“Tiɲɛ na, cɛɛ nin tun ye Ala Deen ye”

Midi sera sisan. Dibi kabakoman dɔ donna “yɔrɔ bɛɛ fɔɔ ka lɛrɛ saba kɛ,” o kɔrɔ fɔɔ ka se wulafɛ 3h tuma (Mariki 15:33). O dibi kɔrɔ tɛ ko jakuma lo ye tile minɛ sabu o ka teli ka kɛ kalo kura wagati lo la. Nka, an be Tɛmɛnkan seli wagati lo la ani kalo b’a tan ni fila la. Ni jakuma ye tile minɛ, o be wagati dɔɔni dɔrɔn lo kɛ. Nka, nin dibiba mɛɛnna ka tɛmɛ o kan. Nin dibiba bɔra Ala yɔrɔ le!

Mɔgɔ minw tun be Yezu lɔgɔbɔra, miiri k’a filɛ o koo ye min kɛ u la! O dibiba wagati la, muso naani gwɛrɛla Yezu ka gwengwenlɔgɔ kɔrɔ. O musow ye Yezu bamuso ni Salome, Magadala Mariyamu ani ciden Zaki fitinin bamuso Mariyamu lo ye.

Yezu bamuso be kasira ani ciden Zan lɔnin b’a kɔrɔ “Yezu ka gwengwenlɔgɔ gɛrɛfɛ.” Mariyamu ye dencɛ min minɛ a bolo ani k’a ladon, a ɲɛɛ b’o la a be tɔɔrɔla. Mariyamu fɛ, a be komi u y’ale “sɔgɔ ni muru ye.” (Zan 19:25; Luka 2:35). Dimiba be Yezu kan. O bɛɛ n’a ta, a be jɔrɔla a bamuso koo la. A ye jijaliba kɛ k’a kuun fifa Zan fan fɛ ani k’a fɔ a bamuso ye ko: “Muso, i deen filɛ nin ye.” O kɔ, a y’a kuun fifa Mariyamu fan fɛ k’a fɔ Zan ye ko: “I bamuso filɛ nin ye.”—Zan 19:26, 27.

Yezu be ciden min kanu kosɔbɛ, a y’a bamuso kalifa ale ma sabu a be komi Mariyamu cɛɛ Yusufu tun sara. Yezu b’a lɔn ko a badenw, o kɔrɔ Mariyamu ka deen tɔɔw ma limaniya ale la fɔlɔ. O kama, Yezu be labɛnw kɛra walisa a bamuso mako ka wasa farikolo ani Alako ta fan fɛ. O ye ɲɛyirali ɲuman ye dɛ!

Dibi banwagati fan fɛ, Yezu ko: “Minnɔgɔ be ne la.” A y’o fɔ walisa ka kiraya kuma dɔ dafa (Zan 19:28; Zaburuw 22:16). A kɛra Yezu ɲɛɛ na komi a Faa y’ale bila walisa a Deen ka kantigiya ka kɔrɔbɔ fɔɔ ka se a daan ma. Aramekan min be fɔ Galile mara la, Yezu kulera o kaan na ko: “Eloyi, Eloyi, lamasabakitani?” O kɔrɔ ko: “Ne ka Ala, ne ka Ala, mun na i ye ne bila?” Mɔgɔ minw tun be yen, u dɔw m’o kuma mɛn ka ɲɛ ani u ko: “Aw k’aw tulo malɔ. A be kira Eli welela.” U dɔ bolila ka taga fuu ta, k’a don diwɛn kumunin na, k’a bila bere jamanjan dɔ kun na, k’a di Yezu ma a k’a min. Nka, u dɔw ko: “Aw ye lɔ. An ben’a filɛ yala ni Eli bena na a bɔ gwengwenlɔgɔ nin na.”—Mariki 15:34-36.

O kɔ, Yezu kulera ko: “Koo bɛɛ dafara.” (Zan 19:30). Tiɲɛn na, a Faa y’a ci ka na koo minw bɛɛ kɛ dugukolo kan, a y’u bɛɛ kɛ k’a dafa. A laban, Yezu ko: ‘N Faa, ne be n niin segi i ma.’ (Luka 23:46). A y’a niin kalifa Jehova ma ani a tun lanin b’a la ko a bena ale lakunu. Yezu m’a jigi tigɛ Ala la fewu. A y’a kuun biri ani a sara!

O wagati la, dugukolo yɛrɛyɛrɛla kosɔbɛ, faraw cira. A barika bonyana fɔɔ kaburu minw be Zeruzalɛmu kɔfɛ, olu daaw yɛlɛla ani suuw filila kɛnɛma. Tɛmɛbagaw y’o suuw filinin ye kɛnɛma. U donna “dugu senuman” kɔnɔ ani u ye koo minw ye, u y’o lakali.—Matiyo 12:11; 27:51-53.

Yezu satuma na, faniba jamanjan min be Yɔrɔ Senuman ni Yɔrɔ Senuman Senuman cɛ Alabatosoba kɔnɔ, o faranna fila, k’a daminɛ sanfɛ fɔɔ duguma. O kabako b’a yira ka gwɛ ko mɔgɔ minw ye Yezu faga, Ala dimina u kɔrɔ. A b’a yira fana ko k’a ta o wagati ma, mɔgɔw tun be se ka don Yɔrɔ Senuman Senuman kɔnɔ, o kɔrɔ ka taga sankolo la.—Eburuw 9:2, 3; 10:19, 20.

An b’a faamu k’o koow ye siranya bila mɔgɔ bɛɛ la. Yezu fagako kalifara sɔrɔdasiw kuntigi min ma, ale ko: “Siga t’a la, cɛɛ nin tun ye Ala Deen ye.” (Mariki 15:39). N’a sɔrɔ a tun be Yezu kititigɛyɔrɔ la Pilati ɲɛfɛ tuma min na Yahutuw y’a fɔ ko Yezu ko ale ye Ala Dencɛ ye. Sisan, a lara a la ko Yezu ye mɔgɔ tilennin ye ani ko tiɲɛn na Ala Dencɛ lo.

O koo ye mɔgɔ dɔw kabakoya fɔɔ u tagatɔ u ka soo, u tora k’u “disi gosi” dusukasi ni maloya kosɔn (Luka 23:48). Mɔgɔw tun lɔnin be yɔrɔjan ka to ka Yezu filɛ. Muso caaman b’u cɛma minw ye Yezu ka kalandenw ye ani tuma dɔw la, u tugura a kɔ a ka tagamaw la. O koobaw y’o musow fana kabakoya.