Matiyo ka kibaro diiman
3 O wagati la, Zan Batizelikɛla nana to ka waajuli kɛ Zude kongokolon na 2 ko: “A’ ye nimisa, sabu sankolo Masaya surunyana.” 3 Kira Ezayi tun be kumana ale lo koo la tuma nin na a ko: “Kumakanba dɔ be bɔra kongokolon kɔnɔ ko: ‘A’ ye Jehova ka sira labɛn. A’ ye a ka siraw latilen.’” 4 Zan ka fani tun dilanna ni ɲɔgɔmɛsi ye ani cɛsirilan gololaman tun b’a cɛɛ la. A ka dumuni tun ye tɔɔnw ani kongokɔnɔli lo ye. 5 Mɔgɔw tun be bɔ Zeruzalɛmu, Zude faan bɛɛ ani Zurudɛn gɛrɛfɛduguw bɛɛ la ka n’a sɛgɛrɛ. 6 Zan tun b’u batize* Zurudɛn baji la ani u tun b’u kɔnɔ gwɛ k’u ka jurumuw fɔ.
7 Tuma min na a y’a ye ko Fariziɲɛw ni Saduseɲɛ caaman be nana a yɔrɔ, a y’a fɔ u ye ko: “Aw fɔnfɔnninden nunu, jɔn le ye aw lasɔmi ko aw ka boli Ala ka dimiyaba nata ɲɛ? 8 Ayiwa, aw k’a yira aw ka kɛwalew fɛ ko aw nimisara. 9 Aw kan’a miiri ko aw ye Ibrayima deenw ye minkɛ, o dama be bɔri kɛ. Bari ne b’a fɔ aw ye ko Ala be se ka kabakuru nunu yɛlɛma k’u kɛ Ibrayima deenw ye. 10 Jende be yiriw lili kan ka ban. O la, yiri o yiri tɛ deen ɲuman kɛ, o bena tigɛ ka fili tasuma kɔnɔ. 11 Ne kɔni be aw batize jii la sabu aw nimisara. Nga, min be nana ne kɔ, ale barika ka bon ni ne ta ye. K’a ka sanbara bɔ a seen na yɛrɛ, ne man kan n’o ye. Ale bena aw batize ni hakili senu ani tasuma ye. 12 A ka sumanfiyɛnan b’a bolo. A bena a ka sumangosikɛnɛ bɛɛ saniya ani k’a ka bile don bondo kɔnɔ. Nga a ɲaga, a bena o jɛni tasuma na min tɛ se ka faga.”
13 O kɔ, Yezu bɔra Galile ka na Zan fɛ Zurudɛn baji yɔrɔ la walisa a k’ale batize. 14 Nga, Zan tun b’a fɛ k’a bali o la. A ko: “Ele lo ka ɲi ka ne batize. A do kɛra di ele be nana ne fɛ?” 15 Yezu y’a jaabi ko: “An ka koow kɛ ten fɔlɔ, sabu o cogo lo la an bena Ala sago dafa.” O kɔ, Zan m’a bali tugun. 16 Yezu batizenin kɔ dɔrɔn, a bɔra jii la. A filɛ, sankolo dayɛlɛla ani a ye Ala ka hakili senu jigitɔ ye a kan i ko jɛnɛtugan. 17 Kumakan dɔ bɔra fana sankolo la ko: “Nin ye ne Dencɛ lo ye. Ne Dencɛ kanulen, min koo ka di ne ye haali.”