Matiyo ka kibaro diiman

10 Yezu y’a ka kalanden 12 nunu weele ka na. A ye see d’u ma ka jinaw gwɛn ka bɔ mɔgɔw la ani ka banabagatɔw ni farikolo dɛsɛbagatɔ sifaw bɛɛ kɛnɛya.

2 Ciden 12 nunu tɔgɔw ye nin ye: Fɔlɔ tɔgɔ ko Simɔn, u b’a weele fana ko Piyɛri ani a balimacɛ Andere, Zebede dencɛ Zaki n’a balimacɛ Zan, 3 Filipu ni Baritelemi, Toma ni lanpominɛla Matiyo, Alife dencɛ Zaki ni Tade, 4 Simɔn min kisɛyanin lo ani Zuda Isikariyɔti min ye Yezu janfa kɔfɛ.

5 Yezu y’o cɛɛ 12 nunu ci ani ka cikan di u ma ko: “Aw kana taga siya wɛrɛ mɔgɔw fɛ ani aw kana don Samarikaw ka dugu si la. 6 Nga Israɛlden minw be i ko saga tununinw, a’ ye to ka taga bɔ olu dɔrɔn lo ye. 7 Aw tagatɔ, a’ ye to ka waajuli kɛ k’a fɔ ko: ‘Sankolo Masaya surunyana.’ 8 A’ ye banabagatɔw kɛnɛya, ka suuw kunu, ka kunatɔw saniya ani ka jinaw gwɛn ka bɔ mɔgɔw la. Aw y’a sɔrɔ gwansan, aw k’a di gwansan. 9 Aw kana sanu, warigwɛ wala ziranɛgɛ ta aw kun. 10 Aw kana dumunibɔrɔ, dereke fila,* sanbara wala bere ta dugutaga kama sabu baarakɛla ka kan n’a ka dumuni ye.

11 “Aw mana don duguba wala dugudennin min na, a’ ye mɔgɔ dɔ ɲini yen min bena sɔn k’aw bisimila ka ɲɛ. A’ ye to o tigi fɛ fɔɔ aw tagatuma. 12 Aw dontɔ luu dɔ la, a’ ye lukɔnɔmɔgɔw fo. 13 N’u y’aw bisimila ka ɲɛ, aw ka hɛɛrɛ ka kɛ n’u ye. Nga n’u m’aw bisimila ka ɲɛ, aw ka hɛɛrɛ ka segi aw ma. 14 Ni luu dɔ la, wala dugu dɔ la mɔgɔw ma sɔn k’aw bisimila wala k’aw lamɛn, aw bɔtɔ yen, a’ y’aw sennabuguri furanfuran. 15 Tiɲɛn na, ne b’a fɔ aw ye ko kitilon bena nɔgɔya Sodɔmu ni Gomɔri duguw ma ka tɛmɛ o dugu kan.

16 “A filɛ, ne b’aw ci i n’a fɔ sagaw kongowuluw cɛma. O la, a’ y’aw yɛrɛ kɔrɔsi i n’a fɔ saaw ani a’ ye kɛ jalakibaliw ye i n’a fɔ jɛnɛtuganw. 17 A’ y’aw yɛrɛ kɔrɔsi mɔgɔw la, sabu u bena aw minɛ ka taga n’aw ye kititigɛsow la ani k’aw bugɔ ni golokami ye u ka kalansow kɔnɔ. 18 U bena taga n’aw ye gofɛrɛnɛrɛw ni masacɛw ɲɛɛ fɛ ne kosɔn. O bena kɛ seereya ye olu ni siya wɛrɛ mɔgɔw fɛ. 19 Nga kiti tuma na, aw bena min fɔ ani aw bena o fɔ cogo min na, aw kana jɔrɔ o la sabu aw ka kan ka min fɔ, o bena yira aw la o wagati yɛrɛ la. 20 Ayiwa, aw bena min fɔ, o tɛna kɛ aw yɛrɛ ka kuma ye. Nga aw Faa ka hakili senu lo bena o kumaw don aw daa la. 21 Cɛɛ bena a balimacɛ minɛ k’a di u b’a faga, ani faa bena o ɲɔgɔn kɛ a deen na. Deenw fana bena wuli u bangebagaw kama, k’a kɛ u b’u faga. 22 Mɔgɔw bɛɛ bena aw kɔniya ne tɔgɔ kosɔn. Nga mɔgɔ min muɲuna fɔɔ ka taga se laban na, ale lo bena kisi. 23 N’u b’aw tɔɔrɔla dugu dɔ la, a’ ye boli ka taga dugu wɛrɛ la. Tiɲɛn na, ne b’a fɔ aw ye ko aw tɛna Israɛl duguw bɛɛ yaala yaala ka ban ni mɔgɔ Dencɛ ma na.

24 “Kalanden man fisa n’a ka kalanfa ye, baaraden fana man fisa n’a kuntigi ye. 25 A daan ye ko kalanden ka kɛ i n’a fɔ a ka kalanfa ani baaraden ka kɛ i n’a fɔ a kuntigi. N’u ye soo kuntigi weele ko Bɛlizebuli,* kuma tɛ a somɔgɔw ma. 26 O la, aw kana siran u ɲɛ sabu koo dogonin si tɛ yen min tɛna laban ka bɔ kɛnɛ kan, ani gundo si tɛ yen mɔgɔw tɛna laban ka min lɔn. 27 N’ be min fɔ aw ye dibi la, aw k’o fɔ yeelen na. N’ be min fɔ aw ye n’ daa jukɔrɔ, aw k’o weleweleda sanbonw kan. 28 Mɔgɔ minw be se k’aw faga nga u tɛ se ka niin halaki, aw kana siran olu ɲɛ. Nga, min be se ka farikolo ni niin* halaki Inɔmu kɔkɛnɛ na, a’ ye siran ale lo ɲɛ. 29 Yala mɔgɔ tɛ kɔnɔni fitinin fila feere tama* kelen dɔrɔn wa? Nga u si tɛ ben duguma n’aw sankolola Faa ma bɔ o kala ma. 30 Aw kɔni, hali aw kunsigi bɛɛ daa lɔnnin lo. 31 O la, aw kana siran, aw ka fisa ni kɔnɔni fitinin caaman ye.

32 “Mɔgɔ min b’a fɔ mɔgɔw ɲɛɛ na ko a ye ne ka kalanden ye, ne fana bena fɔ n’ sankolola Faa ɲɛɛ na k’o tigi ye ne ka kalanden ye. 33 Nga mɔgɔ min b’a fɔ mɔgɔw ɲɛɛ na ko a tɛ ne lɔn, ne fana bena a fɔ n’ sankolola Faa ɲɛɛ na ko n’ t’o tigi lɔn. 34 Aw kan’a miiri ko ne nana ni hɛɛrɛ lo ye dugukolo kan. N’ ma na ni hɛɛrɛ ye nga murujan. 35 Ne nana farali don dencɛ n’a faa cɛ, denmuso n’a bamuso cɛ, ani furumuso n’a buranmuso cɛ. 36 Tiɲɛn na, mɔgɔ somɔgɔw lo bena kɛ a juguw ye. 37 Mɔgɔ o mɔgɔ b’a faa wala a baa kanu ka tɛmɛ ne kan, o tigi man kan ni ne ye ani mɔgɔ o mɔgɔ b’a denmuso wala a dencɛ kanu ka tɛmɛ ne kan, o tigi man kan ni ne ye. 38 Mɔgɔ o mɔgɔ ma sɔn k’a ka gwengwelɔgɔ ɲun ka tugu ne kɔ, o tigi man kan ni ne ye. 39 Mɔgɔ o mɔgɔ b’a ɲini k’a niin kisi, o tigi bena bɔnɛ a la. Nga mɔgɔ o mɔgɔ bɔnɛna a niin* na ne kosɔn, o tigi bena segi k’a sɔrɔ.

40 “Mɔgɔ min ye aw ladon, a ye ne lo ladon ani mɔgɔ min ye ne ladon, a ye n’ cibaga ladon. 41 Mɔgɔ min be kira ladon sabu Ala ka kira lo, a bena kira ka baraji ɲɔgɔn sɔrɔ, ani mɔgɔ min be mɔgɔ tilennin ladon sabu mɔgɔ tilennin lo, o tigi bena mɔgɔ tilennin ka baraji ɲɔgɔn sɔrɔ. 42 Tiɲɛn na, ne b’a fɔ aw ye ko ni mɔgɔ ye hali jifilen ɲaa kelen jii suma di mɔgɔ dɔgɔmannin nunu dɔ ma sabu a ye ne ka kalanden ye, o tigi tɛna fɔn a ka baraji la.”