Matiyo ka kibaro diiman

11 Yezu ye cikanw di a ka kalanden 12 nunu ma ka ban tuma min na, a bɔra yen ka taga mɔgɔw kalan ani ka waajuli kɛ u ka duguw la.

2 Ayiwa, ka Zan to kaso la, a y’a mɛn Krista be baara min kɛra. A y’a ka kalandenw ci 3 ka taga a ɲininga ko: “Mɔgɔ min ka kan ka na, ele lo wa wala an ka ɲi ka mɔgɔ wɛrɛ kɔnɔ?” 4 Yezu y’u jaabi ko: “Aw ye min ye ani aw ye min mɛn, a’ ye taga o lakali Zan ye: 5 fiyentɔw be yeli kɛra sisan, senkelenninw be tagamana ka ɲɛ, kunatɔw be kɛnɛyara,* tulogwerenw be mɛnni kɛra, suuw kununa ani kibaro diiman be fɔra fantanw ye. 6 Mɔgɔ min ma foyi ye ne la min be se k’a kunnatiɲɛ, o tigi dagamunin lo.”

7 Zan ka kalandenw tagatɔ, Yezu y’a daminɛ ka kuma ni jama ye Zan koo la. A ko: “Aw bɔra ka taga mun lo filɛ kongokolon kɔnɔ? Fɔɲɔ be kala min fifara wa? 8 Aw tagara mun lo filɛ? Cɛɛ min ye dakabanan fani* don wa? Ayiwa, mɔgɔ minw be dakabanan faniw don, olu be masasow lo kɔnɔ. 9 O la, aw tagara mun lo filɛ? Kira wa? Tiɲɛn na, ne b’a fɔ aw ye ko a tɛmɛna kira yɛrɛ kan. 10 A sɛbɛra ale lo koo la ko: ‘A filɛ, ne be n’ ka ciden bila ka taga i ɲɛ.* A bena sira labɛn i ye!’ 11 Tiɲɛn na, ne b’a fɔ aw ye ko mɔgɔ si ma wolo duniɲa na min kɛra mɔgɔba ye ka tɛmɛ Zan Batizelikɛla kan. Nga mɔgɔ min lɔyɔrɔ ka dɔgɔ ni bɛɛ ye sankolo Masaya kɔnɔ, o tigi ka bon ni Zan ye. 12 Kabi Zan natuma fɔɔ ka na se sisan ma, mɔgɔw b’u jijara kosɔbɛ ka sankolo Masaya sɔrɔ ani minw b’u jijara o cogo la, olu b’a sɔrɔ. 13 Sariya ni kiraw bɛɛ ye koo nataw kofɔ fɔɔ ka na se Zan ma. 14 Aw sɔnna a ma wo, aw ma sɔn a ma wo, ale lo ye ‘Eli ye min ka ɲi ka na.’ 15 Tulo be mɔgɔ min fɛ, o tigi ka mɛnni kɛ.

16 “N’ be se ka bi mɔgɔw suma ni jɔn lo ye? U be komi denmisɛn dɔw, minw siginin be lɔgɔfiyɛ la ani u be kulera k’a fɔ u tulonkɛɲɔgɔnw ye ko: 17 ‘An ye filen fiyɛ aw ye, nga aw ma dɔɔn kɛ. An ye sanga dɔnkili la aw ye, nga aw ma kasi.’* 18 O cogo kelen na, Zan nana. Komi a tun tɛ dumuni kɛ, ka minni kɛ, mɔgɔw y’a fɔ ko ‘jina lo b’a kɔ.’ 19 Mɔgɔ Dencɛ nana, a be dumuni kɛ ani ka diwɛn min. Nga mɔgɔw ko ‘aw y’a filɛ nugubatɔ ni dɔrɔtɔ lo, lanpominɛlaw ni jurumukɛlaw teri lo fana.’ Nga, hakilitigiya be lɔn* kɛwalew lo fɛ.”

20 O kɔ, Yezu tun y’a ka kabakow fanba kɛ dugu minw na, a y’a daminɛ k’u jalaki sabu o dugumɔgɔw ma nimisa. 21 “Korazɛn, bɔnɛ ye i ta ye! Bɛtisayida, bɔnɛ ye i ta ye! Sabu kabako minw kɛra aw kɔnɔ, n’o ɲɔgɔn tun kɛra Tiri ni Sidɔn, sisan y’a sɔrɔ o dugumɔgɔw nimisara a mɛɛnna. U tun bena dusukasifani don ani ka sigi buguri kɔnɔ. 22 Ne b’a fɔ aw ye ko kitilon bena nɔgɔya Tiri ni Sidɔn duguw ma ka tɛmɛ aw kan. 23 Ele Kapɛrinawum, i b’a miiri ko i bena kɔrɔta fɔɔ ka se sankolo la wa? Ayi, i bena jigi Kaburu* lo kɔnɔ. Sabu kabako minw kɛra i kɔnɔ, n’o ɲɔgɔn tun kɛra Sodɔmu dugu la, sisan y’a sɔrɔ o dugu bele be yen. 24 Ne b’a fɔ i ye ko kitilon bena nɔgɔya Sodɔmu ma ka tɛmɛ ele kan.”

25 O wagati la, Yezu y’a fɔ ko: “Ne Faa, sankolo ni dugukolo Matigi, n’ b’i tando jama cɛma sabu i y’o koow dogo hakilitigiw ni lɔnnikɛlaw la k’o yira denmisɛnw na. 26 Ɔnhɔn, n’ Faa, i y’a kɛ ten sabu o kɛcogo lo ka di i ye. 27 N’ Faa ye fɛɛn bɛɛ kalifa n’ ma. Mɔgɔ si tɛ Dencɛ lɔn ka ɲɛ ni Faa tɛ. Mɔgɔ si tɛ Faa lɔn ka ɲɛ fana ni Dencɛ tɛ, ani Dencɛ b’a fɛ k’a yira mɔgɔ min na. 28 Aw minw sɛgɛnnin lo ani doni gwiliman b’aw kan, a’ ye na ne fɛ, ne bena aw lafiya. 29 A’ ye ne ka zuu la aw kaan na k’a to ne ka aw kalan sabu ne sabarinin lo, ne majiginin lo fana. O la, aw* bena lafiya. 30 Sabu ne ka zuu ta ka nɔgɔ* ani n’ ka doni ka fɛgɛn.”