KALANSEN 18

Kalan kɛcogo min be mɔgɔ nafa

1 Korɛntikaw 9:19-23

MIIRIYA JƆNJƆN: I lamɛnbagaw lasun u ka jatiminɛ kɛ. O la, u ben’a ye ko u ye fɛɛn nafaman dɔ faamu.

Miiri k’a filɛ i lamɛnbagaw be min lɔn ka ban: U be min lɔn ka ban, sanni i ka segi k’o lo fɔ u ye dɔrɔn, u dɛmɛ ka faamuyali kura sɔrɔ.

U be min lɔn ka ban, kana wagati caaman ta ka kuma o koo la. Nka u tɛ min lɔn, wagati ta k’o walawala ka ɲɛ.
Sɛgɛsɛgɛri kɛ ani miiri i ka kalan kan: N’a be se ka kɛ, kunnafoni kuraw wala kibaro kura dɔw fɔ walisa ka miiriya jɔnjɔnw ɲɛyira. I bena kalan min kɛ, miiri o kan koɲuman. Ani, i b’a fɛ ka ɲɛyirali minw ta, a filɛ n’o ɲɛyiraliw n’i ka kalan be taga ɲɔgɔn fɛ.

I ka kalan labɛntɔ, miiri a kan i kɛtɔ k’i yɛrɛ ɲininga ko: “Mun na o ye tiɲɛn ye? N’ be se k’o yira cogo di? Mun lo b’a to a ka gwɛlɛ mɔgɔw fɛ ka la o la? O koo kɛra tuma juman? An be se k’o sira tagama cogo di?” N’i b’o ɲiningali ɲɔgɔnw kɛ ani ka tila k’u jaabi i ka kalan na, o bena mɔgɔw lasun u k’a ɲini ka dɔ lɔn tugun.
I ka kalan nafa yira: I lamɛnbagaw dɛmɛ u k’a ye cogo min na Bibulu kɔnɔnakumaw be se k’u dɛmɛ u ka loon o loon ɲɛnamaya la. Kuma koo dɔw la, miiriya dɔw wala kokɛcogo tigitigi dɔw la minw be se ka ɲɛsin i lamɛnbagaw ma.