Bolo dɔ be sɛbɛri kɛ kogo kan

MUN lo be kɛra yan? Mɔgɔw be fɛtiba dɔ lo kɛra. Babilɔni masacɛ ye a ka mɔgɔba waa kelen weele o fɛti la. Jifilen sanulamanw ni warigwɛlamanw ani minan minw tun tara Jehova ka batosoba kɔnɔ Zeruzalɛmu, u be dumuni ni minni kɛra olu lo kɔnɔ. Nka o wagati yɛrɛ la, mɔgɔ bolo dɔ barila ka bɔ k’a daminɛ ka sɛbɛri kɛ kogo kan. Bɛɛ siranna kosɔbɛ.

O tuma na, Nabukodonozɔri ka mamaden Balitazari lo tun ye masacɛ ye. A kulera ko u ka lɔnnikɛlaw weele ka na ale fɛ ani a y’a fɔ u ye ko: ‘Ni mɔgɔ o mɔgɔ sera ka sɛbɛ nin kalan ani k’a kɔrɔ fɔ n ye, a tigi bena bonyafɛn caaman sɔrɔ ani a bena kɛ masaya kɔnɔ mɔgɔba sabanan ye.’ Nka lɔnnikɛla si ma se k’o sɛbɛ kalan kogo kan, kuma tɛ k’a kɔrɔ fɔ.

Masacɛ bamuso ye o kuma mɛn, a donna u fɛ dumunikɛyɔrɔ la k’a fɔ masacɛ ye ko: ‘Kana i hakili ɲagami ten. Cɛɛ dɔ be yen i ka mara kɔnɔ, min be mɛlɛkɛw ka miiriya lɔn. I mamacɛ Nabukodonozɔri tun ye masacɛ ye tuma min na, a ye ale lo sigi a ka lɔnnikɛlaw bɛɛ kun na. A tɔgɔ ko Daniyɛli. Mɔgɔ bila ka taga a weele, a bena nin koow bɛɛ kɔrɔ fɔ i ye.’

O yɔrɔ nin bɛɛ, u ye Daniyɛli weele ka na. Daniyɛli banna masacɛ ka bonyafɛnw na fɔlɔ ka sɔrɔ k’a fɔ fɛɛn min kama Jehova ye masaya bɔsi Balitazari mamacɛ Nabukodonozɔri la. Daniyɛli ko: ‘A kuncɛ tun ka bon kosɔbɛ, o lo y’a to Jehova y’a ɲangi.’

Daniyɛli y’a fɔ Balitazari ye ko: ‘Fɛɛn minw kɛra Nabukodonozɔri la, i be u bɛɛ lɔn, nka i fana ye i kuncɛ bonya i ko ale. I ko u ka na ni Jehova batosoba kɔnɔ jifilenw ni minanw ye. Aw ye minni kɛ n’u ye. Aw ye batofɛn yirilamanw ni kabakurulamanw tando, nka aw ma sɔn ka Danbagaba bonya. O lo y’a to Ala ye bolo nin bila ka kumaden nunu sɛbɛ kogo kan.’

Daniyɛli ko: ‘Fɛɛn min sɛbɛra, o filɛ nin ye: ‘MENƐ, MENƐ, TEKƐLI, PARISIN.’ ’

‘MENƐ kɔrɔ ko Ala y’i ka masaya wagati jati k’a daan tigɛ. TEKƐLI kɔrɔ ko u ye i suma kilo kan, u y’a ye ko i man gwili kosɔbɛ. PARISIN kɔrɔ ko i ka mara tilanna ka di Mɛdiw ni Pɛrɛsiw ma.’

Ka Daniyɛli to kuma na, Mɛdiw ni Pɛrɛsiw y’a daminɛ ka Babilɔni kɛlɛ. U ye dugu minɛ ani ka Balitazari faga. Kuma min tun sɛbɛra kogo kan, o dafara o suu yɛrɛ la! Nka, mun lo tun bena kɛ Israɛldenw na sisan? An bena o lajɛ kɔfɛ, nka an k’a filɛ fɔlɔ min kɛra Daniyɛli la.