Matiyo ka kibaro diiman
16 O yɔrɔ la, Fariziɲɛw ni Saduseɲɛ dɔw gwɛrɛla Yezu la walisa k’a kɔrɔbɔ. U y’a ɲini a fɛ a ka tagamasiɲɛ dɔ kɛ ka bɔ sankolo la. 2 A y’u jaabi ko: “Ni tilekun be ɲini ka don, aw b’a fɔ ko ‘sanji tɛna ben, sabu sankolo wulennin lo.’ 3 Sɔgɔma aw b’a fɔ ko ‘bi, nɛnɛ bena kɛ ani sanji bena ben, sabu sankolo wulennin lo nga sankaba be yen.’ Aw be se ka sankolo cogoya filɛ k’a ɲɛfɔ, nga koo minw be kɛra wagati nin na, aw tɛ sera k’o faamu. 4 Aw mɔgɔ juguw ni jatɔw* b’a ɲini tuma bɛɛ ka tagamasiɲɛ dɔ ye, nga tagamasiɲɛ si tɛna yira aw la, ni kira Zonasi ta tɛ.” O kɔ, a tɛmɛna n’a ka sira ye k’u to yen.
5 Yezu ka kalandenw tagara baji kɔfɛ nga u ɲinɛna ka buru ta. 6 A y’a fɔ u ye ko: “A’ y’aw ɲɛɛ yɛlɛ ani k’aw yɛrɛ kɔrɔsi Fariziɲɛw ni Saduseɲɛw ka burufununan ma.” 7 A ka kalandenw y’a daminɛ k’a fɔ ɲɔgɔn ye ko: “An ma buru foyi ta.” 8 Yezu y’o lɔn minkɛ, a ko: “Mun na aw b’a fɔra ɲɔgɔn ye ko aw ma buru ta? Aw ka limaniya barika ka dɔgɔ dɛ! 9 N’ be min fɔra aw bele m’o faamu wa? N’ ye cɛɛ 5 000 balo ni burukun duuru minw ye ani aw y’a tɔɔ cɛ ka segi daa minw fa, aw ɲinɛna o kɔ wa? 10 Wala n’ ye cɛɛ 4 000 balo ni burukun wolonfila minw ye ani aw y’a tɔɔ cɛ ka segibaba minw fa, aw ɲinɛna o kɔ? 11 Mun na aw m’a faamu ko n’ tun tɛ kumana buru lo koo la? Nga, n’ ko a’ y’aw yɛrɛ kɔrɔsi Fariziɲɛw ni Saduseɲɛw ka burufununan lo ma.” 12 O la, u y’a faamu ko a tun kaan tɛ buru lo ma, nga a tun be kumana Fariziɲɛw ni Saduseɲɛw ka kalanw lo koo la.
13 U sera Sezare Filipi mara la tuma min na, Yezu y’a ka kalandenw ɲininga ko: “Mɔgɔw b’a miiri ko mɔgɔ Dencɛ ye jɔn lo ye?” 14 U y’a jaabi ko: “Mɔgɔ dɔw ko Zan Batizelikɛla lo, dɔ wɛrɛw ko Eli lo ani dɔ wɛrɛw fana ko Zeremi wala kira wɛrɛ lo.” 15 A y’u ɲininga ko: “Nga aw ka miiriya la, ne ye jɔn lo ye?” 16 Simɔn Piyɛri y’a jaabi ko: “Ele ye Krista lo ye, Ala ɲɛnama Dencɛ.” 17 A y’a fɔ a ye ko: “Zonasi dencɛ Simɔn, i dagamunin lo sabu adamaden si* m’o yira i la, nga n’ sankolola Faa lo y’o yira i la. 18 Ka fara o kan ne b’a fɔ i ye ko, i ye Piyɛri* ye ani n’ bena n’ ka kafo lɔ o farakuru lo kan, saya* tɛna see sɔrɔ a kan. 19 Ne bena sankolo Masaya konnɛgɛw d’i ma. I mana fɛɛn o fɛɛn siri dugukolo kan, o sirila ka ban sankolo la ani i mana fɛɛn o fɛɛn foni dugukolo kan, o fonina ka ban sankolo la.” 20 O kɔ, a y’a fɔ a ka kalandenw ye k’a gwɛlɛya k’u kan’a fɔ mɔgɔ si ye ko ale lo ye Krista ye.
21 K’a ta o wagati ma, Yezu y’a daminɛ k’a ɲɛfɔ a ka kalandenw ye ko ale ka ɲi ka taga Zeruzalɛmu. A k’o yɔrɔ la, cɛkɔrɔbaw, sarakalasebagaw kuntigiw ni Sariya karamɔgɔw bena ale tɔɔrɔ kosɔbɛ. U bena ale faga yen, nga tile sabanan loon, a suu bena kunu. 22 O la, Piyɛri tagara ni Yezu ye gɛrɛn na ani a y’a daminɛ k’a kɔrɔfɔ ko: “Ayi Matigi, kana kɛ i yɛrɛ ma jugu ye. O koo tɛna i sɔrɔ fewu.” 23 Nga Yezu y’a kɔɔ di Piyɛri ma, k’a fɔ a ye ko: “Bɔ n’ kɔrɔ,* Sutana nin! I ye ne sentalonfɛn ye sabu i ka miiriya tɛ Ala ta ye, nga adamadenw ta lo.”
24 O kɔ, Yezu y’a fɔ a ka kalandenw ye ko: “Mɔgɔ o mɔgɔ b’a fɛ ka kɛ ne ka kalanden ye, o tigi ka kan ka ban a yɛrɛ la, k’a ka gwengwelɔgɔ ɲun ka to ka tugu ne kɔ. 25 Sabu mɔgɔ o mɔgɔ b’a fɛ k’a niin kisi, o tigi bena bɔnɛ a la. Nga mɔgɔ o mɔgɔ bɔnɛna a niin na ne kosɔn, o tigi bena a sɔrɔ kokura. 26 Tiɲɛn na, ka duniɲa kuru bɛɛ sɔrɔ, nafa juman lo b’o la n’i bɔnɛna i niin na? Wala mɔgɔ be se ka mun lo di a niin nɔɔ na? 27 Sabu mɔgɔ Dencɛ bena na a Faa ka nɔɔrɔ la n’a ka mɛlɛkɛw ye. A bena mɔgɔ kelen kelen bɛɛ sara ka kɛɲɛ n’a ka kɛwalew ye. 28 Tiɲɛn na, ne b’a fɔ aw ye ko aw minw be yan, aw dɔw tɛna sa* n’u ma mɔgɔ Dencɛ natɔ ye a ka Masaya la.”