Fanibugu: batoli kama

MUN lo be jaa nin kan? Fanibugu dɔ lo min ɲɔgɔn tɛ yen, a dilanna Jehova batoli kama. Saan kelen u bɔnin kɔ Misira, Israɛldenw y’o fanibugu dilan. I b’a lɔn mɔgɔ min y’a fɔ u ye ko u k’a dilan wa?

Jehova tun lo. Ka Musa to Sinayi kulu kan, Jehova ye o fanibugu dilancogo fɔ a ye. A tun ka kan ka dilan cogo dɔ la walisa u ka se k’a walaka, k’a ɲun cogo nɔgɔman na ani ka segi k’a sogolon ɲɔgɔn na tugun. O cogo la, Israɛldenw tun mana wuli ka taga yɔrɔ wɛrɛ la kongokolon kɔnɔ, u tun b’a ɲun ka taga n’a ye.

N’i ye filɛri kɛ fanibugu dakun na bondennin kɔnɔ, i be se ka kɛsu dɔ ye yen. O ye layidu tagamasiɲɛ kɛsu ye. U ye mɛlɛkɛ wala serubɛn fila dilan ni sanu ye kɛsu dakun fila kan. Ala ye Cikan Tan sɛbɛ walaka kabakurulaman wɛrɛw kan tugun sabu Musa ye fɔlɔ taw karikari. O kabakuru walakaw tun maranin be layidu tagamasiɲɛ kɛsu kɔnɔ. Daga dɔ tun bilanin be yen fana, o fanin be maanɛ la. I hakili b’a la maanɛ ye fɛɛn min ye wa?

Jehova tun ye Musa balimacɛ Arɔn lo sugandi ka kɛ sarakalasebagaw kuntigi ye. A tun be jama ɲɛminɛ Jehova batoli koo la. Ani a dencɛw fana tun ye sarakalasebagaw ye.

Sisan, fanibugu ka bondennin min be i kinibolo fɛ, o filɛ. A ka bon ni tɔɔ kelen nin ye fɔɔ siɲɛ fila. I ɲɛɛ be kɛsudennin dɔ la sisi be bɔra min na wa? O ye sarakabɔlan ye, sarakalasebagaw be wusulan kasa diiman jɛni min kan. Fitinɛ dɔ be yen fana, bolo wolonfila b’a la. Fɛɛn sabanan dɔ be yen, o ye tabali ye burukun 12 maranin be min kan tuma bɛɛ.

Fanibugu lukɛnɛ kɔnɔ dagaba dɔ tun be yen, a fanin jii la. Sarakalasebagaw tun be ko n’o jii ye. Sarakabɔlan belebeleba dɔ fana tun be yen min kan u tun be bɛgɛn sarakaninw jɛni Jehova ye. O fanibugu tun be Israɛldenw ka fanibuguw cɛmancɛ la.