Matiyo ka kibaro diiman
14 O wagati la, Galile mara gofɛrɛnɛrɛ Erɔdi* ye Yezu koo mɛn. 2 A y’a fɔ a ka baaradenw ye ko: “Zan Batizelikɛla lo. A suu kununa, o lo kama a be sera ka kabakow kɛ.” 3 Erɔdi tun y’a kɛ u ye Zan minɛ k’a siri ani k’a don kaso la a balimacɛ Filipu muso Erodiyadi kosɔn, 4 sabu Zan tun be to k’a fɔ a ye ko: “A daganin tɛ i k’a kɛ i muso ye.” 5 Erɔdi tun b’a fɛ ka Zan faga, nga a tun be siranna jama ɲɛ sabu u tun be Zan jati kira ye. 6 Erɔdi wololon sanyɛlɛma ɲɛnagwɛ la, Erodiyadi denmuso wulila ka dɔɔn kɛ, ani a koo diyara Erɔdi ye kosɔbɛ 7 fɔɔ a kalila ko a mana fɛɛn o fɛɛn deli, ale bena o d’a ma. 8 O la, a bamuso y’a kɔnɔnasu ko a k’a fɔ ko: “Zan Batizelikɛla kungolo don minan dɔ la k’a di ne ma yan.” 9 O ye masacɛ dusu tiɲɛ. Nga komi a tun kalila a dumunikɛɲɔgɔnw ɲɛɛ na, a ye cii di k’u ka Zan kungolo d’a ma. 10 A ye mɔgɔw ci u tagara Zan kungolo tigɛ kasobon na. 11 U y’a don minan dɔ kɔnɔ ka n’a di sunguru nin ma ani a tagara a di a bamuso ma. 12 Kɔfɛ, Zan ka kalandenw nana a suu ta ka taga a don. O kɔ, u tagara o ɲɛfɔ Yezu ye. 13 Yezu y’o mɛn tuma min na, a donna kurun kɔnɔ ka taga yɔrɔ dɔ la walisa ka to a kelen. Nga mɔgɔw bɔra o kala ma ani u bɔra duguw kɔnɔ ka tugu a kɔ seen na.
14 Yezu bɔtɔ kurun kɔnɔ, a ye jamaba dɔ ye. U hinɛ donna a la ani a y’u ka banabagatɔw kɛnɛya. 15 Wulada sera tuma min na, a ka kalandenw gwɛrɛla a la k’a fɔ a ye ko: “Suu be ɲini ka ko, yɔrɔ nin do samanin lo dugu la. A fɔ jama ye u ka taga duguw kɔnɔ ka dumuni san u yɛrɛ ye.” 16 Nga Yezu y’a fɔ u ye ko: “Kuun t’a la u ka taga. Aw yɛrɛ ka dumuni di u ma.” 17 U y’a fɔ a ye ko: “Burukun duuru ni jɛgɛ deen fila dɔrɔn lo b’an fɛ yan.” 18 A y’a fɔ u ye ko: “A’ ye na n’u ye yan.” 19 O kɔ, a y’a fɔ jama ye k’u ka sigi biin kan. A ye burukun duuru ni jɛgɛ deen fila nunu ta, k’a ɲɛɛ kɔrɔta sanfɛ ka barika la Ala ye. A ye burukun nunu kari kari k’u di a ka kalandenw ma. Kalandenw y’u tilan tilan jama ye. 20 O la, u bɛɛ ye dumuni kɛ ka fa. Min tora, kalandenw y’o cɛ ka segi 12 fa. 21 Cɛɛ 5 000 ɲɔgɔn lo ye dumuni kɛ, musow ni denmisɛnw ma jati. 22 Dɔɔni dɔrɔn o kɔ, a y’a fɔ a ka kalandenw ye k’u ka don kurun kɔnɔ ka bila ale ɲɛ baji kɔfɛ, ale ben’a sira di jama ma.
23 Jama taganin kɔ, a yɛlɛla kulu kan walisa ka Ala deli. Suu kora k’a to o yɔrɔ la a kelen. 24 O y’a sɔrɔ kurun yɔrɔ tun janyara kosɔbɛ* dugukolo la. Kalandenw tun tɛ sera ka kurun boli jikuruw kosɔn sabu fɔɲɔ tun b’u kunbɛnna. 25 Dugugwɛda fɛ, Yezu tagamana jii kan ka taga a ka kalandenw yɔrɔ. 26 A ka kalandenw y’a tagamatɔ ye jii kan tuma min na, u hakili ɲagamina ani u y’a fɔ ko: “Nin ye mun le ye ten!”* U kulera fana siranya bolo. 27 Nga o yɔrɔnin bɛɛ, Yezu kumana u fɛ. A ko: “A’ y’aw jaa gwɛlɛya! Ne lo, aw kana siran.” 28 Piyɛri y’a jaabi ko: “Matigi n’ele lo, a fɔ ko n’ ka tagama jii kan k’i kunbɛn.” 29 Yezu ko: “Na!” O la, Piyɛri jigira ka bɔ kurun kɔnɔ, ka to ka tagama jii kan ka taga Yezu fɛ. 30 Nga a y’a ye tuma min na ko fɔɲɔ barika ka bon, a siranna. A y’a daminɛ ka jigi jii jukɔrɔ. O la, a kulera ko: “Matigi, n’ kisi!” 31 Yezu sinna k’a bolo jan, k’a minɛ ani k’a fɔ a ye ko: “I ka limaniya barika ka dɔgɔ dɛ! Mun na i sigasigara?” 32 U donna kurun kɔnɔ tuma min na, fɔɲɔ lɔra. 33 O la, minw tun be kurun kɔnɔ, olu y’u kunbiri gwan Yezu kɔrɔ k’a fɔ ko: “Ele ye Ala Dencɛ lo ye tiɲɛn na.” 34 O kɔ, u ye baji tigɛ ka taga Zenezarɛti mara la.
35 O yɔrɔ mɔgɔw ye Yezu lɔn minkɛ, u ye cii bila k’a fɔ mara mɔgɔw bɛɛ ye ko Yezu nana. O la, u nana n’u ka banabagatɔw bɛɛ ye a fɛ. 36 U y’a deli ko a k’a to u ka maga a ka fani dakun dɔrɔn na. Ani minw bɛɛ magara a la, u kɛnɛyara pewu.