Lolo lɔnbagaw tagara bɔ Yezu ye

Cɛɛ dɔw bɔra kɔrɔn fan fɛ. Lolo lɔnbagaw lo. U be lolow lɔyɔrɔ sɛgɛsɛgɛ. U ka fɔta la, u b’o kɛ walisa ka mɔgɔw ka koow kɔrɔ fɔ (Ezayi 47:13). K’u to u ka soo kɔnɔ kɔrɔn fan fɛ, u ye “lolo” dɔ ye ani u ye kilomɛtɛrɛ caaman kɛ ka tugu a kɔ. O lolo ma taga n’u ye Bɛtilehɛmu dɛ! Nka, a tagara n’u ye Zeruzalɛmu le.

Lolo lɔnbagaw sera tuma min na, u ye ɲiningali kɛ ko: “Zuwifuw ka masacɛ min wolola sisan, a be min? An nan’a boɲa bari an y’a ka lolo ye k’an to kɔrɔn fɛ.”—Matiyo 2:1, 2.

Masacɛ Erɔdi y’o mɛn Zeruzalɛmu tuma min na, o y’a hakili ɲagami. O kama, a ye sarakalasebagaw kuntigiw ni Yahutuw ka diinan kuntigi dɔw weele k’u ɲininga ko Krista ka kan ka wolo min. U basigira Ala ka kuma kan k’a jaabi ko: “A ka kan ka wolo Bɛtilehɛmu.” (Matiyo 2:5; Mise 5:1). Erɔdi y’o mɛn minkɛ, a y’a fɔ lolo lɔnbagaw ye dogo la ko: “Aw ye taga Bɛtilehɛmu ka denɲɛnin yɔrɔ ɲini ka ɲa. N’aw y’a ye, aw ye kɔsegi ka n’a fɔ ne ye janko ne fana ka taga boɲa.” (Matiyo 2:8). Nka tiɲɛn na, a tun be deen yɔrɔ ɲinina k’a faga le!

Lolo lɔnbagaw taganin kɔ, koo kabakoman dɔ kɛra. U ye lolo min ye k’u to kɔrɔn fan fɛ, o lolo bilara u ɲɛfɛ. Tiɲɛn na, nin tɛ lolo gwansan ye! A tun be yen walisa ka sira lo yira u la. A ye lolo lɔnbagaw ɲɛminɛ fɔɔ ka taga lɔ boon dɔ sanfɛ, yɔrɔ min na Yusufu, Mariyamu n’u deen Yezu be yen.

Lolo lɔnbagaw donna boon kɔnɔ tuma min na, u ye Mariyamu n’a dencɛ Yezu sɔrɔ yen. U y’u kunbiri gwan a kɔrɔ. U ye sanu, wusulan ani tulu kasadiman di a ma. U tun labɛnnin lo ka taga Erɔdi fɛ. Nka, Ala y’a fɔ u ye siko la k’u kana taga yen. O kosɔn, u ye sira wɛrɛ ta ka kɔsegi u faso la.

Ele ka miiriya la, jɔn lo y’a to o “lolo” ye lolo lɔnbagaw ɲɛminɛ? I hakili to a la ko o lolo ma sin ka taga n’u ye Yezu fɛ Bɛtilehɛmu. Nka, a tagara n’u ye masacɛ Erɔdi fɛ Zeruzalɛmu. Erɔdi bele b’a fɛ ka Yezu faga. A tun bena o lo kɛ ni Ala tun m’a fɔ lolo lɔnbagaw ye k’u kana Yezu yɔrɔ fɔ a ye. Tiɲɛn na, Sutana lo tun b’a fɛ ka Yezu faga ani a tɛmɛna o lolo fɛ walisa k’a sago dafa.