Cɛɛ jagwɛlɛ dɔ

MƆGƆW daminɛna ka caya dugukolo kan ani u fanba tun be koo jugu kɛ i ko Kayɛn. Nka, cɛɛ kelen tun be dan na. O cɛɛ be weele ko Enɔki. Enɔki tun ye cɛɛ jagwɛlɛ ye. A lamini mɔgɔw bɛɛ tun be koo jugubaw kɛ, nka Enɔki tora ka baara kɛ Ala ye.

Yala i b’a lɔn fɛɛn min y’a to mɔgɔw tun be koo jugu kɛ wa? Miiri k’a filɛ, jɔn lo y’a to Adama ni Awa ye Ala kaan bila ani ka yiriden dumu Ala tun ko u kana min dumu? Mɛlɛkɛ jugu dɔ tun lo. Bibulu b’a weele ko Sutana. A b’a ɲini ka mɔgɔw bɛɛ kɛ kojugukɛlaw ye.

Loon dɔ, Jehova Ala y’a ɲini Enɔki fɛ a ka koo dɔ fɔ mɔgɔw ye u tun t’a fɛ ka min mɛn. A ye min fɔ, o filɛ nin ye: ‘Loon dɔ, Ala bena mɔgɔ juguw bɛɛ halaki.’ Mɔgɔw y’o kuma mɛn tuma min na, i be taga a sɔrɔ u dimina kosɔbɛ. N’a sɔrɔ, u y’a ɲini ka Enɔki faga yɛrɛ. O lo kama Enɔki tun ka ɲi k’a jaa gwɛlɛya ani k’a fɔ o mɔgɔw ye Ala bena min kɛ.

Ala m’a to Enɔki ka sii jan sɔrɔ o mɔgɔ juguw cɛma. Enɔki ye saan 365 dɔrɔn lo sɔrɔ. Mun na an ko “saan 365 dɔrɔn”? Sabu o wagati mɔgɔw barika tun ka bon ani u tun be sii jan sɔrɔ ka tɛmɛ bimɔgɔw ta kan. O yɛrɛ lo y’a to Enɔki dencɛ Metusela ye saan 969 sɔrɔ.

Enɔki sanin kɔ, mɔgɔw sɔɔn juguyara tugun kosɔbɛ. Bibulu b’a fɔ ko: “U miiriya bɛɛ tun ka jugu tuma bɛɛ,” ani ko ‘dugukolo fara fariyakow la.’

Yala i b’a lɔn fɛɛn min y’a to dugukolo tun ɲagaminin lo o wagati la wa? Sabu Sutana tun ye fɛɛrɛ kura dɔ sɔrɔ walisa ka mɔgɔw lasun k’u don kojugukɛ la. An bena o fɛɛrɛ koo lo kalan ɲɛɛ nata la.