I ka kan k’a ɲini ka Ala lɔn

Walisa i ka kɛ Ala teri ye, i ka kan k’a ɲini k’a lɔn. Yala i teriw b’i tɔgɔ lɔn ani u b’i weele i tɔgɔ fɛ wa? U b’a kɛ. Ala fana b’a fɛ i k’a tɔgɔ lɔn k’a fɔ. Ala tɔgɔ ko Jehova (Zaburuw 83:19; Matiyu 6:9). I fana ka kan k’a lɔn min ka d’a ye ani min ka go a ye. I ka kan k’a lɔn jɔn lo ye a teriw ye, ani minw ye a juguw ye. Ka se ka mɔgɔ lɔn, o be wagati ta. Bibulu b’a fɔ ko hakilitigiya lo ka wagati kunmabɔ ka lɔnniya sɔrɔ Jehova koo la.—Efesekaw 5:15, 16.

Ala teriw b’a diyanyekow kɛ. I miiri i teriw koo la. N’i b’u minɛ ka cɛjuguya ani n’i be koow kɛ, olu be minw kɔniya, yala aw ka teriya bena taga ɲɛfɛ wa? Ayi dɛ! O cogo kelen na, n’i b’a fɛ ka kɛ Ala teri ye, i ka kan k’a diyanyekow kɛ.—Yuhana 4:24.

Diinanw bɛɛ tɛ mɔgɔ ladon Ala ka teriya la. Yesu, min ye Ala ka teri fisaman ye, a ye sira fila koo fɔ. Sira kelen ka waga ani a falen be mɔgɔw la. O sira be mɔgɔ bila ka taga halaki yɔrɔ. Sira tɔ kelen be dɔgɔmannin ani mɔgɔ damanin lo be tagamana a kan. O sira be mɔgɔ bila ka taga ɲɛnamaya banbali yɔrɔ. O kɔrɔ ko n’i b’a fɛ ka Ala ka teriya sɔrɔ, i ka kan k’a batosira ɲɛnaman ɲalɔn.—Matiyu 7:13, 14.