Damasi sira kan

CƐƐ min bennin be dugu ma, jɔn lo? Sɔli lo, ale lo tun be Etiyɛni fagabagaw ka forokiyaw kɔrɔsira. A filɛ yeelenba min bɔra sankolo la! Mun lo be kɛra do?

Etiyɛni faganin kɔ, Sɔli y’a daminɛ ka Yezu ka kalandenw kɛlɛ. A tun be taga soo ni soo k’u sama ka taga u don kaso la. Kalanden caaman bolila ka taga dugu wɛrɛw la ani k’a daminɛ ka “kibaru diman” fɔ o yɔrɔw la. Nka, Sɔli ma dan Zeruzalɛmu dɔrɔn ma. A filɛ sisan Damasi sira kan. K’a to o sira kan, a filɛ kabako min kɛra:

Yeelenba dɔ barila ka bɔ sankolo la ka na a lamini. A bɔra ka ben i ko i ɲɛɛ b’a la jaa nin kan. O kɔ, kumakan dɔ bɔra ko: ‘Sɔli, Sɔli, mun na i be ne tɔɔrɔla ten?’ Sɔli tagamaɲɔgɔnw y’o yeelenba ye ani k’o kumakan mɛn, nka u m’o kuma faamu.

Sɔli ye ɲiningali kɛ ko: “E ye jɔn ye, Matigi?”

Kumakan nin ko: “Ne Yezu lo i be min tɔɔrɔla.” Yezu y’o fɔ walisa Sɔli k’a faamu ko n’a be ale ka kalandenw tɔɔrɔla a be komi a be ale Yezu yɛrɛ lo tɔɔrɔla.

Sɔli y’a ɲininga sisan ko: ‘Matigi, ne ka kan ka mun lo kɛ?’

Yezu ko: “Wili ka don dugu kɔnɔ, i ka kan ka min kɛ, u bena o fɔ i ye.” Sɔli wilila ka bɔ duguma, a y’a ɲɛɛ yɛlɛ, nka a tun tɛ se ka yeli kɛ. A kɛra fiyentɔ ye! A tagamaɲɔgɔnw y’a bolo minɛ le ka don n’a ye Damasi.

Yezu ka kalanden dɔ tun be Damasi min tɔgɔ ko Ananiyasi. Yezu y’a fɔ o ye ko: ‘U be sira min weele ko Siratilennin, i labɛn ka taga yen. N’i sera, i be cɛɛ dɔ koo ɲininga Zuda ka soo, a tɔgɔ ko Sɔli. Ne y’a sugandi a ka baara kɛrɛnkɛrɛnnin kɛ ne ye.’

O la, Ananiyasi tagara. A ye Sɔli sɔrɔ, k’a bolo la Sɔli kuun na ani k’a fɔ ko: ‘Matigi lo ye n ci i fɛ walisa i ɲɛɛ ka yɛlɛ ani i ka fa Nii Senuman na.’ O yɔrɔnin bɛɛ, fɛɛn dɔw bɔra Sɔli ɲɛdenw na ka benben i ko jɛgɛfaraw, ani a ye yeli kɛ tugun.

Yezu ye see di Sɔli ma a ka siya caaman mɔgɔw waaju cogo barikaman na. A nana weele ko ciden Pol. An bena koo caaman kalan a koo la kɔfɛ. Nka, an k’a filɛ fɔlɔ Ala ye Piyɛri ci ka taga min kɛ.