Matiyo ka kibaro diiman

9 Yezu donna kurun kɔnɔ ka baji cɛtigɛ ka kɔsegi a ka dugu la. 2 A filɛ, mɔgɔw ye murukucɛ dɔ ta a ka dilan kan ka na n’a ye Yezu fɛ. Yezu y’a ye ko o mɔgɔw limaniyanin lo minkɛ, a y’a fɔ murukucɛ ye ko: “I jaa gwɛlɛya n’ dencɛ, i ka jurumuw yafara.” 3 Sariya karamɔgɔ dɔw y’a fɔ u kɔnɔ ko: “Cɛɛ nin be Ala tɔgɔ tiɲɛna.” 4 Yezu ye u kɔnɔnako lɔn minkɛ, a ko: “Mun na aw be ni miiriya jugu ye ten? 5 K’a fɔ cɛɛ nin ye ko ‘i ka jurumuw yafara,’ wala k’a fɔ a ye ko ‘wuli ka tagama,’ juman lo fɔ ka nɔgɔ? 6 Ayiwa, n’ bena a yira aw la ko see dira mɔgɔ Dencɛ ma dugukolo kan ka jurumuw yafa.” O kɔ, a y’a fɔ murukucɛ ye ko: “Wuli k’i ka dilan ta ka taga soo.” 7 O la, o cɛɛ wulila ka taga soo. 8 Jama y’o koo ye tuma min na, u siranna kosɔbɛ ani u ye Ala tando, ale min y’o see di adamadenw ma.

9 Yezu bɔra o yɔrɔ la tuma min na, a ye cɛɛ dɔ siginin ye lanpominɛyɔrɔ la min tɔgɔ ko Matiyo. A y’a fɔ a ye ko: “Tugu ne kɔ.” O la, a wulila ka tugu a kɔ. 10 O kɔ, ka Yezu to dumuni na n’a ka kalandenw ye boon kɔnɔ, lanpominɛlaw ni jurumukɛla caaman nana to ka dumuni kɛ n’u ye. 11 Fariziɲɛw y’o ye tuma min na, u y’a fɔ a ka kalandenw ye ko: “Mun na aw ka karamɔgɔ be dumuni kɛra ni lanpominɛlaw ni jurumukɛlaw ye?” 12 Yezu y’o mɛn minkɛ, a ko: “Mɔgɔ minw ka kɛnɛ, olu mako tɛ dɔgɔtɔrɔ la. Nga minw man kɛnɛ, olu lo mako b’a la. 13 A’ ye taga a ɲini ka kuma nin kɔrɔ faamu: ‘Ne be makari lo fɛ, saraka tɛ.’ Bari ne ma na mɔgɔ tilenninw lo weele, nga jurumutɔw.”

14 O kɔ, Zan ka kalandenw ye Yezu ɲininga ko: “Mun na anw ni Fariziɲɛw be to ka suun don k’a sɔrɔ e ka kalandenw tɛ suun don?” 15 Yezu y’u jaabi ko: “Kɔɲɔcɛ teriw dusu tɛ se ka kasi k’u ni kɔɲɔcɛ to ɲɔgɔn fɛ. Tiɲɛn tɛ? Nga, loon dɔ bena se kɔɲɔcɛ bena bɔ u bolo. N’o kɛra, u bena suun don. 16 Mɔgɔ tɛ fani kura tigɛ ka fani kɔrɔ bari n’a ye. N’o tɛ, fani kura bena fani kɔrɔ sama k’a faran ani o faranyɔrɔ bena juguya ni fɔlɔ ta ye. 17 O cogo kelen na, mɔgɔ tɛ diwɛn kura don foroko kɔrɔmanw kɔnɔ. N’o tɛ, o forokow bena ci, diwɛn be bɔn ani forokow tɛ se ka foyi ɲɛ tugu. Nga mɔgɔ be diwɛn kura don foroko kuraw lo kɔnɔ. O la, foyi tɛ diwɛn n’a forokow sɔrɔ.”

18 K’a to kuma na, kuntigi dɔ gwɛrɛla a la, k’a kunbiri gwan* ani k’a fɔ a ye ko: “Sisan b’a sɔrɔ n’ denmuso sara. Nga, na i bolo la a kan, o la a bena kunu.”

19 Yezu n’a ka kalandenw wulila ka tugu a kɔ. 20 A filɛ, jolibɔn bana tun be muso dɔ la kabi saan 12. A gwɛrɛla Yezu la a kɔfɛ ani ka maga a ka fani dakun na. 21 A tun b’a fɔra a kɔnɔ ko: “Ni n’ magara a ka fani dɔrɔn na, n’ bena kɛnɛya.” 22 Yezu yɛlɛmana k’a ye ani k’a fɔ a ye ko: “I jagwɛlɛya n’ denmuso. I kɛnɛyara i ka limaniya barika la.” O yɔrɔnin bɛɛ, o muso kɛnɛyara.

23 Yezu sera o kuntigi ka soo tuma min na, a ye filen fiyɛbagaw ni jama ye u be mankan kɛra. 24 Yezu y’a fɔ u ye ko: “A’ ye bɔ yan, sabu deen nin ma sa a be sinɔgɔra le.” Nga mɔgɔw y’a daminɛ ka yɛlɛ a la. 25 Jama bɔra tuma min na, Yezu donna ka deen minɛ a bolo ma ani a wulila. 26 Ayiwa, o kibaro jɛnsɛnna o mara yɔrɔ bɛɛ la.

27 Yezu tagatɔ, fiyentɔ fila tugura a kɔ n’u be kulera ko: “Dawuda Dencɛ, makari an na.” 28 Yezu donna boon kɔnɔ tuma min na, fiyentɔ nunu gwɛrɛla a la ani Yezu y’u ɲininga ko: “Aw lanin b’a la ko ne be se k’o kɛ wa?” U y’a jaabi ko: “Ɔnhɔn, Matigi.” 29 O la, Yezu magara u ɲɛɛw na k’a fɔ ko: “Aw limaniyanin lo minkɛ, aw ɲɛɛw ka yɛlɛ.” 30 Ani u ɲɛɛw yɛlɛla. Nga Yezu ye kangari la u ye ko: “Ayiwa, aw kana o fɔ mɔgɔ si ye.” 31 Nga u bɔnin kɔ dɔrɔn, u kumana Yezu koo la o mara yɔrɔ bɛɛ la.

32 O cɛɛw tun be tagara tuma min na, mɔgɔw nana ni jinatɔcɛ dɔ ye Yezu fɛ. O cɛɛ tun ye bobo ye fana . 33 Yezu ye jina gwɛn ka bɔ a la ani o cɛɛ y’a daminɛ ka kuma. Jama kabakoyara ani k’a fɔ ko: “An ma deli ka nin ɲɔgɔn ye Israɛl jamana na.” 34 Nga Fariziɲɛw tun b’a fɔra ko: “A be jinaw gwɛnna jinaw kuntigi lo barika la.”

35 Yezu tun be taga dugubaw ni dugudenninw na ka to ka mɔgɔw kalan u ka kalansow la. A tun be Masaya kibaro diiman fɔ u ye ani ka banabagatɔw ni farikolo dɛsɛbagatɔ sifaw bɛɛ kɛnɛya. 36 Yezu ye jama ye tuma min na, u hinɛ donna a la sabu u tun tɔɔrɔnin lo ani dɛmɛbaga tun t’u la, i n’a fɔ dɛndɛbaga tɛ saga minw na. 37 O kɔ, a y’a fɔ a ka kalandenw ye ko: “Suman tigɛta ka ca, nga baarakɛlaw man ca. 38 O la, aw ka forotigi deli a ka baarakɛlaw ci u ka na a ka suman tigɛ.”