Matiyo ka kibaro diiman

4 O kɔ, hakili senu tagara ni Yezu ye kongokolon kɔnɔ ani Sutana* y’a kɔrɔbɔ. 2 Yezu ye suun don tile 40 ni suu 40 ani kɔngɔ y’a minɛ. 3 O kɔ, Kɔrɔbɔlikɛla gwɛrɛla a la k’a fɔ a ye ko: “N’i ye Ala dencɛ ye, a fɔ kabakuru nunu ye k’u ka yɛlɛma ka kɛ buru ye.” 4 Nga Yezu y’a jaabi ko: “A sɛbɛnin be Ala ka Kuma kɔnɔ ko: ‘Mɔgɔ tɛ balo ni dumuni* dama ye, nga kuma o kuma be bɔ Jehova daa la, a be balo n’o ye fana.’”

5 O kɔ Sutana tagara n’a ye dugu senuman kɔnɔ, k’a bila Alabatosoba kogo sanfɛ legelege 6 ani k’a fɔ a ye ko: “N’i ye Ala dencɛ ye, i yɛrɛ fili duguma sabu a sɛbɛnin be ko: ‘A bena cii di a ka mɛlɛkɛw ma i koo la, ani u bena i ta u bolo walisa i seen kana gosi kabakuru la.’” 7 Yezu y’a fɔ a ye ko: “A sɛbɛnin be fana ko: ‘I man ɲi ka Jehova i ka Ala kɔrɔbɔ.’”

8 O kɔ, Sutana tagara n’a ye kulu jamanjanba dɔ kan, ka duniɲa ka masayaw bɛɛ n’u ka nɔɔrɔ yira a la. 9 Ani a y’a fɔ a ye ko: “N’ bena nunu bɛɛ d’i ma, n’i y’i kunbiri gwan ka ne bato siɲɛ kelenpe.” 10 Yezu y’a jaabi ko: “Taga ka bɔ yan Sutana! Bari, a sɛbɛnin be ko: ‘I ka ɲi ka Jehova i ka Ala lo bato ani ka baara senuman kɛ ale kelenpe lo ye.’” 11 O kɔ, Sutana tagara k’a to yen. Ani a filɛ, mɛlɛkɛw nana to k’a mako wasa.

12 Ayiwa, Yezu y’a mɛn tuma min na k’u ye Zan minɛ k’a don kaso la, a tagara Galile. 13 Kɔfɛ, a bɔra Nazarɛti ka taga sigi Kapɛrinawum kɔgɔjida la, Zabulɔn ni Nɛfutali mara la. 14 O la, kira Ezayi tun ye min fɔ, o dafara. A tun ko: 15 “Ele Galile, siya wɛrɛw siginin be e min na, Zabulɔn ani Nɛfutali jamanaw, aw minw be kɔgɔjisira daa la, Zurudɛn baji kɔfɛ! 16 Mɔgɔ minw siginin be dibi la, olu ye yeelenba ye ani saya dibi be minw kan, yeelen bɔra olu kan.” 17 K’a ta o tuma na, Yezu y’a daminɛ ka waajuli kɛ ko: “A’ ye nimisa aw ka jurumuw na sabu sankolo Masaya surunyana.”

18 A tagamatɔ Galile bajida la, a ye balimacɛ fila dɔw ye. Simɔn min be weele ko Piyɛri ani a balimacɛ Andere. U tun b’u ka jɔɔw filila jii la sabu jɛgɛminɛlaw* tun lo. 19 A y’a fɔ u ye ko: “A’ ye tugu ne kɔ, ne bena aw kɛ mɔgɔminɛlaw ye.” 20 O yɔrɔnin bɛɛ, u y’u ka jɔɔw to yen ani ka tugu a kɔ. 21 A tagatɔ, a ye balimacɛ fila wɛrɛ ye: Zebede dencɛ Zaki n’a balimacɛ Zan. U tun b’u ka jɔɔw dilanna kurun kɔnɔ n’u facɛ ye. Yezu y’u weele. 22 U sinna k’u facɛ ni kurun to yen ka tugu a kɔ.

23 O kɔ, a tora ka Galile yɔrɔ bɛɛ yaala yaala. A tun be mɔgɔw kalan kalansow la, ani ka Masaya kibaro diiman fɔ. Ani a tun be farikolodɛsɛbagatɔw ni banabagatɔ sifa bɛɛ kɛnɛya. 24 Mɔgɔw tun b’a kofɔ Siri mara bɛɛ la. U tun be na ni mɔgɔ nunu ye a yɔrɔ ani a tun b’u kɛnɛya: minw bɛɛ tun man kɛnɛ ani u tɔɔrɔnin lo, jinabana wala kirikirimasiɲɛ tun be minw na, ani namaraw. 25 O kama, jamaba tun be tugu a kɔ ka bɔ Galile, Dekapɔli,* Zeruzalɛmu, Zude ani Zurudɛn baji kɔfɛ.