Zɔbu ye kantigiya kɛ Ala ye

BANABAGATƆ min be jaa nin kan, a makari be i la wa? A tɔgɔ ko Zɔbu, ani a muso lo lɔnin b’a kɔrɔ. I b’a lɔn a be min fɔra Zɔbu ye wa? A ko: ‘I ka Ala nɛni ka sa.’ An k’a filɛ fɛɛn min y’a lasun k’o fɔ ani mun na Zɔbu be tɔɔrɔla ten.

Zɔbu tun ye mɔgɔ kantigiman ye min be Jehova kaan minɛ. A siginin tun be Usi jamana na Kanaan gɛrɛfɛ. Zɔbu koo tun ka di Jehova ye kosɔbɛ, nka mɔgɔ wɛrɛ tun b’a kɔniya. I b’o tigi lɔn wa?

Sutana Naafigi tun lo. I hakili to a la ko Sutana ye mɛlɛkɛ jugu ye min be Jehova kɔniya. A sera ka Adama ni Awa lasun u ka Jehova kaan bila. Ani, a tun b’a miiri ko a be se k’o ɲɔgɔn kɛ mɔgɔw bɛɛ la. Yala a sera k’o kɛ wa? Ayi. An kumana mɔgɔ kantigiman caaman minw koo la ka tɛmɛ, i ka miiri olu koo la. I hakili be mɔgɔ joli tɔgɔ la u cɛma?

Yakuba ni Yusufu sanin kɔ Misira, Zɔbu wolola. A tun be kantigiya kɛ Jehova ye ka tɛmɛ adamadenw bɛɛ kan. Jehova tun b’a fɛ Sutana k’a lɔn ko a tɛ se ka mɔgɔw bɛɛ lasun ka kojugu kɛ. O kama a y’a fɔ a ye ko: ‘Zɔbu filɛ, a be ne kaan minɛ cogo min na!’

Sutana ye Ala jaabi ko: ‘A be kantigiya kɛ sabu i y’a duga ani fɛɛn ɲuman caaman b’a fɛ. Nka n’i y’a bolofɛnw bɛɛ tiɲɛ, a bena i nɛni.’

O kama Jehova y’a fɔ ko: ‘Ayiwa, i k’a bolofɛnw bɛɛ tiɲɛ sa. Koo jugu min ka di i ye, i k’o kɛ Zɔbu la ani an bena a filɛ n’a bena ne nɛni. Nka, i kɔni kana a faga.’

Fɔlɔ, Sutana y’a kɛ soonw nana Zɔbu ka misiw, a ka faliw n’a ka ɲɔgɔmɛw soɲɛ ani a y’a kɛ a ka sagaw fagara. Ka fara o kan, a ye fɔɲɔba dɔ kɛ ka Zɔbu dencɛ n’a denmuso 10 faga. O kɔ, a ye bana jugu nin bila Zɔbu la. Zɔbu tɔɔrɔla kosɔbɛ. O lo y’a to a muso y’a fɔ a ye ko: ‘I ka Ala nɛni ka sa.’ Nka Zɔbu ma sɔn k’o kɛ. Ka fara o kan, teri kolon saba nana bɔ a ye k’a fɔ ko a ye koo jugu dɔ lo kɛ. Nka Zɔbu tora a ka kantigiya kan.

Zɔbu ka kantigiya ye Jehova dusu diya kosɔbɛ ani o kɔ, a ye Zɔbu duga i ko i ɲɛɛ b’a la cogo min na jaa kan. A y’a kɛnɛya a ka bana jugu la. Zɔbu ye deen cɛɲumanba 10 wɛrɛ sɔrɔ. Ani misiw, ɲɔgɔmɛw, faliw ani saga hakɛ min tun b’a fɛ fɔlɔ la, Ala y’o ɲɔgɔnna fila di a ma.

Yala i bena kantigiya kɛ Jehova ye koo bɛɛ la i ko Zɔbu wa? N’i y’o kɛ, Jehova bena i duga fana. I bena ɲɛnamaya kɛ kudayi tuma min na dugukolo bɛɛ bena kɛ yɔrɔ cɛɲumanba ye i ko Edɛn nankɔtu.