?” 26 Yezu y’u filɛ ka ɲɛ, k’a fɔ ko: “Adamadenw fɛ o tɛ se ka kɛ, nga Ala be se koo bɛɛ la.”
27 O la Piyɛri ko: “A filɛ, an ye fɛɛn bɛɛ to yen ka tugu i kɔ. An bena mun lo sɔrɔ?” 28 Yezu y’a fɔ u ye ko: “Tiɲɛn na ne b’a fɔ aw ye ko ni fɛɛn bɛɛ nana kɛ kura ye tuma min na, mɔgɔ Dencɛ bena sigi a ka masasigilan nɔɔrɔman kan. Aw minw tugura ne kɔ, aw bena sigi masasigilan 12 kan ka Israɛl siya 12 nunu kiti. 29 Mɔgɔ o mɔgɔ y’a ka soo wala a balimacɛw, a balimamusow, a faa, a baa, a deenw wala a ka forow to yen ne kosɔn, a bena o ɲɔgɔn caaman sɔrɔ ani ka ɲɛnamaya banbali sɔrɔ cɛɛn ye.
30 “Nga ɲɛmɔgɔ caaman bena kɛ kɔmɔgɔw ye, ani kɔmɔgɔw bena kɛ ɲɛmɔgɔw ye.