Matiyo ka kibaro diiman

12 O wagati la, Yezu n’a ka kalandenw tɛmɛna foro dɔw kɔnɔ. Lafiɲɛlon tun lo. Komi kɔngɔ tun b’a ka kalandenw na, u y’a daminɛ ka suman dɔw tigɛ k’u ɲimi. 2 Fariziɲɛw y’o ye minkɛ, u y’a fɔ Yezu ye ko: “A filɛ, min daganin tɛ lafiɲɛlon na, i ka kalandenw b’o lo kɛra.” 3 Yezu y’u ɲininga ko: “Dawuda ye min kɛ tuma min na kɔngɔ tun b’ale n’a tagamaɲɔgɔnw na, aw m’o kalan wa? 4 A donna Ala ka soo* kɔnɔ, ani u ye buru yirataw dumu,* k’a sɔrɔ a tun daganin tɛ mɔgɔ wɛrɛ k’o dumu ni sarakalasebagaw dɔrɔn tɛ. 5 Wala lafiɲɛlon na, sarakalasebaga minw be baara kɛ Alabatosoba kɔnɔ, u tɛ lafiɲɛlon labato ani mɔgɔ si t’u jalaki o kosɔn. Aw m’o kalan Sariya kɔnɔ wa? 6 Nga, ne b’a fɔ aw ye ko mɔgɔ dɔ be yan min kɔrɔtanin lo ka tɛmɛ Alabatosoba kan. 7 Kuma min fɔra ko ‘ne be makari lo fɛ saraka tɛ,’ n’aw tun y’o faamu, aw tun tɛna mɔgɔ jalakibaliw jalaki. 8 Ne y’o fɔ aw ye sabu mɔgɔ Dencɛ lo ye lafiɲɛlon Matigi ye.”

9 A bɔnin kɔ o yɔrɔ la, a tagara u ka kalanso kɔnɔ. 10 Cɛɛ dɔ tun b’o yɔrɔ la min bolo tun faganin lo. U ye Yezu ɲininga ko: “A daganin lo ka mɔgɔ kɛnɛya lafiɲɛlon na wa?” U tun b’a fɛ k’a jalaki le. 11 A y’u jaabi ko: “Aw cɛma ni dɔ be ni saga kelen ye ani o saga benna dingɛ kɔnɔ lafiɲɛlon na, a tɛna taga a bɔ wa? 12 Mɔgɔ nafa ka bon ni saga ye fɔɔ ka taga ka na! O la, a daganin lo ka koo ɲuman kɛ lafiɲɛlon na.” 13 O kɔ, a y’a fɔ o cɛɛ ye ko: “I bolo jan.” Cɛɛ y’a jan ani a bolo kɛnɛyara ka kɛ i ko bolo tɔkelen. 14 Nga, Fariziɲɛw bɔra ka taga ɲɔgɔn ye walisa ka cogo ɲini ka Yezu faga. 15 Yezu y’o lɔn minkɛ, a bɔra o yɔrɔ la. Mɔgɔ caaman tugura a kɔ fana ani a y’u bɛɛ kɛnɛya. 16 Nga, a y’a fɔ u ye ka gwɛlɛya k’u kana ale kofɔ tɔɔw ye. 17 O kɛra walisa kira Ezayi tun ye min fɔ, o ka dafa. A tun ko:

18 “Ne ye baaraden min sugandi, o filɛ nin ye! Ne ka baaraden kanulen lo, a koo ka di ne ye haali!* Ne bena n’ ka hakili senu jigi a kan ani a bena siyaw dɛmɛ k’a faamu tilenninya ye min ye. 19 A tɛna kɛlɛ kɛ, a tɛna kule ani mɔgɔ si tɛna a kumakan mɛn sirabadaw la. 20 A tɛna binkala fɔnsɔnnin ɲɔɲɔ ani fitinɛjuru min be sisi bɔra, a tɛna o tɔɔ faga. A bena koow kɛ ten fɔɔ ka na tilenninya sigi. 21 Tiɲɛn na, siyaw na u jigi la a kan.”

22 O kɔ, mɔgɔw nana ni jinatɔcɛ dɔ ye Yezu fɛ. Fiyentɔ ni bobo tun lo fana. Yezu y’o cɛɛ kɛnɛya, a sera ka kuma ani ka yeli kɛ. 23 Ayiwa, jama bɛɛ kabakoyara ani u y’a daminɛ k’a fɔ ko: “Kɔni nin lo tɛ Dawuda Dencɛ ye?” 24 Fariziɲɛw y’o mɛn minkɛ, u y’a fɔ ko: “Cɛɛ nin be jinaw gwɛnna ka bɔ mɔgɔw la jinaw kuntigi Bɛlizebuli* ka sebagaya lo barika la.” 25 Yezu tun b’u ka miiriya lɔn minkɛ, a y’a fɔ u ye ko: “Masaya o masaya mɔgɔw be wuli ɲɔgɔn kama, o masaya be halaki. Dugu o dugu wala luu o luu mɔgɔw be wuli ɲɔgɔn kama fana, o dugu wala o luu be ci. 26 O cogo kelen na ni Sutana be Sutana gwɛn, a wulila a yɛrɛ lo kama. N’o lo, a ka masaya bena to sen kan cogo di? 27 Ka fara o kan, ni ne be jinaw gwɛn Bɛlizebuli le barika la, aw ka kalandenw* do, olu b’u gwɛn jɔn le barika la? O lo kama olu lo bena aw kiti. 28 Nga n’a sɔrɔla ko Ala ka hakili senu barika lo la n’ be jinaw gwɛnna, o kɔrɔ ko Ala ka Masaya nana, ani aw ma bɔ o kala ma. 29 Mɔgɔ be se ka don cɛɛ barikaman ka soo kɔnɔ k’a ka minanw cɛ cogo di n’a m’o cɛɛ minɛ k’a siri fɔlɔ? N’a y’a siri, o tuma na le a be se k’a ka sokɔnɔminanw cɛ. 30 Mɔgɔ min tɛ ni ne ye, o tigi be ne kɛlɛla le. Mɔgɔ min tɛ fara ne kan ka mɔgɔw lajɛn, o tigi b’u yɛrɛkɛra le.

31 “O lo kama, ne b’a fɔ aw ye ko jurumu ani nɛnini sugu bɛɛ bena yafa mɔgɔw ma. Nga mɔgɔ min be Ala ka hakili senu nɛni, o tɛna yafa o tigi ma. 32 Misali la, mɔgɔ o mɔgɔ be kuma jugu fɔ mɔgɔ Dencɛ koo la, o bena yafa o tigi ma. Nga mɔgɔ o mɔgɔ be kuma jugu fɔ Ala ka hakili senu koo la, o tɛna yafa o tigi ma duniɲa nin na* ani hali duniɲa nata la.

33 “N’i ka yiri ka ɲi, a be deen ɲumanw lo kɛ. N’i ka yiri man ɲi, a be deen kunntanw lo kɛ. Sabu yiri be lɔn a deenw lo fɛ. 34 Aw fɔnfɔnnindenw, aw be se ka kuma ɲuman fɔ cogo di k’a sɔrɔ aw ka jugu? Sabu mɔgɔ dusukun fanin be min na, a daa b’o lo fɔ. 35 Mɔgɔ ɲuman be koo ɲumanw lo bɔ a daa la sabu a dusukun fanin lo fɛɛn ɲumanw lo la. Nga, mɔgɔ jugu be koo juguw lo bɔ a daa la sabu a dusukun fanin lo fɛɛn juguw lo la. 36 Ne b’a fɔ aw ye ko kitilon na, mɔgɔw ye kuma gwansan o kuma gwansan fɔ, u bena kiti o kama. 37 Sabu, u bena basigi i ka kumaw lo kan k’a fɔ ko i ye mɔgɔ tilennin ye wala k’i jalaki.”

38 O kɔ, Sariya karamɔgɔw ni Fariziɲɛ dɔw y’a fɔ Yezu ye ko: “Karamɔgɔ, an b’a fɛ i ka tagamasiɲɛ dɔ kɛ min b’a yira ko Ala lo y’i ci.” 39 A y’u jaabi ko: “Aw mɔgɔ juguw ni jatɔw* b’a ɲini tuma bɛɛ ka tagamasiɲɛ dɔ ye, nga tagamasiɲɛ si tɛna yira aw la, ni kira Zonasi ta tɛ. 40 Zonasi ye tile saba ni suu saba kɛ jɛgɛba kɔnɔ cogo min na, o cogo kelen na, mɔgɔ Dencɛ bena tile saba ni suu saba kɛ dugukolo kɔnɔ. 41 Kitilon na, Ninivukaw ni bi mɔgɔw suu bena kunu. Ninivukaw bena bi mɔgɔw jalaki, sabu Zonasi y’u waaju tuma min na, u nimisara. Nga aw y’a filɛ, mɔgɔ dɔ be yan min tɛmɛna Zonasi kan! 42 Kitilon na, Saba masamuso suu bena kunu ni bi mɔgɔw ye, ani a bena u jalaki sabu a bɔra fɔɔ dugukolo daan na ka na Solomani ka hakilitigiya lamɛn. Nga a’ y’a filɛ, mɔgɔ dɔ be yan min tɛmɛna Solomani kan!

43 “Ni jina bɔra mɔgɔ dɔ la, a be munumunu yɔrɔ janinw na ka lafiɲɛyɔrɔ ɲini nga a t’o sɔrɔ. 44 O la, a b’a fɔ a yɛrɛ kɔnɔ ko: ‘N’ bena segi n’ ka soo kɔrɔ la.’ N’a sera yen, a b’a sɔrɔ ko a lakolon lo, a furanna ka ɲɛ ani a cɛ ka ɲi. 45 O kɔ, a be taga jina wolonfila wɛrɛw yaala minw ka jugu ka tɛmɛ ale yɛrɛ kan ani u be don ka sigi yen. A laban, o tigi ka koow be juguya ka tɛmɛ fɔlɔ kan. O lo bena bi mɔgɔ juguw sɔrɔ.”

46 Ka Yezu to kuma na ni jama ye, a bamuso n’a dɔgɔcɛw nana lɔ kɛnɛma ani u tun b’a fɛ ka kuma n’a ye. 47 O la, dɔ y’a fɔ a ye ko: “A filɛ, i bamuso n’i dɔgɔcɛw lɔnin lo kɛnɛma ani u b’a fɛ ka kuma n’i ye.” 48 A y’o tigi jaabi ko: “Jɔn lo ye n’ bamuso ye ani jɔn ni jɔn lo ye n’ dɔgɔcɛw ye?” 49 O la, a y’a bolo sin a ka kalandenw ma k’a fɔ ko: “N’ bamuso, n’ dɔgɔw ani n’ kɔrɔw filɛ nin ye! 50 Sabu mɔgɔ o mɔgɔ be ne sankolola Faa sago kɛ, o tigi lo ye ne dɔgɔ, ne kɔrɔ wala ne bamuso ye.”