Mɛlɛkɛw be Yezu woloko fɔ

Ɔrɔmu masacɛ Ogusiti tun y’a ɲini Yahutuw bɛɛ fɛ k’u ka taga u tɔgɔw sɛbɛ u woloduguw la. O kama, Yusufu ni Mariyamu tagara Bɛtilehɛmu, Yusufu faso la. Mariyamu jigi tuma tun gwɛrɛla.

U senin Bɛtilehɛmu, u tun be se ka yɔrɔ min sɔrɔ ka sigi, o tun ye wɛɛrɛ dɔrɔn lo ye. O yɔrɔ la le Mariyamu y’a dencɛ Yezu wolo. A y’a meleke fanimugu la k’a bila nɛmɛnɛmɛ bɛgɛnw ka dumuni minan kɔnɔ.

Bɛgɛndɛndɛla dɔw tun be si kɛnɛma Bɛtilehɛmu gɛrɛfɛ k’u ka bɛgɛnw kɔrɔsi. Mɛlɛkɛ dɔ barila ka bɔ u ɲɛfɛ ani Jehova ka nɔɔrɔ yeelen y’u lamini. Bɛgɛndɛndɛlaw siranna, nka mɛlɛkɛ ko: ‘Aw kana siran. Kibaro diiman dɔ be n’ fɛ. Masiya wolola bi Bɛtilehɛmu.’ O tuma na, mɛlɛkɛ caaman y’u yɛrɛ yira sankolo la ani u ko: ‘Ala ka tando sankolo la, hɛɛrɛ ka kɛ dugukolo kan.’ O kɔ, mɛlɛkɛw tununa. Bɛgɛndɛndɛlaw ye mun lo kɛ do?

Bɛgɛndɛndɛlaw y’a fɔ ɲɔgɔn ye ko: ‘An ka teliya ka taga Bɛtilehɛmu.’ U teliyara ka taga Yusufu ni Mariyamu sɔrɔ wɛɛrɛ kɔnɔ n’u ka denɲɛnin ye.

Mɛlɛkɛ ye min fɔ bɛgɛndɛndɛlaw ye, mɔgɔ min mana o mɛn, a be kabakoya. Mariyamu miirila kosɔbɛ mɛlɛkɛ ka kumaw na ani a ma ɲinɛ u kɔ abada. Bɛgɛndɛndɛlaw kɔsegira u ka bɛgɛnw yɔrɔ la. U tun ye min bɛɛ ye ani ka min bɛɛ mɛn, u tun be Jehova tando o kosɔn.