Matiyo ka kibaro diiman

26 Yezu y’o kumaw bɛɛ fɔ ka ban tuma min na, a y’a fɔ a ka kalandenw ye ko: 2 “Aw b’a lɔn ko yanni tile fila, Tɛmɛnkan seli bena kɛ. U bena mɔgɔ Dencɛ don a juguw bolo ani u bena a siri gwengwelɔgɔ kan.”

3 O wagati yɛrɛ la, sarakalasebagaw kuntigiw ani jama cɛkɔrɔbaw ye ɲɔgɔn lajɛn sarakalasebagaw kuntigiba Kayifu ka luu kɔnɔ. 4 U bɛnna a la k’u bena Yezu minɛ ceguya la ani k’a faga. 5 Nga, u tun b’a fɔra ko: “An kana a minɛ ɲɛnagwɛ tuma na, n’o tɛ mɔgɔw bena muruti.”

6 Ka Yezu to Betani, kunatɔcɛ Simɔn ka soo, 7 muso dɔ gwɛrɛla a la ni alibatiri* daga dɔ ye, tulu kasa diiman sɔngɔ gwɛlɛ be min kɔnɔ. Ka Yezu to dumuni na, muso y’o tulu bɔn a kuun kan. 8 Yezu ka kalandenw y’o ye minkɛ, u dimina ani k’a fɔ ko: “Nin ye mun tiɲɛni lo ye ten? 9 O tulu kasa diiman tun be se ka feere sɔngɔ gwɛlɛ na ani k’o wari di fantanw ma.” 10 Komi Yezu bɔra o kala ma, a ko: “Mun na aw be muso nin niin tɔɔrɔla? A ye koo ɲuman lo kɛ ne ye do. 11 Fantanw be n’aw ye tuma bɛɛ, nga ne tɛna to n’aw ye tuma bɛɛ. 12 Muso nin y’o tulu kasa diiman bɔn ne fari kan walisa ka n’ labɛn sutarali kama. 13 Tiɲɛn na, ne b’a fɔ aw ye ko kibaro diiman mana fɔ duniɲa yɔrɔ o yɔrɔ, muso nin ye min kɛ, o fana bena lakali yen ka mɔgɔw hakili jigi a koo la.”

14 O la, Yezu ka kalanden tan ni fila nunu la kelen, min tɔgɔ ko Zuda Isikariyɔti, ale tagara sarakalasebagaw kuntigiw fɛ 15 ani k’a fɔ u ye ko: “Aw bena mun lo di ne ma ni n’ ye Yezu don aw bolo?” U bɛnna a la k’u bena warigwɛ 30 di a ma. 16 Kabi o tuma, Zuda tora ka sababu ɲini ka Yezu don u bolo.

17 Buru funubali ɲɛnagwɛ loon fɔlɔ, kalandenw nana Yezu ɲininga ko: “I b’a fɛ an ka Tɛmɛnkan seli dumuni labɛn i ye yɔrɔ juman le?” 18 A y’u jaabi ko: “A’ ye taga dugu kɔnɔ karimasina fɛ k’a fɔ a ye ko ‘Karamɔgɔ ko: “Ne ka wagati sera. Ne ni n’ ka kalandenw bena Tɛmɛnkan seli dumuni kɛ ele lo ka soo.”’” 19 Kalandenw y’a kɛ i ko Yezu y’a fɔ u ye cogo min na ani u ye Tɛmɛnkan seli labɛn.

20  Tile bennin kɔ, Yezu sigira dumuni na n’a ka kalanden 12 nunu ye. 21 K’u to dumuni na, a y’a fɔ ko: “Ne b’a fɔ aw ye tiɲɛn na ko aw dɔ bena ne janfa.” 22 O la, u dusu kasira kosɔbɛ ani u tora k’a ɲininga kelen kelen ko: “Matigi, ne tɛ. Tiɲɛn tɛ?” 23 Yezu y’u jaabi ko: “Mɔgɔ min b’a bolo donna ni ne ye tasa kɔnɔ, ale lo bena ne janfa. 24 Tiɲɛn lo, mɔgɔ Dencɛ bena sa i ko a sɛbɛnin be a koo la cogo min na, nga mɔgɔ min bena a janfa, bɔnɛ ye ale ta ye! N’o tigi yɛrɛ tun ma wolo, o tun ka fisa a ma.” 25 Zuda min tun bena a janfa, ale y’a ɲininga ko: “Karamɔgɔ, ne tɛ. Tiɲɛn tɛ?” Yezu y’a jaabi ko: “Ele yɛrɛ lo y’a fɔ.”

26 K’u to dumuni na, Yezu ye buru ta, ka barika la Ala ye. O kɔ, a y’o buru karikari k’o di a ka kalandenw ma ani k’a fɔ ko: “A’ y’a minɛ k’a dumu. Nin ye ne fari tagamasiɲɛ lo ye.” 27 O kɔ, a ye diwɛn ta, ka barika la Ala ye. A y’o di a ka kalandenw ma, ani k’a fɔ ko: “Aw bɛɛ k’a min, 28 sabu nin ye ne joli tagamasiɲɛ ye, joli min be Ala ka layidu sɛmɛntiya, ani a bena bɔn walisa mɔgɔ caaman ka se k’u ka jurumuw yafa sɔrɔ. 29 Nga ne b’a fɔ aw ye ko ne tɛna diwɛn min tugun, fɔɔ loon min na ne bena segi k’a min n’aw ye n’ Faa ka Masaya la.” 30 A laban, u ye tandoli dɔnkiliw* la. O kɔ, u bɔra ka taga Olivuyirikulu kan.

31 Yezu y’a fɔ u ye ko: “Koo minw bena ne sɔrɔ, u bena kɛ sentalonfɛn ye aw bɛɛ fɛ bi suu nin na, sabu a sɛbɛra ko: ‘Ne bena sagadɛndɛla bugɔ, a ka sagakulu bɛɛ bena yɛrɛkɛ.’ 32 Nga n’ suu kununin kɔ, n’ bena bila aw ɲɛ Galile.” 33 Piyɛri y’a fɔ a ye ko: “Hali n’o koow bena kɛ sentalonfɛn ye tɔɔw fɛ, u tɛna kɛ sentalonfɛn ye ne fɛ abada!” 34 Yezu y’a fɔ a ye ko: “Tiɲɛn na ne b’a fɔ i ye ko bi suu nin yɛrɛ la, sanni dondo ka kasi, i ben’a fɔ siɲɛ saba ko i tɛ ne lɔn.” 35 Piyɛri y’a fɔ ko: “Hali ni ne bena sa n’i ye, ne ten’a fɔ fewu ko n’ t’i lɔn.” Kalanden tɔɔw bɛɛ y’o kuma kelen lo fɔ.

36 Ayiwa, Yezu n’a ka kalandenw sera yɔrɔ dɔ la, u be min weele ko Zɛtisemane. A y’a fɔ u ye ko: “A’ ye sigi yan, ne bena taga delili kɛ yanfɛ.” 37 A tagara ni Piyɛri ni Zebede dencɛ fila ye. A dusu tun kasinin lo kosɔbɛ ani hamiba tun b’a la. 38 A y’a fɔ ko: “N’* dusu kasinin lo yɛrɛ le, dusukasi be ɲini ka n’ faga. A’ ye to yan ni ne ye, aw kana sinɔgɔ.” 39 A tagara ɲɛfɛ dɔɔni, k’a kunbiri gwan, k’a ɲɛɛ biri duguma ani ka delili kɛ ko: “Ne Faa, n’a be se ka kɛ, nin jifilen nin yɔrɔ janya ne la. O bɛɛ n’a ta, ne sago kana kɛ, fɔɔ ele sago.”

40 A kɔsegira a ka kalandenw yɔrɔ, ka n’a sɔrɔ u be sinɔgɔra. A y’a fɔ Piyɛri ye ko: “Aw ma se ka to ɲɛɛ na ni ne ye lɛri kelen yɛrɛ? 41 A’ ye to ɲɛɛ na ka to ka delili kɛ walisa kɔrɔbɔli kana see sɔrɔ aw kan. Mɔgɔ b’a fɛ n’a dusu bɛɛ ye ka koo ɲuman kɛ, nga a farisogo* barika ka dɔgɔ.” 42 A bɔra u kɔrɔ tugun siɲɛ filanan na ka taga delili kɛ ko: “N’ Faa, ni jifilen nin tɛ se ka tɛmɛ ni n’ ma a kɔnɔfɛn min, ayiwa, i sago ka kɛ.” 43 A kɔsegira tugun ka n’a sɔrɔ a ka kalandenw be sinɔgɔra sabu sinɔgɔ tun gwannin b’u la. 44 O la, a y’u to yen ka kɔsegi ka taga delili kɛ tugun a siɲɛ sabanan na ani a y’o kuma kelen nin lo fɔ delili kɛtɔ. 45 O kɔ, a kɔsegira a ka kalandenw yɔrɔ ani k’a fɔ u ye ko: “Wagati nin ɲɔgɔn na aw be sinɔgɔra ka lafiɲɛ kɛ! A filɛ, u bena mɔgɔ Dencɛ don jurumukɛlaw bolo wagati min na, o surunyana. 46 A’ ye wuli an ka taga. A filɛ! Ne janfabaga sera ka ban.” 47 K’a to kuma na, Zuda min tun ye kalanden tan ni fila nunu dɔ ye, ale sera ni jamaba dɔ ye. Murujanw ni berew tun b’u bolo. Sarakalasebagaw kuntigiw ani cɛkɔrɔbaw lo tun y’u ci.

48 A janfabaga tun ye tagamasiɲɛ dɔ di u ma ko: “N’ bena mɔgɔ min fo ka n’ bolo meleke a kaan na, ale lo, a’ y’a minɛ.” 49 A y’a ɲɛɛ sin Yezu ma ani k’a fɔ ko: “I ni suu karamɔgɔ!” O kɔ, a y’a bolo meleke a kaan na. 50 Nga, Yezu y’a fɔ a ye ko: “N’ teri, i nana mun lo kama?” O kɔ, jama gwɛrɛla Yezu la k’a minɛ. 51 Ayiwa, minw tun be ni Yezu ye, u la kelen y’a ka murujan sama ka bɔ ka sarakalasebagaw kuntigiba ka baaraden tulo caron. 52 Nga Yezu y’a fɔ a ye ko: “I ka murujan segi a nɔɔ na, sabu minw bɛɛ be kɛlɛ kɛ ni murujan ye, murujan lo bena u faga. 53 Wala ele m’a lɔn ko n’ be se ka n’ Faa deli walisa a ka mɛlɛkɛ waa caamanba* ci n’ ma sisan yɛrɛ wa? 54 Nga n’o kɛra, min fɔra Ala ka Kuma kɔnɔ ko koow ka ɲi ka kɛ ten, o bena dafa cogo di?” 55 O kɔ, Yezu y’a fɔ jama ye ko: “Aw nana ne minɛyɔrɔ ni murujanw ni berew ye i n’a fɔ ne ye benkannikɛla ye wa? Loon o loon, n’ tun be sigi ka mɔgɔw kalan Alabatosoba la, aw ma ne minɛ. 56 Nga o koow bɛɛ kɛra walisa kiraw* tun ye min fɔ, o ka dafa.” O la, kalandenw bɛɛ bolila k’a to yen.

57 Minw ye Yezu minɛ, u tagara n’a ye sarakalasebagaw kuntigiba Kayifu fɛ. Sariya karamɔgɔw ni cɛkɔrɔbaw tun lajɛnnin lo o yɔrɔ la. 58 Piyɛri tora yɔrɔjan ka to ka tugu a kɔ fɔɔ ka taga se sarakalasebagaw kuntigiba ka luu kɔnɔ. A donna ka sigi ni baaradenw ye walisa k’a filɛ min bena kɛ.

59 Sarakalasebagaw kuntigiw ni Yahutuw ka kititigɛsoba mɔgɔw* bɛɛ tun be seerew ɲinina, minw bena ngalon tigɛ k’a la Yezu kan janko u ka se k’a faga. 60 Nga, u ma foyi sɔrɔ, hali k’a sɔrɔ mɔgɔ caaman nana ngalon tigɛ ka la a kan. A laban, cɛɛ fila nana. 61 U ko: “Cɛɛ nin tun y’a fɔ ko ‘ne be se ka Alabatosoba nin ci ka tila k’a lɔ tile saba kɔnɔ.’” 62 Ayiwa, sarakalasebagaw kuntigiba wulila, k’a ɲininga ko: “I tɛ dɔ fɔ wa? Mɔgɔ nunu b’i jalakira min na, foyi t’i fɛ k’a fɔ o koo la wa?” 63 Nga Yezu jera, a ma foyi fɔ. O la, sarakalasebagaw kuntigiba y’a fɔ a ye ko: “Kali Ala ɲɛnaman tɔgɔ la k’a fɔ an ye ni ele lo ye Krista ye, Ala Dencɛ!” 64 Yezu y’a jaabi ko: “Ele yɛrɛ lo y’a fɔ. Nga ne b’a fɔ aw ye ko k’a ta sisan ma, aw bena mɔgɔ Dencɛ siginin ye setigi Ala kinibolo fɛ ani k’a natɔ ye sankabaw kan.” 65 O la, sarakalasebagaw kuntigiba y’a ka faniw faran ani k’a fɔ ko: “A ye Ala tɔgɔ tiɲɛ! An mako be seerew la tugun wa? A ye Ala nɛni cogo min na, aw yɛrɛ y’o mɛn. 66 Aw ka miiriya ye mun ye?” U y’a jaabi ko: “A ka kan ka faga.” 67 O la, u ye daji tu a ɲɛda kan ani k’a bugɔ n’u bolokuruw ye. Dɔ wɛrɛw y’a tulo ci 68 ani k’a fɔ ko: “E min ye Krista ye kiraya kɛ kɛ! A fɔ an ye, jɔn lo y’i bugɔ?”

69 Piyɛri tun siginin be lukɛnɛ na. Baaraden musoman dɔ gwɛrɛla a la, k’a fɔ a ye ko: “Ele fana tun be ni Galileka Yezu ye!” 70 Nga a y’a sɔsɔ bɛɛ ɲɛɛ na k’a fɔ ko: “N’ m’a lɔn i be min fɔra.” 71 A tagatɔ luda la, baaraden musoman wɛrɛ y’a ye. Minw tun be yen, o baaraden y’a fɔ olu ye ko: “Cɛɛ nin tun be ni Nazarɛtika Yezu ye.” 72 Piyɛri y’o baaraden fana sɔsɔ ani ka kali k’a fɔ ko: “N’ tɛ cɛɛ nin lɔn!” 73 Dɔɔni o kɔ, minw tun be o yɔrɔ la, olu y’a fɔ Piyɛri ye ko: “Siga t’a la, ele fana y’u dɔ ye. I kumacogo yɛrɛ b’o yira.” 74 Nga, Piyɛri y’a daminɛ ka dangali kɛ ani ka kali k’a fɔ ko: “N’ tɛ cɛɛ nin lɔn!” O yɔrɔnin bɛɛ, dondo kasira. 75 O tuma na, Piyɛri hakili jigira ko Yezu tun y’a fɔ ko: “Sanni dondo ka kasi, i ben’a fɔ siɲɛ saba ko i tɛ ne lɔn.” O kɔ, a bɔra ka taga kasi kosɔbɛ dusukasi kojugu bolo.