“I ka Masaya ka na”

Jehova ye layidu ta ko: ‘Mɔgɔ tɛna kasi tugun. Mɔgɔ tɛna tɔɔrɔ, mɔgɔ tɛna bana, mɔgɔ tɛna sa tugun. N’ bena mɔgɔw ɲɛji bɛɛ cɛ ka bɔ u ɲɛɛ la. Mɔgɔw bena ɲinɛ koo jugu tɛmɛninw bɛɛ kɔ.’

Jehova tun ye Adama ni Awa bila Edɛn nankɔ kɔnɔ walisa u ka ɲɛnamaya kɛ hɛɛrɛ ni ninsɔndiya la. U tun ka ɲi k’u sankolola Faa bato ani ka deenw sɔrɔ ka dugukolo fa. Adama ni Awa ma mɛnni kɛ Jehova fɛ. Nka, Jehova tun b’a fɛ ka min kɛ, a m’o yɛlɛma. An y’a ye gafe nin kɔnɔ ko ni Ala y’a daa di koo o koo la, a b’o kɛ. A ka Masaya bena dugaw lase adamadenw ma dugukolo kan i ko a tun y’a fɔ Ibrayima ye cogo min na.

Yanni dɔɔni, Ala bena Sutana n’a ka jinaw ani mɔgɔ juguw bɛɛ halaki. O kɔ, bɛɛ bena Jehova lo bato. An tɛna bana ani an tɛna sa tugun. Loon o loon, an bena wuli ni fanga kura ye ani ka ɲɛnamaya kɛ ninsɔndiya la. Dugukolo bena kɛ alijɛnɛ ye. Bɛɛ bena to ka dumuni diimanw kɛ ani ka si boon ɲuman kɔnɔ hɛɛrɛ la. Mɔgɔw bena ɲɔgɔn minɛ ni ɲumanya ye, u tɛna fariyakow kɛ tugun. Kongosogow tɛna siran an ɲɛ tugun ani an fana tɛna siran u ɲɛ tugun.

Tuma min na Jehova bena a daminɛ ka suuw kunu, an bena ninsɔndiya kosɔbɛ! An bena fɔlɔfɔlɔ mɔgɔ dɔw ye i n’a fɔ Abɛli, Nuhun, Ibrayima, Sara, Musa, Ruti, Ɛsitɛri ani Dawuda. U bena an dɛmɛ ka dugukolo yɛlɛma k’a kɛ alijɛnɛ ye. Baara ɲuman caaman bena kɛ yen tuma bɛɛ.

Jehova b’a fɛ i ka kɛ alijɛnɛ kɔnɔ. I bena Jehova lɔn koɲuman fɔɔ ka bari i yɛrɛ la. Kabi sisan, an ka to k’an magwɛrɛ Jehova la loon o loon ani fɔɔ abada!