Kerecɛn cidenw mako b’a la ka delili kɛ
1. An ka cidenya baara tɛ ɲɛ mun lo kɔ?
1 An tɛ se ka cidenya baara dafa an yɛrɛ ma. Jehova be fanga di an ma k’o baara kɛ (Fil. 4:13). Mɔgɔ minw bɔlen be sagaw fɛ, a be tɛmɛ a ka mɛlɛkɛw fɛ k’an dɛmɛ an k’u ɲini k’u sɔrɔ ( Jir. 14:6, 7). An be tiɲɛn kisɛ minw dan ani k’u sɔn, Jehova lo b’u falen walisa u ka bonya (1 Kɔr. 3:6, 9). A kɔrɔtalen lo kerecɛn cidenw fɛ u k’u jigi la an sankolola Faa kan delili la!
2. An be se ka delili kɛ fɛɛn jumanw lo koo la?
2 An ka delili kɛ an yɛrɛ ye: N’an be waajuli kɛ koo o koo sen fɛ, an ka kan ka delili kɛ (Efes. 6:18). An be se ka delili kɛ fɛɛn jumanw lo koo la? An be se ka delili kɛ walisa ka jagwɛlɛya sɔrɔ ani ka kɛ ni miiriya ɲuman ye an ka kiinw koo la (Kɛw. 4:29). An be se ka Jehova deli a k’an ɲɛsin mɔgɔ kɔnɔgwɛw ma, an bena se ka bibulukalan kɛ ni minw ye. Ni lamɛnnikɛla ye ɲiningali dɔ kɛ, an be se ka delili surun dɔ kɛ an kɔnɔ k’a ɲini Jehova fɛ a k’an dɛmɛ an k’a tigi jaabi koɲuman (Neh. 2:4). An fana be se ka hakilitigiya deli walisa cidenya baara ka to ka kɛ an ɲɛnako fɔlɔ ye ( Yak. 1:5). An ye nɛɛma min sɔrɔ ka kɛ Jehova ka cidenw ye, n’an b’a fɔ an ka deliliw la ko an b’a waleɲuman lɔn o kosɔn, o ka di a ye.—Kol. 3:15.
3. N’an be delili kɛ mɔgɔ wɛrɛw ye, cogo juman na o be dɔ fara waajuli baara kan?
3 An ka delili kɛ mɔgɔ wɛrɛw ye: An ka kan ka “Ala deli ɲɔgɔn ye” fana, ani n’a bɛnnen lo, an k’an cidenɲɔgɔnw tɔgɔ fɔ yɛrɛ o deliliw la ( Yak. 5:16; Kɛw. 12:5). Yala kɛnɛyako b’a to i tɛ se ka caaman kɛ waajuli baara la wa? N’o lo, i ka delili kɛ i cidenɲɔgɔnw ye minw ka kɛnɛ. I ka deliliw be se ka min kɛ mɔgɔ wɛrɛw ye, i kana o mafiɲɛya abada! A bɛnnen lo fana an ka delili kɛ faamanw ye walisa u ka sɔn an ka waajuli baara ka kɛ. O cogo la, an balimaw bena “to lafiya la ni hakili sigilen ye.”—1 Tim. 2:1, 2.
4. Mun na an ka kan k’an timinandiya delili la?
4 Ka kibaro duman fɔ duniɲa yɔrɔ bɛɛ la, o ye baaraba ye dɛ! N’an b’an “timinandiya Ala delili la,” an bena se k’o baara kɛ k’a dafa ni Jehova ka dɛmɛ ye.—Rom. 12:12.