A ka limaniya kɔrɔbɔra

Ibrayima tun y’a dencɛ Isiyaka kalan ko a ka Jehova kanu ani a ka la Jehova ka layiduw bɛɛ la. Nka tuma min na Isiyaka sera saan 25 ɲɔgɔn, Jehova y’a fɔ Ibrayima ye ko a ka koo dɔ kɛ min tun bena gwɛlɛya a ma kosɔbɛ. Koo juman tun lo?

Ala y’a fɔ Ibrayima ye ko: ‘Sabari k’i dencɛ kelenpe minɛ k’a kɛ saraka ye kulu dɔ kan Moriya mara la.’ Ibrayima tun t’a lɔn mun na Jehova ko a k’o kɛ. O bɛɛ n’a ta, a ye mɛnni kɛ Jehova fɛ.

O dugusagwɛ sɔgɔma joona, Ibrayima tagara ni Isiyaka ni baaraden fila ye Moriya mara la. Tile saba tɛmɛnin kɔ, u tun be se ka kuluw ye yɔrɔjan. Ibrayima y’a fɔ a ka baaradenw ye k’u ka kɔnɔni kɛ sanni ale ni Isiyaka be taga saraka bɔ. Ibrayima ye lɔgɔ ɲun Isiyaka kun na ani ale ye muru ta. Isiyaka y’a facɛ ɲininga ko: ‘An bena sagaden min kɛ saraka ye, o be min?’ Ibrayima y’a jaabi ko: ‘Ne deen, Jehova bena o koo ɲɛnabɔ.’

U sera kulu kan tuma min na, u ye sarakabɔlan lɔ. O kɔ, Ibrayima ye Isiyaka bolow n’a seenw siri ani a y’a ta k’a la sarakabɔlan kan.

Ibrayima ye muru ta tuma min na, Jehova ka mɛlɛkɛ tora sankolo la k’a weele ko: ‘Ibrayima! Kana foyi kɛ deen nin na. Ne y’a lɔn sisan ko i lanin be Ala la sabu i tun b’a fɛ k’i dencɛ kɛ saraka ye.’ O kɔ, Ibrayima ye sagajigi dɔ balannin ye a gɔɔnw fɛ yiri denninw cɛma. A ye Isiyaka foni yɔrɔnin kelen ani k’o sagajigi kɛ saraka ye Isiyaka nɔɔ na.

Kabini o loon, Jehova ye Ibrayima weele ko a tericɛ. I b’a lɔn fɛɛn min kama wa? Jehova tun be fɛɛn min bɛɛ fɛ, Ibrayima tun b’o kɛ, hali n’a tun t’a lɔn mun na Jehova ko a k’o kɛ.

Jehova segira a ka layidu kan Ibrayima ye ko: ‘Ne bena i duga ani k’a kɛ i kɔmɔgɔw be caya.’ O kuma kɔrɔ ko Jehova tun bena mɔgɔ ɲumanw bɛɛ duba Ibrayima ka denbaya sababu la.