I be se ka teri fisaman min sɔrɔ, o ye Ala ye

Ka kɛ Ala teri ye, o ye koo fisaman ye min ɲɔgɔn ma deli k’i sɔrɔ. Ala bena i kalan cogo min na i be se ka hɛɛrɛ ni lafiya sɔrɔ. A bena i hɔɔrɔnya ka bɔ lannako gomanw ni kɛcogoyaw la minw be mɔgɔ mako sa. A bena i ka deliliw lamɛn. A bena i dɛmɛ ka dusu lafiya ni jigidali diya bɔ (Zaburuw 71:5; 73:28). Ala bena kɛ sinsin yɔrɔ ye i fɛ kɔnɔnafili wagatiw la (Zaburuw 18:19). Ani Ala b’a ka nilifɛn d’i ma, o min ye ɲɛnamaya banbali ye.—Romɛkaw 6:23.

I komi i be magwɛrɛla Ala la, i fana bena magwɛrɛ Ala teriw la. U fana bena kɛ i teriw ye. Tiɲɛn na, u bena kɛ i fɛ i n’a fɔ balimacɛw ani balimamusow. U nisɔn bena diya k’i kalan Alako la, ani u bena i dɛmɛ ani k’i jagwɛlɛya.

An tɛ Ala bɔɲɔgɔn ye. I komi i be teriya ɲinina Ala fɛ, i ka kan ka sɔbɛko dɔ faamuya. Ka teriya kɛ ni Ala ye, o tɛ ka teriya kɛ n’i filankuruw ye. Ale ka sanda n’a ka hakilitigiya furancɛ ka jan n’an ta ye, ani a ka sebagaya ka bon n’an ta ye. Joo b’a ye ka kɛ an Marabaga ye. O la, n’an b’a fɛ ka kɛ a teri ye, an ka kan ka lamɛnni kɛ a fɛ, ani n’a ko an ka min kɛ, an ka kan k’o lo kɛ. O lo bena kɛ sababu ye k’an ɲɛ tuma bɛɛ.—Esayi 48:18.