Matiyo ka kibaro diiman

20 “Sabu sankolo Masaya be i n’a fɔ soo kuntigi dɔ, min bɔra sɔgɔmada joona ka taga baarakɛlaw ɲini walisa u ka taga baara kɛ a ka ɛrɛzɛnforo kɔnɔ. 2 A bɛnna ni baarakɛla dɔw ye ko a bena u sara wari deniye kelen tile kɔnɔ. O kɔ, a y’u bila ka taga a ka ɛrɛzɛnforo kɔnɔ. 3 A bɔra tugun sɔgɔma 9h* fan fɛ ka dɔw lɔnin ye lɔgɔfiyɛ la u tɛ baara la. 4 A y’a fɔ olu ye ko: ‘Aw fana ka taga baara kɛ n’ ka ɛrɛzɛnforo la ani aw ka kan ni sara min ye, n’ bena o di aw ma.’ 5 O la, u tagara a ka foro la. A segira ka bɔ midi* fan fɛ ani 15h* wagati la, k’o ɲɔgɔn kɛ. 6 O kɔ 17h* fan fɛ, a segira ka bɔ ka mɔgɔ dɔw lɔnin ye. A y’u ɲininga ko: ‘Mun na aw tora yan tile kuru bɛɛ la aw ma baara kɛ?’ 7 U y’a jaabi ko: ‘Mɔgɔ si m’an ta baara la.’ A y’a fɔ u ye ko: ‘Aw fana ka taga baara kɛ ne ka ɛrɛzɛnforo la.’

8 “Wulada sera tuma min na, forotigi y’a fɔ a ka baarakɛlaw kuntigi ye ko: ‘Baaradenw weele k’u ka sara di u ma. Minw nana laban na, a daminɛ n’olu ye ka na se fɔlɔw ma.’ 9 Minw ye baara daminɛ 17h fan fɛ, olu nana, ani wari deniye kelen kelen dira u ma. 10 Minw kɔnna ka baara daminɛ, olu tun b’a miiri ko dɔ bena fara u ka sara kan, nga wari deniye kelen kelen lo dira olu fana ma. 11 U ka wari minɛtɔ, u tora ka ŋunuŋunu forotigi kɔrɔ. 12 U ko: ‘Nunu nana an bɛɛ kɔfɛ ani u ye baara kɛ lɛri kelen dɔrɔn. I do y’u ka sara kɛ kelen ye n’an ta ye k’a sɔrɔ an ye baara gwɛlɛ kɛ tile kuru bɛɛ la tile gwan gwan jukɔrɔ!’ 13 A y’u dɔ jaabi ko: ‘N’ teri, ne m’i tɔɲɔ. An tun ma bɛn a la ko n’ bena i sara wari deniye kelen le wa? 14 Ayiwa, i ka sara minɛ ka taga. Min nana laban na, n’ b’a fɛ k’a ka sara kɛ kelen ye n’i ta ye. 15 Yala joo tɛ n’ fɛ ka n’ sago kɛ ni n’ bololafɛnw ye wa? Wala n’ ye ɲumanya min kɛ* u ye, o ɲangoya lo b’i la* wa?’ 16 O cogo la le kɔmɔgɔw bena kɛ ɲɛmɔgɔw ye ani ɲɛmɔgɔw bena kɛ kɔmɔgɔw ye.”

17 Yezu yɛlɛtɔ Zeruzalɛmu, a y’a ka kalanden 12 nunu weele dan na k’a fɔ u ye ko: 18 “Ayiwa, an be yɛlɛla Zeruzalɛmu. U bena mɔgɔ Dencɛ don sarakalasebagaw kuntigiw ani Sariya karamɔgɔw bolo yen. U bena jalaki ben a kan ko a ka kan ka faga. 19 U bena a don siya wɛrɛ mɔgɔw bolo walisa u k’a lɔgɔbɔ, k’a bugɔ ni golokami ye ani k’a gwengwe* lɔgɔ kan. Nga tile sabanan loon, a suu bena kunu.”

20 O kɔ, Zebede muso gwɛrɛla Yezu la n’a dencɛw ye, k’a kunbiri gwan* a ɲɛɛ kɔrɔ. A tun b’a fɛ ka fɛɛn dɔ deli a fɛ. 21 Yezu y’a ɲininga ko: “I be mun lo fɛ?” Muso y’a jaabi ko: “A to n’ dencɛ fila nunu ka sigi i gɛrɛfɛ i ka Masaya la. Kelen ka sigi i kinibolo fɛ, tɔkelen ka sigi i numanbolo fɛ.” 22 Yezu y’a fɔ ko: “Aw t’a lɔn aw be fɛɛn min delila. Ne bena fɛɛn min min, aw bena se k’o min wa?” U y’a jaabi ko: “An bena se k’a min.” 23 A y’a fɔ u ye ko: “Tiɲɛn lo aw bena o min, nga ne lo t’a latigɛ mɔgɔ min bena sigi n’ kinibolo wala n’ numanbolo fɛ. N’ Faa y’o yɔrɔw labɛn mɔgɔ minw ye, olu lo bena sigi yen.”

24 Kalanden tan nunu bɔra o kala ma tuma min na, u dimina balima fila nunu kɔrɔ. 25 Nga Yezu y’u weele k’a fɔ u ye ko: “Aw b’a lɔn ko siyaw ka masaw be kuntigiya kɛ u kan ani mɔgɔbabaw b’u fanga digi u kan. 26 Nga, a man kan ka kɛ ten aw cɛma. Mɔgɔ min b’a fɛ ka kɛ mɔgɔba ye aw cɛma, a ka kan ka kɛ aw ka baaraden ye, 27 ani mɔgɔ min b’a fɛ ka kɛ fɔlɔ ye aw cɛma, o tigi ka kan ka kɛ aw ka jɔɔn ye. 28 O cogo la, mɔgɔ Dencɛ ma na walisa mɔgɔw ka baara kɛ a ye, nga a nana walisa ka baara kɛ mɔgɔw ye ani k’a niin di k’a kɛ mɔgɔ caaman kunmabɔsara ye.”

29 U bɔtɔ Zeriko, jamaba dɔ tugura Yezu kɔ. 30 A filɛ! Fiyentɔ fila tun siginin be sirada la. U y’a mɛn tuma min na ko Yezu lo be tɛmɛna, u pɛrɛnna ko: “Matigi, Dawuda Dencɛ, makari an na!” 31 Jama sɔngɔra u kun na k’u ka je. Nga, u pɛrɛnna ka tɛmɛ fɔlɔ kan ko: “Matigi, Dawuda Dencɛ, makari an na!” 32 O la, Yezu lɔra, k’u weele ani k’u ɲininga ko: “Aw b’a fɛ n’ ka mun lo kɛ aw ye?” 33 U y’a jaabi ko: “Matigi, a kɛ an ɲɛɛw ka yɛlɛ.” 34 U hinɛ donna Yezu la, ani a magara u ɲɛɛw na. O yɔrɔnin bɛɛ u ɲɛɛw yɛlɛla, ani u tugura a kɔ.