Matiyo ka kibaro diiman

15 O kɔ, Fariziɲɛw ni Sariya karamɔgɔ dɔw bɔra Zeruzalɛmu ka na Yezu fɛ. U y’a ɲininga ko: 2 “Mun na i ka kalandenw t’an bɛmaw ka landaw labato? Misali la, u t’u tɛgɛ ko* ka sɔrɔ ka dumuni kɛ.”

3 Yezu y’u jaabi ko: “Mun na aw tɛ Ala ka cikanw labato aw ka landaw kosɔn? 4 Misali la Ala ko, ‘I faa n’i baa bonya’ ani ‘Mɔgɔ min y’a faa wala a baa nɛni,* o tigi ka kan ka faga.’ 5 Nga, aw b’a fɔ ko ‘Ni mɔgɔ dɔ y’a fɔ a faa wala a baa ye ko: “N’ bololafɛn minw bɛɛ be se k’i nafa, n’ ye n’ daa di ka ban ko n’ bena o bɛɛ di Ala ma,” 6 waajibi tɛ o tigi k’a faa bonya.’ O cogo la, aw be Ala ka kuma kɛ kuma fuu ye aw ka landaw kosɔn. 7 Filankafo nunu! Kira Ezayi ye min fɔ aw koo la, o ye tiɲɛn yɛrɛ lo ye. A ko: 8 ‘Mɔgɔ nunu be ne bonya u daa lo la dɔrɔn, nga u dusukun yɔrɔ ka jan ne la kosɔbɛ. 9 U be min bɛɛ kɛra ka ne bato, o ye fuu lo ye sabu u be mɔgɔw kalan min na o ye adamadenw ka sariyaw dama lo ye.’” 10 O kɔ, a ye jama weele k’a fɔ u ye ko: “A’ y’aw tulo malɔ ka kuma nunu faamu: 11 fɛɛn min be don mɔgɔ daa la, o lo tɛ mɔgɔ nɔgɔ. Nga min be bɔ a daa la, o lo b’a nɔgɔ.”

12 O kɔ, a ka kalandenw nana a fɔ a ye ko: “I b’a lɔn ko i ka kumaw digira Fariziɲɛw na wa?” 13 Yezu y’u jaabi ko: “N’ sankolola Faa ma yiri o yiri tutu, o bena bɔn ka bɔ yen. 14 A’ y’u ye k’u to yen. Ɲɛminɛbaga fiyentɔw lo. Ni fiyentɔ b’a fiyentɔɲɔgɔn ɲɛminɛ, u fila bɛɛ bena ben dingɛ kɔnɔ.” 15 O kɔ, Piyɛri y’a fɔ a ye ko: “O talen kɔrɔ fɔ an ye.” 16 Yezu ko: “Aw fana tɛ faamuyali kɛ hali bi wa? 17 Aw m’a lɔn ko mɔgɔ be fɛɛn o fɛɛn don a daa la, o be jigi a kɔnɔ, o kɔ a be taga o bɔ banakɔ wa? 18 Nga min be bɔ mɔgɔ daa la, o be bɔ a dusukun lo la ani o lo be mɔgɔ nɔgɔ. 19 Misali la, miiriya juguw be bɔ mɔgɔ dusukun lo la. O lo be na ni mɔgɔfaga, ɲamɔgɔya, kakalaya,* sonyali, ngalontigɛ ani tɔgɔtiɲɛ kumaw ye. 20 O koow lo be mɔgɔ nɔgɔ. N’o tɛ, ka dumuni kɛ n’i m’i tɛgɛ ko,* o tɛ mɔgɔ nɔgɔ.”

21 Yezu bɔra o yɔrɔ la, ka taga Tiri ni Sidɔn mara la. 22 O yɔrɔ la, Fenisika muso dɔ gwɛrɛla a la, k’a kaan kɔrɔta k’a fɔ ko: “Matigi, Dawuda Dencɛ, makari ne la. N’ denmuso tɔɔrɔnin lo kosɔbɛ jina bolo.” 23 Nga Yezu ma foyi fɔ a ye. A ka kalandenw gwɛrɛla a la, k’a fɔ a ye ko: “A fɔ a ye ko a ka taga sabu a be kulera ka tugu an kɔ.” 24 Yezu ko: “Israɛlden minw be i n’a fɔ saga tununinw, ne cira olu dɔrɔn lo ma.” 25 Nga o muso nana a kunbiri gwan a kɔrɔ* k’a fɔ ko: “Matigi n’ dɛmɛ!” 26 Yezu y’a jaabi ko: “A daganin tɛ ka denmisɛnw ka dumuni* ta k’a fili wulu denninw ye.” 27 O muso y’a jaabi ko: “O ye tiɲɛn ye Matigi, nga wulutigi ka dumuni murumuru minw be ben tabali jukɔrɔ, wulu denninw b’o dumu.” 28 O la, Yezu y’a jaabi ko: “Muso, i ka limaniya barika ka bon dɛ! I be min ɲinina, o ka kɛ i ye.” O wagati yɛrɛ la, a denmuso kɛnɛyara.

29 Yezu bɔnin kɔ o yɔrɔ la, a sera Galile baji gɛrɛfɛ. A yɛlɛla kulu dɔ kan ka sigi. 30 O kɔ, jamaba dɔ gwɛrɛla a la. U nana ni namaraw, senkelenninw, fiyentɔw, bobow ani banabagatɔ caaman wɛrɛw ye. U y’ u bila Yezu sen kɔrɔ ani a y’u kɛnɛya. 31 Mɔgɔw kabakoyara k’a ye ko bobow be kumana, senkelenninw kɛnɛyara, namaraw be tagamana ani fiyentɔw be yeli kɛra. O la, u ye Israɛl ka Ala tando.

32 Yezu y’a ka kalandenw weele k’a fɔ u ye ko: “Jama nin makari be ne la sabu a tile saba ye nin ye u be ni ne ye ani foyi t’u fɛ k’a dumu. N’ t’a fɛ k’u kɔngɔtɔ bila ka taga. N’o tɛ, u barika be se ka dɛsɛ sira kan.” 33 A ka kalandenw y’a fɔ a ye ko: “An be se ka buru sɔrɔ min yɔrɔ lakolon nin na k’a di jama nin ma u k’a dumu ka fa?” 34 O la, a y’u ɲininga ko: “Burukun joli lo b’aw fɛ?” U ko: “Burukun wolonfila ani jɛgɛmisɛn damanin.” 35 A y’a fɔ jama ye k’u ka sigi duguma. 36 A ye burukun wolonfila ani jɛgɛmisɛn nunu ta ka barika la Ala ye. O kɔ, a y’u kari kari k’u di a ka kalandenw ma, kalandenw y’u di jama ma. 37 U bɛɛ ye dumuni kɛ ka fa, ani buru kunkurunin tɔɔ minw tora, u y’u cɛ ka segi wolonfila fa n’u ye. 38 Cɛɛ 4 000 lo ye dumuni kɛ, musow ni denmisɛnw ma jati. 39 Yezu ye sira di jama ma ka ban tuma min na, a donna kurun kɔnɔ ka taga Magadan mara la.