Matiyo ka kibaro diiman

13 O loon nin yɛrɛ la, Yezu bɔra soo ka taga sigi bajida la. 2 Jamaba dɔ lajɛnna a kɔrɔ fɔɔ a donna ka sigi kurun kɔnɔ. Jama bɛɛ tun lɔnin lo bajida la. 3 O kɔ, a y’a daminɛ k’u kalan koo caaman na talenw na. A ko: “Sɛnɛkɛla dɔ bɔra ka taga a ka suman seri. 4 Suman seritɔ, dɔw benna sirada la ani kɔnɔninw nana u kunu kunu. 5 Kisɛ dɔw benna farayɔrɔ la, yɔrɔ min na bɔgɔ bɛrɛ tun tɛ yen. U falenna joona sabu bɔgɔ tun man ca yen. 6 Nga tile gwanna tuma min na, u jɛnina ka ja sabu u liliw tun ma don dugukolo la ka ɲɛ. 7 Dɔ wɛrɛw fana benna ŋɔniyɔrɔ la ani ŋɔniw bonyana k’u degun. 8 Dɔw benna dugukolo ɲuman kan ani u y’a daminɛ ka deen kɛ. Dɔ ye deen 100 kɛ, dɔ deen 60 ani dɔ wɛrɛ deen 30. 9 Tulo be mɔgɔ min fɛ, o tigi ka mɛnni kɛ.”

10 O kɔ, a ka kalandenw gwɛrɛla a la k’a ɲininga ko: “Mun na i be kuma u fɛ talen na?” 11 A y’u jaabi ko: “See dira aw ma ka sankolo Masaya gundo senumanw faamu. Nga, o see ma di olu ma. 12 Fɛɛn be min fɛ, dɔ bena fara o ta kan tugun ani a ta bena caya. Nga fɛɛn tɛ min fɛ, hali dɔɔni min b’a bolo o bena bɔsi a la. 13 O kama le, n’ be kumana u fɛ talenw na. U be filɛri kɛ, nga u tɛ foyi ye. U b’u tulo malɔ, nga u tɛ foyi faamu. 14 Kira Ezayi ka kumaw dafara u koo la. A ko: ‘Aw bena mɛnni kɛ, nga aw tɛna foyi faamu. Aw bena filɛri kɛ, nga aw tɛna foyi ye. 15 Sabu jama nin dusukun gwɛlɛyara. U y’u tulow tugu, k’u ɲɛɛw tugu walisa u kana mɛnni kɛ, ka yeli kɛ, ka faamuyali kɛ ani ka kɔsegi ne ma walisa n’ k’u kɛnɛya.’

16 “Nga aw kɔni, aw ye dubadenw ye sabu aw ɲɛɛw be yeli kɛ ani aw tulow be mɛnni kɛ. 17 Tiɲɛn na, ne b’a fɔ aw ye ko aw be koo minw yera, kiraw ni mɔgɔ tilennin caaman tun b’a fɛ k’o ye nga u ɲɛɛ ma la o kan. Aw be min mɛnna, u tun b’a fɛ k’o mɛn nga u m’o mɛn.

18 “Sisan, n’ bena serilikɛla ka talen kɔrɔ fɔ aw ye. 19 Sumankisɛ min benna sirada la, o ye mɔgɔ ye min ye Masaya kibaro mɛn, nga a ma a kɔrɔ faamu. O la min danna, Sutana* be na o bɔ a dusukun na. 20 Sumankisɛ min benna farayɔrɔ la, o ye mɔgɔ dɔ ye min ye Masaya kibaro mɛn ani a sɔnna a ma ni ninsɔndiya ye yɔrɔnin kelen. 21 Nga komi o kuma ma liliw bɔ o tigi kɔnɔ, a be mɛɛn wagati dɔɔni dɔrɔn le. N’a ye gwɛlɛya wala kɔrɔbɔli sɔrɔ dɔrɔn Masaya kibaro kosɔn, a be ben. 22 Kisɛ min benna ŋɔniyɔrɔ la, o ye mɔgɔ ye min ye Masaya kibaro mɛn, nga duniɲa nin haminankow ani nafolo lafilibanciya b’a degun ani k’a bali ka den kɛ. 23 Min benna dugukolo ɲuman kan, o ye mɔgɔ ye min ye Masaya kibaro mɛn, k’a kɔrɔ faamu ani a y’a daminɛ ka den. Dɔ ye deen 100 kɛ, dɔ deen 60 ani dɔ wɛrɛ deen 30.”

24 Yezu ye talen wɛrɛ la u ye ko: “Sankolo Masaya be i n’a fɔ cɛɛ dɔ min ye sumankisɛ ɲuman dan a ka foro kɔnɔ. 25 Ka mɔgɔw to sinɔgɔ la, a jugu nana binjugu dan bile cɛma ani ka taga. 26 Bile falenna tuma min na, ani k’a daminɛ ka kisɛw bɔ, binjugu fana falenna. 27 Forotigi ka baaradenw tagara a fɔ a ye ko: ‘Matigi, i ma sumankisɛ ɲuman lo dan i ka foro la wa? Binjugu nin do bɔra min?’ 28 A y’u jaabi ko: ‘Ne jugu dɔ lo y’o kɛ.’ Baaradenw y’a fɔ ko: ‘I b’a fɛ an ka taga o binjugu bɔn ka bɔ yen wa?’ 29 A ko: ‘Ɔn ɔn! Sabu binjugu nin bɔntɔ, aw ka teli ka bile fana bɔn. 30 A’ y’a to u fila be wuli ɲɔgɔn fɛ fɔɔ ka taga se sumantigɛ tuma ma. Sumantigɛ tuma na, n’ ben’a fɔ sumantigɛlaw ye ko: A’ ye binjugu nin tigɛ fɔlɔ k’a siri siri walisa k’a jɛni. O kɔ, a’ ye bile nin tigɛ k’a don n’ ka bondo kɔnɔ.’”

31 A ye talen wɛrɛ la u ye ko: “Sankolo Masaya be i n’a fɔ mutaridikisɛ* dɔ, cɛɛ dɔ ye min dan a ka foro kɔnɔ. 32 Sumankisɛw bɛɛ la fitinin lo, nga n’a falenna, a yiri be bonya ka tɛmɛ nankɔfɛn tɔɔw bɛɛ kan. A be kɛ yiriba ye ani kɔnɔw be na u ka ɲaga la a yiribolow kan.”

33 A ye talen wɛrɛ la u ye ko: “Sankolo Masaya be i n’a fɔ burufununan, muso dɔ ye min ta k’a don mugu caaman na* ani o mugu bɛɛ fununa.”

34 Yezu tɛmɛna talenw fɛ k’o koow bɛɛ fɔ jama ye. Tiɲɛn na, a tun tɛ kuma u fɛ n’a ma talen la u ye. 35 O kɛra walisa kira tun ye min fɔ, o ka dafa. A tun ko: “Ne bena n’ daa yɛlɛ ka kuma u fɛ talenw na. Koo minw tun dogonin lo kabi daminɛ na,* ne bena u wangola.”

36 Yezu ye jama bila ka taga tuma min na, a donna soo kɔnɔ. A ka kalandenw gwɛrɛla a la k’a fɔ a ye ko: “I ye talen min la binjugu koo la, o ɲɛfɔ an ye.” 37 A y’u jaabi ko: “Tigi min ye sumankisɛ ɲuman dan, o ye mɔgɔ Dencɛ lo ye. 38 Bileforo ye duniɲa lo ye. Bile ye Masaya deenw lo ye, nga binjugu ye mɔgɔjugu deenw lo ye. 39 Jugu min ye o binjugu dan, o ye Sutana* lo ye. Sumantigɛ wagati, o ye duniɲa* nin banwagati lo ye ani sumantigɛlaw ye mɛlɛkɛw lo ye. 40 U ye binjugu lajɛn k’a jɛni cogo min na, o ɲɔgɔn lo bena kɛ duniɲa* nin banwagati la. 41 Mɔgɔ minw bɛɛ be kojugu kɛ ani ka tɔɔw kunnatiɲɛ, mɔgɔ Dencɛ bena a ka mɛlɛkɛw ci u k’olu bɛɛ lajɛn ani k’u bɔ a ka Masaya kɔnɔ. 42 Mɛlɛkɛw bena o mɔgɔ juguw fili tasumaba kɔnɔ. U bena kasi ani k’u ɲiin ɲimi yen. 43 O wagati la, mɔgɔ tilenninw bena manamana i ko tile u Faa ka Masaya kɔnɔ. Tulo be mɔgɔ min fɛ, o tigi ka mɛnni kɛ.

44 “Sankolo Masaya be i n’a fɔ nafolo dogonin foro kɔnɔ. Cɛɛ dɔ y’a ye ani ka tila k’a dogo tugun. A ninsɔndiyanin tagara a bololafɛnw bɛɛ feere ani k’o foro san.

45 “Ala ka Masaya be i n’a fɔ jagokɛla* dɔ min be kɔnɔkisɛ cɛɲumaninw ɲinina. 46 Tuma min na a ye dɔ sɔrɔ min nafa ka bon kosɔbɛ, a sinna ka taga a bololafɛnw bɛɛ feere ani k’a san.

47 “Ala ka Masaya be i n’a fɔ jɔɔ, jɛgɛminɛlaw ye min fili kɔgɔji la. O jɔɔ be jɛgɛ sifa bɛɛ minɛ. 48 N’a fara, jɛgɛminɛlaw b’a sama ka bɔ n’a ye kɔgɔjida la. O kɔ, u be sigi ka jɛgɛw woloma. U be ɲumamanw don minan kɔnɔ ani ka kunntanw fili. 49 O ɲɔgɔn lo bena kɛ duniɲa* nin bantuma na. Mɛlɛkɛw bena mɔgɔ juguw woloma ka bɔ mɔgɔ tilenninw cɛma 50 ani k’u fili tasumaba kɔnɔ. U bena kasi ani k’u ɲiin ɲimi yen.

51 O kɔ, Yezu y’a ka kalandenw ɲininga ko: “Aw y’o kumaw bɛɛ kɔrɔ faamu wa?” U y’a jaabi ko: “Ɔnhɔn Matigi.” 52 O la, a y’a fɔ u ye ko: “N’o lo, aw k’a faamu ko karamɔgɔ min kalanna sankolo Masaya koo la, a be i ko soo kuntigi dɔ. A be fɛɛn kuraw ni fɛɛn kɔrɔw bɔ a ka nafolo kɔnɔ.”

53 Yezu y’o talenw la ka ban tuma min na, a bɔra yen. 54 A tagara a ka dugu la, k’a daminɛ ka mɔgɔw kalan u ka kalanso la. U kabakoyara k’a fɔ ko: “Nin cɛɛ nin y’o hakilitigiya sɔrɔ min? A be kabako minw kɛra, jɔn lo y’o setigiya d’a ma? 55 Miniziyecɛ dencɛ tɛ wa? A bamuso lo tɛ Mariyamu ye wa? A dɔgɔcɛw lo tɛ Zaki, Yusufu, Simɔn, ani Zuda ye wa? 56 A dɔgɔmusow bɛɛ tɛ n’an ye yan wa? A do y’o setigiya sɔrɔ min?” 57 O la, u ma sɔn ka la a la.* Nga Yezu y’a fɔ u ye ko: “Kira be bonya sɔrɔ yɔrɔ bɛɛ, fɔɔ a ka dugumɔgɔw n’a somɔgɔw dɔrɔn cɛma.” 58 U ma la a la minkɛ, a ma sɔn ka kabako caaman kɛ yen.