Matiyo ka kibaro diiman

22 Yezu tɛmɛna talenw fɛ tugun ka kuma u fɛ. A ko: 2 “Sankolo Masaya be i n’a fɔ masacɛ dɔ min y’a dencɛ ka kɔɲɔya dumuni labɛn. 3 Minw tun weelela o kɔɲɔya dumuni na, a y’a ka baaradenw bila ka taga u weele ka na. Nga, u banna ka na. 4 A ye baaraden wɛrɛw ci tugun k’a fɔ u ye ko: ‘Mɔgɔ minw tun weelela, a’ y’a fɔ u ye ko: “N’ ye n’ ka misi turaw ni n’ ka bɛgɛn tulɔninw faga, ani fɛɛn bɛɛ labɛnna ka ban. A’ ye na kɔɲɔya dumuni na.”’ 5 Nga, u weelela kuun min kama, u m’o jati. Dɔ tagara a yɛrɛ ka foro la, dɔ wɛrɛ tagara a ka jagokɛyɔrɔ la. 6 U tɔɔw ye masacɛ ka baaradenw minɛ k’u tɔɔrɔ ani k’u faga.

7 “Masacɛ dimina kosɔbɛ. A y’a ka sɔrɔdasiw ci ka taga mɔgɔfagala nunu halaki ani k’u ka dugu jɛni. 8 O kɔ, masacɛ y’a fɔ a ka baaradenw ye ko: ‘Kɔɲɔya dumuni labɛnna ka ban, nga minw tun weelela, olu man kan n’a ye. 9 A’ ye taga sirabadaw la, aw mana mɔgɔ o mɔgɔ sɔrɔ, a’ y’a weele ka na kɔɲɔya dumuni na.’ 10 O la, baaraden nunu tagara siradaw la ani u ye mɔgɔ o mɔgɔ sɔrɔ yen, mɔgɔ jugu lo wo, mɔgɔ ɲuman lo wo, u y’u bɛɛ lajɛn. Kɔɲɔbon fara jama na.

11 “Masacɛ donna ka mɔgɔ weelenin nunu lajɛ tuma min na, a ye cɛɛ dɔ ye min ma kɔɲɔya fani don. 12 O la, a y’a fɔ o cɛɛ ye ko: ‘N’ teri, i kɛra di ka don yan k’a sɔrɔ i ma kɔɲɔya fani don?’ Cɛɛ ma se k’a jaabi. 13 O la, masacɛ y’a fɔ a ka baaradenw ye ko: ‘A’ y’a seenw n’a bolow siri k’a fili kɛnɛma dibi la. O yɔrɔ la, a bena kasi ani k’a ɲiin ɲimi.’

14 “Sabu mɔgɔ weeleninw ka ca, nga mɔgɔ damanin lo sugandira.”

15 O kɔ, Fariziɲɛw ye bɛnbɛbɛn kɛ walisa ka Yezu minɛ a yɛrɛ dalakumaw fɛ. 16 O la, u y’u ka kalandenw ni Erɔdi kɔmɔgɔ dɔw ci k’a fɔ a ye ko: “Karamɔgɔ, an b’a lɔn ko i be tiɲɛn lo fɔ ani i be mɔgɔw kalan min na Ala koo la, o ye tiɲɛn ye. I t’a ɲini k’i koo diya mɔgɔ si ye sabu i tɛ mɔgɔ cogoya lo filɛ. 17 O la, i ka miiriya fɔ an ye. A daganin* lo ka ninsɔngɔ sara Ɔrɔmu masacɛ* ye wa, wala a daganin tɛ?” 18 Nga, komi Yezu tun b’u ka kɔnɔnajuguya kala ma, a y’u jaabi ko: “Filankafo nunu, mun na aw be n’ kɔrɔbɔra do? 19 Aw be ninsɔngɔ sara ni wari min ye, a’ y’o dɔ yira ne la.” O la, u ye wari deniye kelen d’a ma. 20 Yezu y’u ɲininga ko: “Jɔn jaa n’a ka sɛbɛri lo ye ten?” 21 U y’a jaabi ko: “Ɔrɔmu masacɛ lo.” O la, a y’a fɔ u ye ko: “Min ye masacɛ ta ye, aw k’o di masacɛ ma, nga min ye Ala ta ye aw k’o di Ala ma.” 22 U y’o mɛn tuma min na, u kabakoyara kosɔbɛ ani u tagara k’a to yen.

23 Saduseɲɛw b’a fɔ ko sukununi tɛ yen. O loon nin na, u nana Yezu ɲininga ko: 24 “Karamɔgɔ, Musa y’a fɔ ko ‘ni cɛɛ sara n’a ma deen sɔrɔ, a balimacɛ be se k’a muso ta walisa ka deen sɔrɔ banbagatɔ ye.’ 25 Mɔgɔ wolonfila tun b’an cɛma, balimaw tun lo. Fɔlɔ ye muso furu, o kɔ a sara k’a muso to yen a ma deen sɔrɔ n’a ye. A balimacɛ y’o muso ta. 26 Ale fana sara a ma deen sɔrɔ n’a ye. Balima sabanan fana ta kɛra ten fɔɔ ka taga se wolonfilanan ma. 27 A laban, o muso fana sara. 28 O mɔgɔ wolonfila cɛ, o muso bena kɛ jɔn lo ta ye sukununi loon na? Sabu a kɛra u bɛɛ muso ye ka ye.”

29 Yezu y’u jaabi ko: “Aw be fili la, sabu aw tɛ Ala ka Kuma n’a ka sebagaya lɔn. 30 Sukununi tuma na, cɛɛw tɛna musow furu, musow fana tɛna di cɛɛw ma furu la. Nga, u bena kɛ i ko mɛlɛkɛw sankolo la. 31 Ala ye min fɔ aw ye sukununi koo la, aw m’o kalan wa? A ko: 32 ‘Ne ye Ibrayima, Isiyaka ani Yakuba ka Ala ye.’ A tɛ mɔgɔ saninw ka Ala ye, nga ɲɛnamanw ka Ala.” 33 Jama y’o mɛn minkɛ, u kabakoyara kosɔbɛ a ka kalankɛcogo la.

34 Fariziɲɛw y’a mɛn tuma min na ko Yezu ye kuma ban Saduseɲɛw daa la, u ye ɲɔgɔn lajɛn* ka na. 35 U la dɔ tun be Sariya lɔn koɲuman. A tun b’a fɛ ka Yezu kɔrɔbɔ minkɛ, a y’a ɲininga ko: 36 “Karamɔgɔ, Sariya kɔnɔ, cikan juman lo kɔrɔtanin lo ka tɛmɛ tɔɔw bɛɛ kan?” 37 Yezu y’a jaabi ko: “‘I ka ɲi ka Jehova i ka Ala kanu n’i dusu bɛɛ ye, n’i niin bɛɛ ye ani n’i hakili bɛɛ ye.’ 38 O lo ye cikanw bɛɛ la kɔrɔtaninba ani fɔlɔ ye. 39 Filanan ye nin ye, o min bɔnin be fɔlɔ ma: ‘I ka kan k’i mɔgɔɲɔgɔn kanu i n’a fɔ i yɛrɛ.’ 40 Sariya kuturu bɛɛ ani kiraw ka kuma basiginin b’o cikan fila lo kan.”

41 Komi Fariziɲɛw tun lajɛnnin be yen, Yezu y’u ɲininga ko: 42 “Aw be mun lo miiri Krista koo la? Jɔn ka deen lo?” U y’a jaabi ko: “Dawuda dencɛ lo.” 43 A y’u ɲininga ko: “N’o lo, mun na Dawuda y’a weele hakili senu barika la ko Matigi? A ko: 44 ‘Jehova y’a fɔ n’ Matigi ye ko: “Sigi ne kinibolo fɛ fɔɔ n’ k’i juguw don i seen kɔrɔ.”’ 45 O la, ni Dawuda y’a weele ko Matigi, a be se ka kɛ a deen ye cogo di?” 46 Mɔgɔ si ma se k’a jaabi. K’a ta o loon ma, mɔgɔ si ma sɔn k’a ɲininga tugun.