1. Dugukoloyɛrɛyɛrɛw

“Dugukolo bena yɛrɛyɛrɛ kosɔbɛ.”—LUKA 21:11.

● Winnie ye saan kelen ni kalo wɔɔrɔ deen ye, u ye min wɔgɔbi ka bɔ boon halakininw na Hayiti jamana na, dugukoloyɛrɛyɛrɛ dɔ kɛnin kɔ. Zurunalisi dɔw lo y’a kasikan mɛn k’u to u ka baara la. Ale kisira, nka a bangebagaw bɛɛ sara.

KOOW BE MUN LO YIRA? Saan 2010 zanwiyekalo la, dugukoloyɛrɛyɛrɛba dɔ kɛra Hayiti jamana na ani ka mɔgɔ 300 000 ni kɔ faga. Ka fara o kan, mɔgɔ miliyɔn kelen ni tilan ɲɔgɔn ka boonw halakira yɔrɔnin kelen. O dugukoloyɛrɛyɛrɛba ɲɔgɔn ma kɛ Hayiti jamana na dɔrɔn. K’a ta saan 2009 awirilikalo la ka taga a bila saan 2010 awirilikalo la, dugukoloyɛrɛyɛrɛba 18 ni kɔ lo kɛra duniɲa kuru bɛɛ kɔnɔ.

MƆGƆW KA TELI KA SƆSƆLI JUMAN LO KƐ? A ma kɛ ko dugukoloyɛrɛyɛrɛw hakɛ ka ca sisan ka tɛmɛ fɔlɔ ta kan. Nka komi lɔnnikɛlaw ye fɛɛn caaman dilan minw b’an dɛmɛ ka kunnafoniw sɔrɔ joona joona, o lo kama an be bɔ dugukoloyɛrɛyɛrɛ caaman kala ma ka tɛmɛ fɔlɔfɔlɔ mɔgɔw kan.

TIƝƐN B’U FƐ WA? Miiri nin na: Bibulu t’a fɔ ko dugukoloyɛrɛyɛrɛw bena caya laban loonw na. Nka a b’a fɔ ko “dugukolo bena yɛrɛyɛrɛ kosɔbɛ yɔrɔ dɔw la.” O lo tun bena kɛ tagamasiɲɛ ye min b’a yira ko an be wagati min na, o be dan na ni tɔɔw ye.—Mariki 13:8; Luka 21:11.

E BE MUN LO MIIRI? Dugukoloyɛrɛyɛrɛbaw be kɛra bi i ko Bibulu tun kɔnna k’a fɔ cogo min na wa?

Dugukoloyɛrɛyɛrɛw dɔrɔn lo t’a yira ko an be laban loonw na. Nka u ye koo kelen dɔrɔn ye Bibulu tun kɔnna ka min fɔ ani o be dafara. An ka koo filanan dɔ lajɛ.

[Kumaw ɲɛɛ 4 kan]

“Anw, [dugukolo cogoya sɛgɛsɛgɛrikɛlaw] b’u weele ko dugukoloyɛrɛyɛrɛbaw. Nka mɔgɔ wɛrɛw b’u weele ko dusukasikobaw.”—KEN HUDNUT, DUGUKOLO COGOYA SƐGƐSƐGƐRIKƐLA DƆ, ETAZINI JAMANA NA.

[Jaa ɲɛɛ 4 kan]

© William Daniels/Panos Pictures