Koow Ɲɛnabɔla Jɛnkulu ka bataki

Balima kanulenw

An be La Tour de Garde min yira jama na, k’a daminɛ saan 2008, zanwiyekalo tile fɔlɔ ta ma, barokun diiman nunu tora ka bɔ a kɔnɔ: “Imitez leur foi” [“U ka limaniya ladegi.”] Kabi o tuma, o barokun tora ka bɔ kalo saba saba bɛɛ. O kɛra ninsɔndiyako ye an fɛ!

O barokunw ye mun lo kɛ u kalanbagaw la do? Balimamuso dɔ ye Marita ka maana kalan ka ban, ani a y’a sɛbɛ ko: “Ne yɛlɛla sabu ne be komi Marita le jaatika. Tuma bɛɛ ne bolo degunnin lo sabu n’ b’a fɛ ka kɛ jatigi ɲuman ye. Nka, tuma dɔw la, n’ be ɲinɛ ko n’ ka kan ka baara dabila ani ka jɛn ni teriw ye.” Ɛsitɛri ka maana kalanni kɔ, sunguru dɔ ko: “Ne y’a faamu ko an be se ka hami kojugu an ka fani dontaw ani sangawili koo la. An ka kan k’an janto an sawura la, nka an man kan k’a dama tɛmɛ.” A y’a fara a kan ko: “Min kɔrɔtanin lo Jehova ɲɛɛ kɔrɔ, o ye an sɔɔn lo ye.” Piyɛri ka maana kalan ye balimamuso dɔ ninsɔndiya ani a ko: “A kɛra komi u tun be ne yɛrɛ ka kuma lo fɔra ani n’ tun be o yɔrɔ la! N’ tun be yɔrɔ minw kalanna, n’ y’a kɛ komi n’ ɲɛɛ be koow kɛtɔ la, n’ tulo be mankanw na ani a ɲɔgɔnnaw.”

Balima caaman wɛrɛw ye lɛtɛrɛw ci k’a yira k’o barokunw diyara u ye. Olu ni minw kofɔra ka tɛmɛ, u bɛɛ ka kumaw b’a yira ko Pol ye min sɛbɛ, o ye tiɲɛn ye. A ko: “Koo minw bɛɛ tun fɔra Ala ka kuma na kabini fɔlɔfɔlɔ, o fɔra ka hakili d’an ma.” (Ɔrɔm. 15:4). Tiɲɛn lo, Jehova ye o maanaw fara Bibulu kɔnɔkow kan walisa k’an kalan koo nafamanw na. An ye tiɲɛn lɔn a mɛɛnna wo, a ma mɛɛn wo, an bɛɛ be se ka ladili nafamanw sɔrɔ u la.

An b’i jija ko i ka teliya ka gafe nin kalan. I k’a lajɛ gwa kɔnɔ batoli tuma na. Siga t’a la, a bena diya denmisɛnw ye! N’o gafe kalan daminɛna kafo kɔnɔ, banba i kana fɔn kalan si la! I dusu suman k’a kalan ani ka miiri a kan. A kɛ komi i be yen o maanaw kɛyɔrɔ la: A ɲini ka kɛ n’o mɔgɔw ka dusukunnataw ye. U ɲɛɛ lara min kan, a kɛ komi i ɲɛɛ b’o la fana. Olu ye koow ta cogo min na, a filɛ e tun bena min kɛ fana.

An dusu ka di kosɔbɛ k’a to aw ka gafe nin sɔrɔ. An be Jehova deli ko e n’i ka denbaya ka nafaba sɔrɔ gafe nin kalan na. An be aw kanu kosɔbɛ! Ka aw ni hɛɛrɛ bɛn,

Jehova Seerew ka Koow Ɲɛnabɔla Jɛnkulu