Matiyo ka kibaro diiman
8 Yezu jigira ka bɔ kulu kan tuma min na, jamaba dɔ tugura a kɔ. 2 Ani a filɛ, kunatɔcɛ dɔ gwɛrɛla a la, k’a kunbiri gwan ani k’a fɔ a ye ko: “Matigi, n’i b’a fɛ, i be se ka ne kɛnɛya.”* 3 O la, Yezu y’a bolo jan ka maga a la ani k’a fɔ ko: “N’ b’a fɛ, kɛnɛya!” O yɔrɔnin bɛɛ, kunatɔcɛ kɛnɛyara. 4 O kɔ, Yezu y’a fɔ a ye ko: “I daa minɛ, kana o fɔ mɔgɔ si ye. Nga, taga i yɛrɛ yira sarakalasebaga la. Musa ye saraka min kofɔ, i k’o bɔ k’a yira sarakalasebagaw la ko i kɛnɛyara.”
5 Yezu donna Kapɛrinawum dugu kɔnɔ tuma min na, sɔrɔdasi kuntigi dɔ gwɛrɛla a la, ani k’a deli ko a k’ale ka baaraden dɛmɛ. 6 A y’a fɔ Yezu ye ko: “Matigi, n’ ka baaraden man kɛnɛ. A murukunin lanin lo soo ani a tɔɔrɔnin lo kosɔbɛ.” 7 Yezu y’a fɔ a ye ko: “Ni n’ sera i ka soo, n’ bena a kɛnɛya.” 8 Sɔrɔdasi kuntigi y’a jaabi ko: “Matigi, e ka don ne ka soo, ne man kan n’o ye. E k’a fɔ dɔrɔn ko n’ ka baaraden ka kɛnɛya ani a bena kɛnɛya. 9 Sabu, ne fana be ni kuntigiw ye ani n’ be sɔrɔdasi dɔw kun na. Ni n’ y’a fɔ u dɔ ye ko ‘taga!’ a be taga, k’a fɔ dɔ wɛrɛ ye ko ‘na!’ a be na. Ani ni n’ y’a fɔ n’ ka jɔɔn ye ko ‘nin kɛ!’ a b’o kɛ.” 10 Yezu y’o mɛn tuma min na, a kabakoyara, ani mɔgɔ minw tun be tugura a kɔ, a y’a fɔ u ye ko: “Tiɲɛn na, ne b’a fɔ aw ye ko n’ ma mɔgɔ si ye Israɛl min ka limaniya barika ka bon ten. 11 Ne b’a fɔ aw ye ko mɔgɔ caaman bena bɔ kɔrɔn ni tileben fɛ, ka na sigi dumuni na ni Ibrayima, Isiyaka ani Yakuba ye Ala ka Masaya kɔnɔ. 12 Nga sankolo Masaya deenw bena fili kɛnɛma dibi la. O yɔrɔ la, u bena kasi ani k’u ɲiin ɲimi.” 13 O kɔ, Yezu y’a fɔ sɔrɔdasi kuntigi ye ko: “Taga soo. I y’a yira ko i limaniyanin lo minkɛ, i ye min ɲini n’ fɛ, o ka kɛ.” O yɔrɔnin bɛɛ, baaraden kɛnɛyara.
14 O kɔ, Yezu tagara Piyɛri ka soo. A tagara Piyɛri buranmuso lanin sɔrɔ farigwan b’a la. 15 Yezu magara a bolo la, ani a ka farigwan banna. A wulila, k’a daminɛ ka Yezu mako ɲɛ. 16 Wulada sera tuma min na, mɔgɔw nana ni jinatɔ caaman ye Yezu fɛ. A ye kuma kelen dɔrɔn fɔ ka jinaw gwɛn ka bɔ u la ani a ye banabagatɔw bɛɛ kɛnɛya. 17 O la, kira Ezayi tun ye min fɔ, o dafara. A tun ko: “A ye an ka banaw n’an ka tɔɔrɔw bɔ an kan.”
18 Yezu y’a ye tuma min na ko jamaba y’ale lamini, a y’a fɔ a ka kalandenw ye ko u ka taga baji kɔfɛ. 19 O kɔ, Sariya karamɔgɔ dɔ gwɛrɛla a la k’a fɔ a ye ko: “Karamɔgɔ, i mana taga yɔrɔ o yɔrɔ, ne bena tugu i kɔ.” 20 Nga, Yezu y’a fɔ a ye ko: “Kongowuluw be ni dingɛw ye, kɔnɔw fana be ni ɲagaw ye. Nga mɔgɔ Dencɛ tɛ ni kunlayɔrɔ ye.” 21 O kɔ, a ka kalanden dɔ y’a fɔ a ye ko: “Matigi, a to n’ ka taga n’ facɛ suu don fɔlɔ.” 22 Yezu y’a fɔ a ye ko: “E ka tugu ne kɔ dɔrɔn ka suuw to u k’u ka suuw don.”
23 O kɔ, Yezu donna kurun kɔnɔ ani a ka kalandenw tugura a kɔ. 24 Nga a filɛ! Sanfɔɲɔba dɔ wulila baji kan, ani jikuruw tun be ɲini ka kurun tunu jii kɔnɔ. O y’a sɔrɔ Yezu tun be sinɔgɔra. 25 A ka kalandenw y’a kunu k’a fɔ a ye ko: “Matigi, an kisi, n’o tɛ an bena sa!” 26 Nga, a y’u ɲininga ko: “Mun na aw sirannin* lo ten? Aw ka limaniya barika ka dɔgɔ dɛ!” O kɔ, a wulila ka sɔngɔ fɔɲɔ ni baji kun na, o la yɔrɔ sumana tɔn tɔn tɔn. 27 Kalandenw kabakoyara kosɔbɛ ani u ko: “Nin cɛɛ nin ye mɔgɔ sifa juman lo ye? Hali fɔɲɔ ni baji yɛrɛ be mɛnni kɛ a fɛ.”
28 A sera baji kɔfɛ tuma min na, Gadara mara la, jinatɔ fila bɔra kaburutu la ka na a kunbɛn. O cɛɛw tun ka fari fɔɔ a tun tɛ kun mɔgɔ si la a k’o sira ta. 29 U y’a daminɛ ka pɛrɛn ko: “Ala Dencɛ, mun be anw n’ele cɛ? I nana an tɔɔrɔ yɔrɔ k’a sɔrɔ wagati latigɛnin ma se wa?” 30 O y’a sɔrɔ lɛkuluba dɔ tun be dumuni kɛra o yɔrɔ fan fɛ. 31 O la, jina nunu y’a daminɛ ka Yezu deli ko: “N’i bena an gwɛn, a to an ka taga don lɛɛ nunu na.” 32 A y’u jaabi ko: “A’ ye taga!” Jina nunu bɔra o cɛɛw la ka taga don lɛɛw la. O la, o lɛkulu girinna ka bɔ kulu sanfɛ ka ben baji kɔnɔ ani ka sa yen. 33 Lɛɛ dɛndɛbagaw bolila ka taga dugu kɔnɔ, ka lɛɛw ni jinatɔcɛ fila nunu ka koow bɛɛ lakali mɔgɔw ye. 34 O kɔ, dugumɔgɔw bɛɛ bɔra ka taga Yezu sɛgɛrɛ. U y’a ye tuma min na, u y’a deli ko a ka sabari ka bɔ u ka mara la.