Matiyo ka kibaro diiman

27 Sɔgɔmada fɛ, sarakalasebagaw kuntigiw ni cɛkɔrɔbaw bɛɛ ye ɲɔgɔnye kɛ walisa ka fɛɛrɛ ɲini ka Yezu faga. 2 U ye Yezu siri, o kɔ, u tagara n’a ye gofɛrɛnɛrɛ Pilati fɛ.

3 Zuda min ye Yezu janfa, tuma min na a y’a ye k’u ye kiti ben Yezu kan k’a fɔ ko a ka kan ka faga, a nimisara. A tagara ni warigwɛ 30 nunu ye sarakalasebagaw kuntigiw ni cɛkɔrɔbaw fɛ 4 k’a fɔ u ye ko: “Ne ye hakɛ kɛ ka mɔgɔ* jalakibali don aw bolo.” U y’a jaabi ko: “O t’an ka sira la. O ye ele ka koo lo ye!” 5 O la, a ye warigwɛ nunu fili Alabatosoba kɔnɔ. O kɔ, a tagara a kaan don juru la. 6 Sarakalasebagaw kuntigiw y’o warigwɛw cɛ ani k’a fɔ ko: “A daganin tɛ an k’o wari fara Alabatosoba wari kan, sabu o wari ye mɔgɔ niin sɔngɔ lo ye.” 7 O kɔ, u bɛnna a la ko u bena o wari ta ka bɔgɔdaga dilanbaga ka foro san n’a ye, k’a kɛ lonanw sudonyɔrɔ ye. 8 O lo kama, fɔɔ ka na se bi ma, o foro be weele ko joliforo. 9 O la, kira Zeremi tun ye min fɔ, o dafara. A tun ko: “U ye warigwɛ 30 nunu ta, minw tun kɛra mɔgɔ sɔngɔ ye, Israɛlden dɔw tun bɛnna min na 10 ani u ye bɔgɔdaga dilanbaga ka foro san n’o ye, i ko Jehova tun y’a fɔ n’ ye cogo min na.”

11 Yezu tun lɔnin lo sisan gofɛrɛnɛrɛ ɲɛfɛ. Gofɛrɛnɛrɛ y’a ɲininga ko: “Ele lo ye Yahutuw ka Masacɛ ye wa?” Yezu y’a jaabi ko: “Ele yɛrɛ lo y’o fɔ.” 12 Sarakalasebagaw kuntigiw ni cɛkɔrɔbaw y’a jalaki tuma min na, a m’u jaabi. 13 O la, Pilati y’a ɲininga ko: “U b’i jalakira koo minw bɛɛ la, i t’o mɛnna wa?” 14 Nga Yezu jera, a ma foyi fɔ. O ye gofɛrɛnɛrɛ kabakoya yɛrɛ le.

15 Saan o saan Tɛmɛnkan seli tuma na, gofɛrɛnɛrɛ tun be kasoden dɔ labila. Jama tun mana min sugandi, a tun b’o tigi lo labila. 16 O wagati la, kasoden dɔ tun be yen min tɔgɔ ko Barabasi. Mɔgɔ bɛɛ tun b’a lɔn ko kojugukɛla lo. 17 Jama lajɛnnin kɔ, Pilati y’u ɲininga ko: “Aw b’a fɛ n’ ka jɔn lo labila? Barabasi wa, wala Yezu min be weele ko Krista?” 18 Sabu Pilati tun b’a kala ma ko ɲangoya kosɔn le u ye Yezu don ale bolo. 19 Ka fara o kan, ka Pilati siginin to kititigɛyɔrɔ la, a muso ye mɔgɔ ci k’a fɔ a ye ko: “Kana i niin don cɛɛ tilennin nin ka koo la, sabu n’ ye siko min kɛ a koo la sufɛ, o be n’ tɔɔrɔla kosɔbɛ.” 20 Nga, sarakalasebagaw kuntigiw ni cɛkɔrɔbaw ye jama lasun u k’a fɔ ko Barabasi ka labila ani Yezu ka faga. 21 Gofɛrɛnɛrɛ y’u ɲininga ko: “U fila cɛma, aw b’a fɛ n’ ka jɔn lo labila?” U y’a jaabi ko: “Barabasi.” 22 Pilati y’a fɔ u ye ko: “Ayiwa, ne ka kan ka mun lo kɛ Yezu la, min be weele ko Krista?” O la u y’a jaabi ko: “A gwengwe* lɔgɔ kan!” 23 A ko: “Mun na do? A ye koo jugu juman lo kɛ?” U tora ka dɔ fara u pɛrɛnkan kan k’a fɔ ko: “A gwengwe lɔgɔ kan!”

24 Pilati y’a ye tuma min na ko ale ka kuma tɛna foyi ɲɛ ani ko jama be ɲini ka muruti, a ye jii ta k’a tɛgɛ ko jama ɲɛɛ na, ani k’a fɔ ko: “N’ bolo tɛ cɛɛ nin joli bɔnko la, a koo be aw lo bolo.” 25 Jama bɛɛ y’a jaabi ko: “A joli bɔnko hakɛ ka ben anw n’an deenw kan.” 26 O la, Pilati ye Barabasi labila. A ko u ka Yezu bugɔ ni golokami ye ani u ka taga a faga gwengwelɔgɔ kan.

27 O la, gofɛrɛnɛrɛ ka sɔrɔdasiw ye Yezu minɛ ka taga n’a ye gofɛrɛnɛrɛ ka soo ani u ye sɔrɔdasi tɔɔw bɛɛ weele u nana lɔ k’a lamini. 28 U y’a ka faniw bɔ a kaan na, ka fanijan wulenman dɔ don a la. 29 U ye ŋɔni dan k’a kɛ i n’a fɔ masafugulan, k’a biri a kuun na. U ye bere dɔ don a kinibolo la. O kɔ, u y’u kunbiri gwan a ɲɛɛ kɔrɔ ani ka to k’a lɔgɔbɔ ko: “An ka foli b’i ye, Yahutuw ka Masacɛ!” 30 U ye daji tu a kan, ka bere minɛ a bolo ka to k’a kuun bugɔ n’a ye. 31 U y’a lɔgɔbɔ ka ban tuma min na, u ye fanijan wulenman nin bɔ a la, k’a ka faniw don a la. O kɔ, u tagara n’a ye walisa k’a gwengwe lɔgɔ kan.

32 U bɔtɔ, u ye cɛɛ dɔ kunbɛn min be bɔ Sirɛni ani a tɔgɔ ko Simɔn. U y’a ɲini a fɛ ko a ka Yezu ka gwengwelɔgɔ ta. 33 U senin kɔ yɔrɔ dɔ la min be weele ko Gɔligota, o kɔrɔ, kungolo yɔrɔ, 34 u ye diwɛn ɲagami ni jii kunaman dɔ ye k’o di Yezu ma. Nga, a y’a nɛnɛ tuma min na, a banna a la. 35 U y’a gwengwe lɔgɔ kan, ani u ye kala la k’a ka faniw tilan tilan. 36 O kɔ, u sigira ka to k’a kɔrɔsi. 37 Ka fara o kan, u y’a gwengwe kuun min kama, u y’o sɛbɛ k’a bila a kuun sanfɛ. A tun sɛbɛra ko: “Nin ye Yezu ye, Yahutuw ka Masacɛ.”

38 O kɔ, u ye kojugukɛla fila gwengwe lɔgɔw kan a gɛrɛfɛ. Kelen a kinibolo fɛ ani tɔkelen a numanbolo fɛ. 39 Tɛmɛbagaw tora ka Yezu nɛni ani k’u kuun yuguyugu. 40 U tun b’a fɔra ko: “Ele min tun b’a fɛ ka Alabatosoba ci, ka tila k’a lɔ tile saba kɔnɔ, i yɛrɛ kisi kɛ! N’i ye Ala Dencɛ ye, jigi ka bɔ gwengwelɔgɔ kan!” 41 Sarakalasebagaw kuntigiw, Sariya karamɔgɔw ani cɛkɔrɔbaw fana tora k’a lɔgɔbɔ k’a fɔ ko: 42 “A ye dɔw kisi, nga a tɛ se k’a yɛrɛ kisi. N’a ye Israɛl ka Masacɛ ye, a ka jigi ka bɔ gwengwelɔgɔ kan kɛ! O la, an bena la a la. 43 A y’a jigi la Ala kan. N’a koo ka di Ala ye, a k’a kisi sisan kɛ! Sabu a tun y’a fɔ ko: ‘Ne ye Ala Dencɛ ye.’” 44 Hali kojugukɛla minw tun gwengwenin be a gɛrɛfɛ, olu fana tun b’a nɛnina.

45 K’a ta midi* fan fɛ fɔɔ ka taga se 15h* tuma na, jamana yɔrɔ bɛɛ dibira kosɔbɛ. 46 15h fan fɛ, Yezu kulera ni kanba ye ko: “Eli, Eli, lama sabaktani?” O kɔrɔ ko: “Ne ka Ala, ne ka Ala, mun na i ye n’ bila?” 47 Mɔgɔ minw tun lɔnin be yen, olu y’o mɛn minkɛ, u dɔw y’a fɔ ko: “Cɛɛ nin be Eli weelela.” 48 O yɔrɔnin bɛɛ, u dɔ bolila ka taga sifɔn ta k’a sun vinɛgiri la, k’a siri kalajan dɔ la ani k’a d’a ma ko a k’a min. 49 Nga, a tɔɲɔgɔnw y’a fɔ ko: “A to an k’a filɛ ni Eli bena na a kisi.” 50 Yezu pɛrɛnna ni kanba ye tugun ani o kɔ, a sara.*

51 A filɛ! Alabatosoba cɛtigɛfani faranna fila, k’a ta sanfɛ fɔɔ duguma. Dugukolo yɛrɛyɛrɛla ani faraw cira. 52 Kaburuw dayɛlɛla ani mɔgɔ senuman* minw tun sara, u caaman suuw serila ka bɔ 53 ani mɔgɔ caaman y’u ye (Yezu suu kununin kɔ, mɔgɔ dɔw bɔra kaburutu la ka don dugu senuman kɔnɔ). 54 Sɔrɔdasi kuntigi ani minw tun be n’a ye ka to ka Yezu kɔrɔsi, tuma min na u y’a ye ko dugukolo yɛrɛyɛrɛla ani k’a ye koo wɛrɛ minw kɛra o wagati la, u siranna kosɔbɛ ani u y’a fɔ ko: “Nin tun ye Ala Dencɛ lo ye tiɲɛn na.”

55 Muso caaman tun lɔnin lo yɔrɔjan ka to ka filɛri kɛ. U tun ye Yezu bila sira ka bɔ Galile mara la walisa k’a dɛmɛ. 56 O musow cɛma, Magidalaka Mariyamu tun be yen ani Zaki ni Zoze bamuso Mariyamu, ani Zebede dencɛw bamuso.

57 Wulada fɛ, cɛɛ nafolotigi dɔ nana. A be bɔ Arimate ani a tɔgɔ ko Yusufu. Ale fana tun kɛra Yezu ka kalanden dɔ ye. 58 O cɛɛ tagara Pilati fɛ k’a fɔ a ye ko a ka Yezu suu di ale ma. O la, Pilati ko u k’a d’a ma. 59 Yusufu ye Yezu suu ta ka lɛnfufani saniyanin dɔ meleke a la. 60 A ye suu nin bila a yɛrɛ ka kaburu kura kɔnɔ, a tun y’o min sogi fara dɔ kɔnɔ. A ye kabakuru belebeleba dɔ kolonkolon k’o kaburu datugu. O kɔ, a tagara. 61 Nga Magidalaka Mariyamu ani Mariyamu tɔkelen nin siginin tora kaburuda la.

62 O koow kɛra loon min na u be labɛnw kɛ Lafiɲɛlon kama. O loon dugusagwɛ, sarakalasebagaw kuntigiw ni Fariziɲɛw jɛnna ka taga Pilati fɛ. 63 U y’a fɔ a ye ko: “Matigi, an hakili jigira ko tuma min na ngalontigɛla nin tun be niin na, a tun y’a fɔ ko ‘tile saba n’ sanin kɔ, n’ suu bena kunu.’ 64 O la, cii di ko u ka taga a ka kaburu kɔrɔsi fɔɔ ka se tile saba walisa a ka kalandenw kan’a suu soɲɛ ani k’a fɔ jama ye ko ‘a suu kununa!’ N’o kɛra, o ngalon nin bena juguya ni fɔlɔ ta ye.” 65 Pilati y’a fɔ u ye ko: “A’ ye taga ni sɔrɔdasi dɔw ye walisa u ka kaburu nin kɔrɔsi i ko aw b’a fɛ cogo min na.” 66 O la, u tagara kaburu nin daa tugu ka ɲɛ ni kabakuru ye ani ka garadiw bila u k’a kɔrɔsi.