Cɛɛ fangatigiba dɔ

CƐƐ min ka fanga ɲɔgɔn tɛ yen, i b’a tɔgɔ lɔn wa? Kititigɛla dɔ lo min tɔgɔ ko Samusɔn. Jehova lo ye o fanga di a ma. Sanni Samusɔn yɛrɛ ka wolo, Jehova tun y’a fɔ a bamuso ye ko: ‘I bena dencɛ dɔ wolo. A bena Israɛldenw kisi Filisitikaw bolo.’

Filisitikaw lo tun siginin be Kanaan jamana na. Mɔgɔ juguw tun lo, u ka kɛlɛdenw tun ka ca ani u tun be Israɛldenw tɔɔrɔ kosɔbɛ. Loon dɔ la, Samusɔn tagatɔ Filisitikaw fɛ, jara belebeleba dɔ bɔra k’a kunbɛn. Nka, Samusɔn y’a faga n’a bolo gwansan ye. A ye Filisitika caaman faga fana.

O kɔ, Samusɔn jarabira muso dɔ la min tɔgɔ ko Dalila. Filisitikaw kuntigiw y’u daa di Dalila ma ko u kelen kelen bɛɛ bena warigwɛ deen 1 100 di a ma n’a y’a fɔ u ye fɛɛn min be fanga di Samusɔn ma. O wariba nege ye Dalila minɛ. Tiɲɛn na, Samusɔn ni Ala ka mɔgɔw koo tun man di Dalila ye. O kama, loon o loon a tora k’a ɲini Samusɔn fɛ a k’a ka fanga gundo fɔ ale ye.

A laban Samusɔn y’a ka fanga gundo fɔ a ye. A y’a fɔ a ye ko: ‘Ne kuun ma li ka ye. Kabi ne wololon, Ala ye ne ɲɛnatɔmɔ ka kɛ Nazireyɛn ye, o kɔrɔ, baaraden min be dan na tɔɔw la. Ni n kuun lira, n barika be ban.’

Dalila y’a ye ko Samusɔn y’a kɔnɔ gwɛ a ye minkɛ, a y’a lasunɔgɔ a seenw kan. A ye cɛɛ dɔ weele ka na Samusɔn kuun li. Samusɔn kununa tuma min na, a y’a ye ko a fanga banna. O la, Filisitikaw donna k’a minɛ. U y’a ɲɛɛw ci ani u y’a kɛ u ka jɔɔn ye.

Loon dɔ la, Filisitikaw tun be u ka ala Dagɔn fɛtiba kɛra, u ye Samusɔn labɔ kaso la ka na n’a ye janko k’a lɔgɔbɔ. O y’a sɔrɔ Samusɔn kunsigi falenna kokura. Cɛden min tun ye Samusɔn bolo minɛ, a y’a fɔ ale ye ko: ‘A to ne ka maga soo kɔnɔ samasen nunu na.’ O la, Samusɔn ye fanga deli Jehova fɛ ani a ye samasen nunu minɛ ka kule ko: ‘Ne ni Filisitikaw ka sa ɲɔgɔn fɛ.’ Filisitika 3 000 tun be yen fɛti nin na. Samusɔn ye soo samasenw ɲɔndi ani boon benna k’o mɔgɔ jugu nunu bɛɛ faga.