Matiyo ka kibaro diiman
28 Lafiɲɛlon tɛmɛnin kɔ, lɔgɔkun loon fɔlɔ dugugwɛda fɛ, Magidalaka Mariyamu ani Mariyamu dɔ nin tagara kaburu filɛ.
2 A filɛ! Dugukolo yɛrɛyɛrɛla, sabu Jehova ka mɛlɛkɛ dɔ jigira ka bɔ sankolo la, ka na kabakuru nin kolonkolon ka bɔ kaburuda la ani ka sigi a kan. 3 A tun be manamanana i ko sanmanamana ani a ka faniw tun gwɛnin lo parapara. 4 Ayiwa, minw tun b’o kaburu kɔrɔsira, tuma min na u y’o mɛlɛkɛ ye, u yɛrɛyɛrɛla kosɔbɛ siranya bolo fɔɔ a kɛra i n’a fɔ u sara.
5 Mɛlɛkɛ y’a fɔ muso nunu ye ko: “Aw kana siran, n’ b’a lɔn ko aw be Yezu lo yɔrɔ ɲinina, u tun ye min gwengwe lɔgɔ kan. 6 A tɛ yan, a suu kununa i ko a tun y’a fɔ cogo min na. A’ ye na a filɛ a tun lanin be yɔrɔ min na. 7 O kɔ, a’ ye teliya ka taga a fɔ a ka kalandenw ye ko a suu kununa. A filɛ! A bena bila aw ɲɛ Galile, aw bena taga a sɔrɔ yen. Min tun be n’ fɛ ka fɔ aw ye, o lo ye ten.”
8 Muso nunu teliyara ka bɔ kaburu la. U tun sirannin lo, nga u ninsɔn tun ka di fana. U bolila ka taga o kibaro fɔ Yezu ka kalandenw ye. 9 O yɔrɔnin bɛɛ, Yezu y’u kunbɛn, k’a fɔ u ye ko: “Aw ni sɔgɔma!” O musow gwɛrɛla a la, k’u kunbiri gwan ani k’a seenw minɛ. 10 O la, Yezu y’a fɔ u ye ko: “Aw kana siran! A’ ye taga o kibaro fɔ n’ balimaw ye walisa u ka taga Galile. U bena n’ ye o yɔrɔ lo la.”
11 Ka muso nunu to sira kan, kaburu kɔrɔsibaga nunu dɔw tagara dugu kɔnɔ ani koo minw bɛɛ kɛra, u y’o lakali sarakalasebagaw kuntigiw ye. 12 Sarakalasebagaw kuntigiw ni cɛkɔrɔbaw ye ɲɔgɔn ye ani ka kuma o koo la. O kɔ, sarakalasebagaw kuntigiw ye wari caaman di sɔrɔdasiw ma 13 ani k’a fɔ u ye ko: “Aw k’a fɔ ko: ‘A ka kalandenw nana sufɛ k’a suu soɲɛ tuma min na an tun be sinɔgɔra.’ 14 Hali ni gofɛrɛnɛrɛ y’o mɛn, an bena a ɲɛfɔ a ye ani foyi tɛna aw sɔrɔ.” 15 Sɔrɔdasiw y’o wari minɛ ani min tun fɔra u ye, u y’o kɛ. O kumaw jɛnsɛnna Yahutuw cɛma fɔɔ ka na se bi.
16 Kalanden 11 nunu tagara Galile kulu kan, Yezu tun ko u n’ale bena ɲɔgɔn kunbɛn yɔrɔ min na. 17 U y’a ye tuma min na, u y’u kunbiri gwan a seen kɔrɔ. Nga, u dɔw tun be sigasigara. 18 Yezu gwɛrɛla k’a fɔ u ye ko: “Ala ye kuntigiya di n’ ma fɛɛn bɛɛ kun na, sankolo la ani dugukolo kan. 19 O la, a’ ye taga mɔgɔw kalan siyaw bɛɛ la k’u kɛ ne ka kalandenw ye. A’ y’u batize Faa, Dencɛ ani hakili senu tɔgɔ la. 20 Ne ye cikan minw bɛɛ di aw ma, aw k’u kalan u k’o labato. A filɛ! Ne bena kɛ n’aw ye loon o loon, fɔɔ ka taga se duniɲa* bantuma ma.”