KALANSEN 8

Ban ngalon diinan la, ani tiɲɛn diinan sira tagama

1. Bi, hadamadenw ka kan ka lɔyɔrɔ juman ta batoli koo la?

YESU y’a fɔ ko: “Mɔgɔ min tɛ ne fɛ, o tigi ye ne jugu le ye.” (Matiyu 12:30, Kibaro Diman, SBI 1994). N’an tɛ ni Jehova ye, an be ni Sitanɛ lo ye. Mɔgɔ caamanba b’a miiri k’u be baara kɛra Ala ye cogo ɲuman na. Nka Bibulu b’a yira ko Sitanɛ be “dugukolo kan mɔgɔw bɛɛ lafili” (Jirali 12:9). Mɔgɔ miliyɔn caaman b’a miiri k’u be Ala lo batora. Nka tiɲɛn na, u be baara kɛra Sitanɛ Naafigi lo ye! Bi, a ɲininen be hadamadenw fɛ u ka lɔyɔrɔ kelen ta: Ka baara kɛ Jehova, ‘tiɲɛtigi Ala’ ye, wala ka baara kɛ Sitanɛ, “nkalon fa” ye.—Zaburuw 31:6; Yuhana 8:44.

I yɛrɛ hɔɔrɔnya ka bɔ ngalon diinan la

2. Sitanɛ be tɛmɛ fɛɛrɛ juman fɛ ka mɔgɔw bali ka Jehova bato?

² K’a latigɛ ka baara kɛ Ala ye, o ye hakilitigiya ye. O b’an dɛmɛ ka Ala ka diyanye sɔrɔ. Nka a man di Sitanɛ ye ni mɔgɔ dɔ y’a latigɛ ka baara kɛ Ala ye. A be gwɛlɛyaw lase o tigi ma. A be se ka tɛmɛ mɔgɔ wɛrɛw, teriw, hali somɔgɔw fɛ ka yɛlɛ bɔ o tigi la wala k’a kɔrɔbɔ. Yesu ye lasɔmini kɛ ko: “Mɔgɔ so mɔgɔw yɛrɛ na kɛ a juguw ye.”—Matiyu 10:36.

3. N’i denbaya wala i teriw b’a fɛ k’i bali ka Ala bato, i bena mun kɛ?

³ N’o koo y’i sɔrɔ, i bena mun kɛ? Mɔgɔ caaman b’a lɔn k’u ka batoli kɛcogo man ɲi. Nka, u be sigasiga k’u seen bɔ a la. U b’a miiri ko n’u y’o kɛ, u y’u denbaya janfan. Yala o miiriya ka kan wa? N’i y’a mɛn k’i somɔgɔ dɔw be dɔrɔgi ta, yala i tɛna u lasɔmi ko farati b’a la wa? I tɛna jɛn n’u ye k’o dɔrɔgi ta, tiɲɛn tɛ?

4. Josue ye mun fɔ Israɛl mɔgɔw ye batoli koo la a ka wagati la?

⁴ Josue ye Israɛl mɔgɔw jagwɛlɛya u k’u bɛnbaw ka bato kɛcogo juguw n’u ka landaw bila. A y’a fɔ ko: “Sisan, aw ka siran Matigi [ Jehova, ABU, 1961] ɲɛ ka baara kɛ a ye tilennenya ni kantigiya ye. Aw bɛnbaw ye bato fɛn minw bato o ba kɔ fɛ ani Misira jamana la, aw ka olu ko dabila ka baara kɛ Matigi [ Jehova, ABU, 1961] ye.” ( Josue 24:14). Josue ye kantigiya kɛ Ala ye, ani Jehova y’a duga. N’an ye kantigiya kɛ Jehova ye, a bena an duga fana.—2 Samuɛl 22:26.

Diinanw ka kalansiraw —tiɲɛn ani ngalon

Sabaya: Diinan caaman be kalan kɛ ko Ala ye Sabaya ye. U b’a fɔ ko “Faa ye Ala ye, Dencɛ [Yesu] ye Ala ye, Hakili Senu ye Ala ye, nka ko u ma kɛ Ala saba ye, nka Ala kelen ye.”

“Sabaya” daɲɛ yɛrɛ tɛ sɔrɔ Bibulu kɔnɔ. Bibulu fana tɛ kalan kɛ ko Jehova ye mɔgɔ saba kɛlen mɔgɔ kelen ye. Jehova kelenpe ye Ala ye. 1 Kɔrɛntekaw 8:6 b’a fɔ ko: “An kɔni fɛ, Ala kelenpe bɛ yen, o ye an Fa ye.” Jehova ye kɔrɔtalenba ye. Yesu tɛ Ala ye, nka a ye “Ala Denkɛ” lo ye (1 Yuhana 4:15). O cogo kelen na, hakili senu tɛ Ala ye. A yɛrɛ tɛ mɔgɔ ye. Hakili senu ye Ala ka fanga ye, a be baara kɛ ni min ye.—Kɛwalew 1:8; Efesekaw 5:18.
Niin: Diinan caaman be kalan kɛ ko niin ye fɛɛn ye, min be mɔgɔ la, ani a tɛ se ka ban ka ye. Bibulu be kalan kɛ ko niin ye mɔgɔ ye, ani tiɲɛn na, mɔgɔ be se ka sa.—Jenɛse 2:7; Ezekiɛl 18:4.
Jahanama tasumaman: Ngalon diinanw be kalan kɛ ko mɔgɔ juguw niinw be tɔɔrɔ banbali la jahanama na. Bibulu b’a fɔ ko mɔgɔ salenw “tɛ foyi dɔn” (Waajulikɛla 9:5). A fana be kalan kɛ ko “Ala ye kanuya de ye” (1 Yuhana 4:8). Jehova, kanuya Ala, kɔni tɛna mɔgɔw tɔɔrɔ tasuma fɛ.

Koorilen: Bibulu be kalan juman kɛ Sabaya, niin, ani jahanama koo la?

Ngalon diinan ka batofɛnw ta ka bɔ yen

5. Mun na an man ɲi ka jinamori fɛɛn si mara?

⁵ Ni jinamori fɛɛn dɔ b’an fɛ, an ka kan k’a halaki n’an b’a fɛ ka hɔɔrɔnya ka bɔ ngalon diinan la. O fɛɛn be se ka kɛ joo dɔ ye, wala sɛbɛn, wala kirisi bololanɛgɛ dɔ ye. A kɔrɔtalen be an k’o fɛɛn halaki, sabu o b’a yira ko an be an jigi bɛɛ la Jehova lo kan.

6. Kerecɛn fɔlɔw ye mun kɛ n’u ka jinamoriya sɛbɛnw ye?

⁶ A filɛ, kerecɛn fɔlɔw ye fɛɛn min kɛ tuma min na u y’a latigɛ ka tiɲɛn diinan sira tagama. Bibulu b’a fɔ ko: “Dɔnbaayakɛla caman nana ni u ka sɛbɛnw ye ka u jeni mɔgɔw bɛɛ ɲɛ na.”—Kɛwalew 19:19.

7. Ni jinɛw b’an ɲɛgwan, an be se ka mun kɛ?

⁷ Mɔgɔ minw y’a daminɛ ka baara kɛ Jehova ye, jinɛw be se k’u ɲɛgwan n’u seen tun be yeli ni subagaya ni jinamori koow la fɔlɔ la. N’o koo y’i sɔrɔ, i kaan bɔ ka Jehova weele a tɔgɔ fɛ delili kɔnɔ. A bena i dɛmɛ.—Ntalenw 18:10; Yakuba 4:7.

8. Baara be kɛ ni boli ni jaa minw ye ngalon diinan kɔnɔ, kerecɛnw b’u jate cogo di?

⁸ Minw b’a fɛ ka baara kɛ Jehova ye, u man kan ka ngalon diinan ka boli wala jaa si mara, wala ka baara kɛ n’u ye. Kerecɛn lakikaw be “taama dannaya barika la, yeli barika tɛ” (2 Kɔrɛntekaw 5:7). U be kolo Ala ka sariya ye. O sariya be mɔgɔ bali ka tɛmɛ jaa sifa bɛɛ fɛ ka batoli kɛ.—Ekisode 20:4, 5.

Jɛnɲɔgɔnya kɛ ni Jehova ka jama ye

Bamusoman dɔ n’a denmuso fitinin be gwa kɛra ɲɔgɔn fɛ

9. Bibulu be ladili juman di walisa mɔgɔ ka kɛ hakilitigi ye?

⁹ Bibulu b’a fɔ ko: “Mɔgɔ min be taama hakilitigiw fɛ, o na kɛ hakilitigi ye” (Ntalenw 13:20). N’an b’a fɛ ka kɛ hakilitigi ye, an ka kan ka tagama, wala ka jɛnɲɔgɔnya kɛ ni Jehova Seerew ye. U ye mɔgɔw ye, minw be tagama ɲɛnamaya banbali sira kan.—Matiyu 7:14.

10. Cogo juman na Jehova Seerew be se k’i dɛmɛ ka baara kɛ Ala ye?

¹⁰ Jehova Seerew b’u janto mɔgɔw la sɔbɛ la. U ka baara kuun ye ka mɔgɔ kɔnɔgwɛw dɛmɛ ka Bibulu ka tiɲɛn kalan faamuya: kalan min be mɔgɔ bila ka taga ɲɛnamaya banbali la. U be se k’i dɛmɛ u kɛtɔ ka Bibulu kalan n’i ye gwansan. U bena i ka ɲiningaliw jaabi, ani u bena a yira i la cogo min na i be se ka Bibulu lɔnniya sira tagama i ka ɲɛnamaya kɔnɔ.—Yuhana 17:3.

11. Kerecɛnw ka lajɛnw bena i dɛmɛ cogo di?

¹¹ U ka lajɛnw delila ka kɛ Masaya Boon dɔ kɔnɔ. O yɔrɔ la, i bena dɔ fara i ka lɔnniya kan Jehova ka siraw koo la. Nege min b’i la ka tiɲɛn diinan sira tagama, o bena barika sɔrɔ. I fana bena dɛmɛ sɔrɔ k’i ladege ka mɔgɔ wɛrɛ dɛmɛ ka Bibulu ka tiɲɛn lɔn.—Heburuw 10:24, 25.

Kafo dɔ be lajɛn kɛra Masaya Boon dɔ kɔnɔ

12. Delili be se k’i dɛmɛ ka baara kɛ Ala ye cogo juman na?

¹² N’i ka lɔnniya be bonyana ka taga Jehova sagoya n’a ŋaniya koo la, n’a sɔrɔ i bena a ka kanuya siraw waleɲuman lɔn kosɔbɛ. A negeba fana ka ɲi ka kɛ i la k’a diyanye koow kɛ ani ka boli koow ɲɛ, minw ka gwo a ye. I hakili to a la ko i be se ka magwɛrɛ Jehova la delili kɔnɔ: i be se k’a ɲini a fɛ a k’i dɛmɛ ka koo tilennen kɛ ani ka boli koo jugu ɲɛ.—1 Kɔrɛntekaw 6:9, 10; Filipekaw 4:6.

Denbayamɔgɔ dɔw be Bibulu kalanna ɲɔgɔn fɛ — I be se ka batoli sɔbɛ sira tagama cogo di?

13. I be se ka Jehova dusu diya cogo di?

¹³ Wagati bena se, i bena ɲɛtaga sɔrɔ hakilimaya ta fan fɛ. O la, i bena a faamu k’i mako b’a la k’i yɛrɛkun di Jehova ma ani ka batise i ko Jehova Seere. I kɛtɔ ka fara Jehova ka mɔgɔw kan, i bena Jehova dusu diya (Ntalenw 27:11). I bena kɛ jama hɛɛrɛman cɛ. Ala ye nin fɔ o jama koo la: “Ne bɛna sigi u cɛma ka to u fɛ, ne bɛna kɛ u ka Ala ye, u bɛna kɛ ne ka mɔgɔw ye.”—2 Kɔrɛntekaw 6:16, LAYIDUKURA, ABBF, 1996.

Ne hɔɔrɔnyara ka bɔ jinɛw bolo

Suu dɔ la, ne tun be sunɔgɔra n’ cɛɛ gɛrɛ fɛ. Ne ye kaan dɔ mɛn, a ye ne tɔgɔ weele siɲɛ saba. O kɔ, ne y’a ye ko tii faranna, ani fɛɛn dɔ benna ne kɔnɔbara kan i ko takulu. O bɛɛ n’a ta, ne cɛɛ m’o koow foyi si ye. Nka funteni kabakoman dɔ ye ne minɛ, ani a tora ne kan fɔɔ kalo caaman.

Kalo wɔɔrɔ tɛmɛnen kɔ, o kaan kelen ye ne weele tugun. Yɔrɔnin kelen, boon bɛɛ kɛra komi a donna jii dunba dɔ kɔnɔ. Saa belebeleba dɔ bɔra jii la, ani a ye ne bolo meleke. Ne y’a ɲini ka dɛsɛ k’a bɔ yen. Siranyaba tun be ne la. O kɔ, jii ni saa bɛɛ tununa, ani ne tara ka fili dugukolo kan ni fangaba ye. Ne kirinna fɔɔ lɛri caaman. O kɔ kaan nin y’a fɔ ne ye ko n’ ka taga jinɛweleli batoso dɔ kɔnɔ: u be mɔgɔw kɛnɛya o yɔrɔ la dugu kɔnɔ. Ne y’o danfɛn ɲininga a tɔgɔ la. A ye tɔgɔ dɔ fɔ, min kɔrɔ ko “nafolotigi nka denntan.” A ye lahidu ta ne ye ko a be ne kɛ nafolotigi ye mɔgɔw kɛnɛyali see sababu fɛ.

Banabagatɔw tun be bɔ yɔrɔ surun ni yɔrɔ jan na ka na ne sɛgɛrɛ. Sanni u ka se ne ka soo, ne tun b’u ye dugalen dɔ kɔnɔ min be dan na ni dugalen tɔɔw ye. Dɔ tun mana se, ne tun be n’ tɛgɛ ci a tɛgɛ la. O tigi ka bana wala a ka kunko cogoya n’a fura tun be yira ne la yɔrɔnin kelen. Mɔgɔw tun ka kan ka wari daa min sara, danfɛn tun b’o fana fɔ n’ ye.

Wari ni sɔnnifɛnw tun be donna caaman, sabu barika tun be ne ka furakɛliw la. Ne kɛra “nafolotigi” ye, nka ne ye “denntan” kɔrɔ faamu fana. Ne tun mana kɔnɔ dɔ ta tuma o tuma n’ ka deen laban tun be sa. A dusu kasi tun ka bon kosɔbɛ. Ne ye baara kɛ o danfɛn ye saan 12 minw kɔnɔ, ne ka deen wɔɔrɔ sara.

Ne y’a daminɛ ka Ala deli a ka ne dɛmɛ. Ne tun be timinandiya delili la. Loon dɔ la Jehova Seerew ye ne ka daa kɔkɔ. Ne tun delila k’u gwɛn fɔlɔ la. Nka o loon na, ne y’a latigɛ ka lamɛnni kɛ u fɛ. Baro kɛtɔ n’u ye, ne y’a faamu ko ne tun be baara kɛra jinɛ dɔ lo ye! O la, ne y’a latigɛ ka kɔ di jinɛweleli ma.

Ne y’o ko fɔ jinɛ ye minkɛ, a ye kankari da ne ye. O bɛɛ n’a ta, ne y’a fɔ a ye ko: “An ka jɛnɲɔgɔnya banna.”

Ne tun be yeli baara kɛ ni fɛɛn minw bɛɛ ye, ne y’u bɛɛ jɛni. Ne ye Bibulu kalan kɛ ni Jehova Seerew ye. N’ kɛra Jehova ka baarakɛla ye, ani n’ batisera saan 1973. Sisan deen looru be n’ fɛ, minw ka kɛnɛ. N’ cɛɛ fana batisera ka kɛ Seere ye.—Josephine Ikezu ka lakalita.

Koorilen: Muso dɔ y’a yɛrɛ hɔɔrɔnya ka bɔ jinɛw bolo cogo di?